>මෙහිදී මුහම්මද් නබිතුමා ඔහුගේ අවසාන දේශනය සිදු කරන ලදි.
මාගේ ජනයිනි! මා හට හොඳින් සවන් දෙනු. මීළඟ වර්ශයේ මා ජීවතුන් අතර සිටිනු ඇත් දැයි මා නොදනිමි. මේ නිසා මා පවසන දෑ කෙරෙහි සාවධානයෙන් සවන් දී මෙදින මෙහි නොපැණි අයට ද මෙම පණිවිඩය රැගෙන යනු.
ජනයිනි! නුඹලා මෙම මාසය, මෙම දිනය, මෙම දේශය ශුද්ධත්වයෙන් සලකනවාක්සේම සෑම මුස්ලිම්වරයකුගේම ජීවිතය සහ වත්කම් ශුද්ධත්වයෙන් සලකනු. නුඹලා භාරයේ තබන ලද වත්කම් එහි අයිතිකරුවන් වෙතට නැවත භාර දෙනු. කිසිවකු නුඹලාට හාණි නොපමුණුවීම පිණිස නුඹලා ද කිසිවකුට හාණි නොකරනු. නුඹලා අනිවාර්යයෙන්ම නුඹලාගේ මැවුම්කරු අල්ලාහ් වෙතට නැවත යන්නට සිදු වන බවත් ඔහු නුඹලා කළ ක්‍රියාවන් විමසන බවත් මතකයේ තබා ගනිවු.
අල්ලාහ් පොළිය තහනම් කර ඇත. මේ නිසා පොළී ගනු දෙනු සියල්ල අද සිට අවලංගු වනු ඇත. නමුත් නුඹලා දුන් ණය මුදල නුඹලාට අයිතිය. මේ අනුව නුඹලා කිසිවකුට අසාධාරණයක් සිදු නොකරන අතර නුඹලාටද කිසිදු අසාධාරණයක් සිදු නොවේ.
නුඹලාගේ ධර්මයේ ආරක්ෂාව පිණිස සාතාන්ගෙන් ආරක්ෂා වනු. (පිළිම වන්දනාව වැනි) විශාල පාපයන් වලට නුඹලාව පෙළඹවීමේ බලාපොරොත්තු සියල්ල බිඳීම හේතුවෙන් ඔහු දැන් නුඹලාව කුඩා පාපයන්වලට පෙළඹවීමට උත්සාහ කරනු ඇත.
ජනයිනි! නුඹලාගේ කාන්තාවන් කෙරෙහි නුඹලාට අයිතිවාසිකම් තිබෙන බව සත්‍යයකි. නමුත් ඔවුන්ට ද නුඹලා කෙරෙහි අයිතිවාසිකම් තිබෙන බව මතක තබා ගනු. නුඹලා ඔවුන්ව නුඹලාගේ බිරින්දෑවරු ලෙස ගන්නේ අල්ලාහ්ගේ අනුමැතිය මත බවත් අල්ලාහ්ට බාර වී බවත් මතක තබා ගනු. ඔවුන් නුඹලාගේ අයිතිවාසිකම් ලබා දෙමින් ජීවත් වන්නේ නම් ඔවුනට කරුණාවෙන් අහාර අඳුම් පැළඳුම් ආදිය ලබා දීම නුඹලාගේ වගකීම වේ. නුඹලාගේ කාන්තාවන් ඉතාමත් කරුණාවෙන් සහ හොඳින් සලකනු. ඔවුන් නුඹලාගේ ගිවිසගත් සහකාරියන්ය. එලෙසම නුඹලා අකමැති අයවලුන් සමග ඔවුන් මිත්‍ර සම්බන්ධතා නොතබාගැනීම නුඹලා සතු අයිතියකි. එලෙසම ඔවුන් තම පතිවත රැකගැනීම නුඹලා සතු අයිතිවාසිකමකි.
ජනයිනි! සාවධානයෙන් සවන් දෙනු. අල්ලාහ්ව නමදිනු. පස් වේලේ සලාතය (නැමදීම) ඉටු කරනු. රමදාන් මාසයේ උපවාසයේ යෙදෙනු. සකාත් දානය දෙනු. හැකි නම් හජ් වන්දනාවේ යෙදෙනු.
සමස්ථ මිනිස් සංහතියම ආදම් සහ හවුවා නම් දෙදෙනාගෙන් බිහිවූවන්ය. මේ නිසා අරාබි ජාතිකයකු අරාබි නොවන ජාතිකයකුට වඩා උසස් නොවේ. එලෙසම යම් අරාබි නොවන ජාතිකයකු අරාබි ජාතිකයකුට වඩා උසස් නොවේ. සුදු ජාතිකයකු කළු ජාතිකයකුට වඩා උසස් නොවේ. එලෙසම කළු ජාතිකයකු සුදු ජාතිකයකුට වඩා උසස් නොවේ. යම් පුද්ගලයකු තවත් පුද්ගලයකුට වඩා උසස් වන්නේ ඔහුගේ සත්භාවය සහ යහ ගුණාංග තුළින් පමණි. සෑම මුස්ලිම්වරයකුම අනෙක් සෑම මුස්ලිම්වරයකුගේම සහෝදරයන් බවත් සමස්ථ මුස්ලිම් සංහතියම එක් සොයුරු ඛාණ්ඩයක් බවත් මතක තබාගනු. වෙනත් මුස්ලිම්වරයකුට අයත් කිසිදු වත්කමක් තවත් මුස්ලිම්වරයකුට නීත්‍යානුකූල නොවේ. මේ නිසා නුඹලා නුඹලාටම අසාධාරණකම් නොකරනු.
යම් දිනක අනිවාර්යයෙන්ම නුඹලා නුඹලාගේ ක්‍රියාවන් සම්බන්ධයෙන් අල්ලාහ් ඉදිරියේ පිළිතුරු දීමට සිදු වේ. මේ නිසා මා නික්ම යෑමෙන් පසුව නුඹලා යහ මාර්ගයෙන් පිට නොවනු. ජනයිනි! මාගෙන් පසුව කිසිදු වක්තෘවරයෙකු හෝ අල්ලාහ්ගේ දූතයකු හෝ නොපැමිණෙති. කිසිදු නව ආගමක් බිහි නොවෙති. මේ නිසා හොඳින් කරුණු විමසා බලා මා පවසන දේ හොඳින් තේරුම්ගනු. මා නුඹලා වෙත දේවල් දෙකක් තබා යන්නෙමි. කුරාණය සහ මාගේ සුන්නා (ක්‍රියාවන් සහ අවවාද). මේ දෙක අනුගමනය කරන්නන් කිසි දිනක වැරදි මාර්ගයට අවතීර්ණ නොවෙති.
මා මෙහි පැවසූ දෑ නුඹලා අනෙක් උදවියටද පවසවු. ඔවුන් ද අනෙක් උදවියට පවසවු. ඇතැම් විට අවසානයේදී මෙයට සවන් දෙන උදවිය පළමුව සවන් දුන් උදවියට වඩා හොඳින් මෙම කාරණා තේරුම් ගනීවි.
අවසානයේදී ඔහු ජනතාවගෙන් ජනයිනි! මා නුඹලාට මාගේ පණිවිඩය සත්‍ය ලෙස ගෙන හැර පෑවෙමි ද? යන්නෙන් ප්‍රශ්න කළේය. සියල්ලෝම අල්ලාහුම්ම නඅම් හෙවත් අල්ලාහ් ඔව් යන්නෙන් පිළිතුරු දිය.
එවිට ඔහු ඇඟිල්ල ඉහලට දික් කොට අල්ලාහ් මා නුඹගේ පණිවිඩය නුඹේ ජනතාව ඉදිරියේ පැවසූ බවට සාක්ෂි දරනු යන්නෙන් ප්‍රකාශ කළේය.
අල්ලාහ් මෙම අවස්ථාවේදී කුරාණ වාක්‍යයක් පහළ කළේය. එම වාක්‍යය නම්;
"අද දින නුඹලාගේ දහම නුඹලාට මම පරිසමාප්ත කර ඇත්තෙමි. තවද මාගේ දායාදයන් නුඹලා කෙරෙහි පරිපූර්ණ කර අත්තෙමි. නුඹලාට දහමක් ලෙස ඉස්ලාමය මම පිළිගත්තෙමි. (අල්කුර්ආණ් 5:3)
පසුව ඔහු හජ් වන්දනාවේ ඉතිරි චාරිත්‍ර සියල්ල අවසන් කොට මදීනාව බලා පිටත් විය. මෙම හජ් වන්දනාවේ චාරිත්‍ර එදා සිට අද දක්වා මුස්ලිම්වරු සෑම වසරක් පාසාම මක්කාවේ සිදු කරනු ලබයි.