ආබ්‍රහා නම් ඇබිසීනියානු රජු යෙමනය ආක්‍රමණය කළේය. ඉන් පසුව ඔහුට යම් විශේෂ සිදුවීමකට නෙත ගැටුනි. එනම් වාර්ෂිකව යෙමනය ඇතුළු සමස්ථ අරාබිකරයේම විශාල පිරිසක් වන්දනාමාන සඳහා මක්කාව බලා පිටත් වනු ඔහු දුටුවේය. මක්කාව නම් පාළු කාන්තාරයක හතරැස් හැඩයකින් යුතු පල්ලියක් මෙතරම් සෙනඟක් ආකර්ෂණය කිරීමෙන් විමතියට සහ ඊර්ෂ්‍යාවට පත් වූ ඔහු තම රටේ වර්ණවත් ගරුඬ සහ පාෂාණ වලින් සහ රන් රදී දොරටු වලින් සැදුම් ලත් අලංකාරවූ සුවිශාල වූ පන්සලක් ගොඩනගා වැඳුම් පිදුම් කිරීම පිණිස මහජනයා ආරාධනා කළේය. නමුත් ඒ වෙත පැමිණි පිරිස කිසිසේත්ම කාබාව හා සංසන්දනය කළ නොහැක. මේ අතර දිනක් එක් පුද්ගලයකු මෙම පන්සල තුළ මුත්‍රා කොට අපහාස කරන ලදි. මෙයින් කුපිතවූ ආබ්‍රහා කාබාව විනාශකිරීමට තීරණය කළේය. ඔහු ඇතෙක් සමග විශාල හමුදාවක් ඒකරාශී කොට මක්කාව බලා පිටත්විය. මෙම හමුදාවේ බලවත් භාවය දැකගත් මක්කා වැසියෝ බෙහෙවින් භීතියට පත්වී කාබාව රැකගැනීමට අපොහොසත් වීම හෙයින් අසරණ විය. මෙම අවස්ථාවේදී අබ්දල් මුත්තලීබ් නිර්භීතව ආබ්‍රහා දෙසට ගියේය. මොහු කාබාව බේරාගැනීමට ආයාචනා කිරීමට පැමිණෙතැයි සිතූ ආබ්‍රහා ගාම්භීර ලෙස කුමක්දැයි ඇසුවේය? ඊට පිළිතුරු දුන් අබ්දල් මුත්තලීබ් නුඹ මක්කා නගරයට ඇතුළුවන විට මාගේ ඔටුවන් සියලුදෙනා අත්පත් කර ගත්තෙහුය. මාගේ එම ඔටුවන් නැවත මට ලබාදෙන මෙන් ආයාචනා කරමි යනුවෙන් පැවසුවේය. මෙම පිළිතුරෙන් විමතියට පත්වූ ආබ්‍රහා මා මෙහි පැමිණියේ නුඹලාගේ සහ නුඹලාගේ මුතුන්මිත්තන්ගේ ශුද්ධවූ කාබාව විනාශකිරීමටයි. මේ බව දැන දැන නුඹ ඔටුවන් කිහිප දෙනෙකු පිළිබඳව ද විමසන්නේ යන්නෙන් ප්‍රශ්න කළේය. මීට පිළිතුරු දුන් අබ්දල් මුත්තලීබ් ඔටුවන්ගේ අයිතිකරු මමයි. මේ නිසා ඔවුන් ආරක්ෂාකිරීම මාගේ වගකීමය. කාබාවේ අයිතිකරු අල්ලාහ්ය. ඔහු එය ආරක්ෂා කරයි යනුවෙන් පවසා ඔහුගේ වැසියන් සමීපයට ගොස් මක්කා නගරයෙන් පිටවී කඳුකරය දෙසට ගමන් කරන ලෙස නියෝග කළේය.
උදෑසනම ආබ්‍රහා සහ හමුදාව ඇතාව සන්නාහයෙන් සරසා කාබාව විනාශ කිරීමට නික්ම ගියෝය. නමුත් එම අවස්ථාවේ ඇතා තම දණින් වැටුණි. සේනාව විසින් ඇතාව නැගිට්ටවීමට කෙතරම් උත්සාහ කළ ද ඔවුන්ගේ සියලු උත්සාහයන් ව්‍යර්ත විය. නමුත් යෙමනය දෙසට හෝ වෙනත් දිශාවකට ඇතා යොමු කළ විට ඌ නැගිට පිටත්වන්නට ලැහැස්ති විය. නැවතත් කාබාව දෙසට යොමු කළ විට ඌ දණින් වැටුණි. එක් වරම අහසින් කුරුල්ලන් විශාල සංඛ්‍යාවක් මතුවිය. සෑම කුරුල්ලකුම ගල් තුන බැගින් රැගෙන පැමිණ ආබ්‍රහාගේ හමුදාව මතට හෙලන ලදි. මෙම ගල් පතිතවූ හමුදාව විකා දමන ලද පිදුරුමෙන් පත්විය. මෙම සිදුවීම සිදුවූ ක්‍රි.ව 570 වර්ෂය ඇත් වර්ෂය ලෙස නම්විය.