යත්‍රිබ් නුවර අවුස් සහ කස්රජ් නමින් අරාබි ජාතික වංශ දෙකක් වාසය කළහ. මොවුන් මක්කා වැසියන් මෙන්ම බහු දේව වාදීන් වූ අතර එම නුවර විසූ යුදෙව් වාසීන් සමග ඔවුනට සම්බන්ධතා තිබුණි. නමුත් ඒක දේවවාදී යුදෙව් ජනතාව ඔවුන් අල්ලාහ් විසින් තෝරාගත් පිරිස බවට විශ්වාස කළ හෙයින් බහු දේවවාදීන් වූ අවුස් සහ කස්රජ් යන අරාබි වාංශිකයින් පිළිකුල් කළෝය. නමුත් අවුස් සහ කස්රජ් වාංශිකයින් එම ප්‍රදේශයේ බලවත් වීම හේතුවෙන් යම් වැදගත්කමක් ලබාදෙන්නට ඔවුන්ට සිදු විය. මේ හේතුවෙන් මෙම අරාබි වාංශිකයින් පිරිස ඇතැම් අවස්ථාවලදී මෙම යුදෙව්වන් විසින් පවසන ලදුව අනාගත වක්තෘ කෙනෙක් බිහිවන බව අසා තිබුණි. පවතින වාතාවරණය යටතේ මක්කාවේ අරාබි ජාතිකයකු විසින් තමන් වක්තෘ කෙනෙකු යැයි පවසන පුද්ගලයකු බිහිවී ඇති බවට අසන්නට ලැබීමෙන් යත්‍රීබ් වාසීන් තුළ දැඩි කුතුහලයක් ඇති විය. යුදෙව්වන්ගේ ආගම ගැන තරමක් හුරු පුරුදු වී සිටි බැවින් මුහම්මද් නබිතුමාගේ ආගම පිළිබඳව වැඩි විස්තර ඇසෙනවාත් සමග ඔවුන්ගේ කුතුහළය තවතවත් වැඩිවන්නට විය. පිළිගැනීමට අපහසු කාරණාවක් වන මරණයෙන් මතු නැගිටුවීම වැනි දෑ හි සත්‍යතාවය තහවුරු කරමින් වක්තෘවරයකු පැමිණෙනු ඇති බවට ඇතැම් යුදෙව් පූජකවරුන්ගෙන් ඔවුන් නිතර අසන්නට තිබුණි. නමුත් මෙම කාරණය පිළිබඳව මුලින්ම යත්‍රීබ් නුවරට ආරංචි වූයේ ඉබ්නූ අල් හයියාබීන් නම් සිරියාවේ සිට යත්‍රීබ් නුවරට දේශාන්තරණය කළ යුදෙව්වෙක් නිසාය. මෙම යුදෙව් ජාතිකයා විටින් විට යත්‍රිබ් නුවර නියඟය ඇතිවූ කල්හි අල්ලාහ්ට යාඥා කිරීමෙන් නැවත වර්ෂාව ලැබුණි. මෙම යහපත් පුද්ගලයා වසර කිහිපයකට පෙර අපවත්වීමට පෙර ඔහුට හිතවත් යුදෙව්වන් පිරිසක් වෙත ආන්දෝලනාත්මක පුවතක් හෙළිකළේය. යුදෙව්වනි! මා ආහාර පාණ වලින් සපිරුනු භූමියක් අත්හැර දමා බඩගින්න සහ දුක් කරදර වලින් සපිරුණු භූමියකට පැමිණීමට හේතුව කුමක්දැයි නුඹලා සිතන්නේද? අප නොදනිමු යැයි එම යුදෙව්වන් පිළිතුරු දුන් කල්හි, මා මෙම රටට පැමිණියේ අනාගත වක්තෘවරයකු මෙම රටට දේශාන්තරණය වන කාලය ළංව ඇති නිසා ඔහුගේ පැමිණීම අපේක්ෂාවෙනි යන්නෙන් පැවසුවේය. මාගේ කාළයේ ඔහුට සේවය කිරීමට හැකිවෙතැයි මා අපේක්ෂා කළ ද, ඔහුගේ කාලය නුඹලාට සමීප වී ඇත.
නමුත් සමස්ථයක් ලෙස ගත් කල්හි තත්ත්වය මෙසේය. අරාබි ජාතිකයින් වූ කල්හි, සැමගේ ආදරයට පාත්‍රවූ වැදගත් අරාබි පවුලකින් උපන් මුහම්මද් නිබතුමාට ඔවුන් කැමති වුවද ඔහු ගෙනා ඒක දේවවාදී පණිවිඩයට ඔවුන් අකමැති විය. ඊට හාත්පසින්ම වෙනස් ලෙස යුදෙව්වන් ඔහු ගෙනා පණිවිඩයට කැමති වුවද, එය ගෙනා පුද්ගලයා යුදෙව්වෙක් නොවූ හෙයින් එම පුද්ගලයාට අකමැති විය. කෙසේ වෙතත් මෙවන් පණිවිඩයක් රැගත් වක්තෘවරයකු පිළිබඳ තොරතුරු ආරංචි වූ කල්හි ඔවුන් තුළ දැඩි කුතුහළයක් ඇති විය. මෙම අරාබි ජාතික වක්තෘවරයා පිළිබඳ ආරංචි වීමෙන් යුදෙව්වන් තුළ ඇතිවූ මෙම කුතුහළය සහ එම ඒක දේවවාදී පණිවිඩය පිළිබඳව ආරංචි වීමෙන් මෙම කුතුහළය දස ගුණයක් වැඩි වන අන්දම දුටු අරාබි ජාතිකයින් දැඩි විමතියට පත්විය. අවුස් සහ කස්රජ් වංශ දෙකම මුහම්මද් නබිතුමාගේ බනු හාෂීම් වංශයේ ඥාතීන් බව ඔවුන් දැන සිටියහ.
කෙසේ වෙතත් මෙම අවස්ථාවේදී අවුස් සහ කස්රජ් වාංශිකයින් අතර දැඩි මතභේදමය වාතාවරණයක් මතුවී යුදමය තත්ත්වයක් දක්වා එය වර්ධනය වී තිබුණි. මෙම අවස්ථාව වන විට සටන් තුනක් අවසන් වී තිබුණි. තවත් විශාල සටනකට පෙරනිමිති පහළ වන්නට විය. මේ හේතුවෙන් අවුස් වංශයේ නායකයින් විසින් කස්රජ් වංශයට විරුද්ධව මක්කා නගරයේ කුරෙයිෂි වංශයේ නායකයින්ගෙන් උදව් පැතීමට කණ්ඩායමක් යවන ලදි.
ඔවුන් විසින් කුරෙයිෂි නායකයින්ගෙන් පිළිතුරක් අපේක්ෂා කරන අතරතුර මුහම්මද් නබි විසින් ඔවුන් හමුවී නුඹලා පැමිණි කාරණයට වඩා යහපත් දෙයකට නුඹලා කැමතිදැයි ඔහු ප්‍රශ්න කළේය. ඔවුන් ඒ කුමක්දැයි ප්‍රශ්න කළ විට ඔහු ඉස්ලාම් ධර්මය පිළිබඳව සියලු විස්තර අනාවරණය කොට පහළ වූ කුරාණ වාක්‍ය කිහිපයක්ද පාරායණා කර පෙණවුවේය. මේ සියල්ල අසා සිටි ඉයාස් බින් මුආද් නම් තරුණයෙක් මාගේ ජනයිනි! ඇත්තෙන්ම මෙය අප පැමිණි දෙයට වඩා විශිෂ්ඨයි යන්නෙන් පැවසුවේය. නමුත් එම කණ්ඩායමේ නායකයා ඔහුගේ මුහුණට වැලි ගසා අප පැමිණියේ මේ සඳහා නොව යන්නෙන් පැවසුවේය. කුරෙයිෂින් ඔවුන්ගේ ඉල්ලීමට පිටුපෑවෝය. පසුව එම අවුස් කණ්ඩායම නික්ම ගියෝය. ඉයාස් ටික දිනකින් අපවත් විය. ඔහුගේ සමීපතමයින් විසින් ඔහු අපවත් වන විට ඉස්ලාම් ආගම වැළඳගෙන සිටි බව පසු කළෙක හෙළි කරන ලදි.