වැදගත් පවුලකටදාව ඉපදු‍ණ ද අනාථයකු ව සිට කටුක ආරම්භයකට උරුමකම් කියූ මුහම්මද් තුමාට දැන් බොහෝ සැප සම්පත් සහ සමාජය තුළ ගෞරවනීය නාමයක් සහ පිළිගැනීමක් හිමි විය. නමුත් ඔහුගේ සමාජය තුළ ඇති අසාධාරණත්වය සහ වෙනත් ඔහු අනුමත නොකරන සිදුවීම් හේතුවෙන් ඔහුගේ සිතෙහි යම් කිසි කැළඹීමක් තිබෙන්නට ඇති. ඔහුගේ සිතෙහි මතු වූ ප්‍රශ්න වලට පිළිතුරු සොයාගැනීම පිණිස ඔහු බොහෝ විට එහි කන්දක් මත හීරා නම් ගුහාවකට ගොස් භාවනා කිරීමට පුරුදු වූවේය.
මෙසේ කාලයක් ඔහු තනිවම භාවනාවෙහි නිරතවෙමින් සිටි අතර ඔහුට වයස අවුරුදු හතලිහකදී පමණ දිනක මෙම ගුහාව තුළ මනුෂ්‍ය ස්වරූපය රැගත් මලායිකාවරයෙකු (මලායිකාවරු යනු දෙවියන් විසින් ඔහුට සේවය කිරීම පිණිස ආලෝකයෙන් නිර්මාණය කරන ලද තවත් ජීව විශේෂයකි) විසින් කියවන්න යැයි මුහම්මද් තුමාට අණ කරනු ලැබීය. එකවර මතු වූ මෙම පුද්ගලයාගේ නියෝගය හමුවේ බියට පත් වූ මුහම්මද් තුමා මා කියවන්න නොදනිමියි පැවසුවේය. එවිට එම මලායිකාවරයා මුහම්මද් තුමාව ඉතාමත් තදින් බදාගෙන අත්හැරීයේය. නැවතත් කියවන්න යැයි අණ කළේය. මා කියවන්න නොදනිමි යන්නෙන් ඔහු නැවතත් පිළිතුරු දුන්නේය. නැවතත් ඔහුව බදාගෙන අත්හැර කියවන්න යන්නෙන් අණ කළේය. නැවතත් ඔහු මා කියවන්න නොදනිමි යන්නෙන් පිළිතුරු දුන්නේය. තුන්වන වරටත් ඔහු මුහම්මද් තුමාව බදාගෙන අත්හැර පහත වාක්‍යයන් පැවසුවේය.
මුහම්මද් තුමා මලායිකාවරයා කියූ දෑ එලෙසම පාරායනා කළේය. මෙම වචන ඔහුගේ හදවතේ ලියවී තිබෙන ලද්දක් මෙන් ඔහුට හැඟුනි. ඔහුට යම් යක්ෂයකු අවේශ වුණාදැයි ඔහු තුළ සැකයක් ඇති විය. ඔහු දැඩි ලෙස භීතියට පත්ව කන්දෙන් පහළට දුවන්නට විය. දුවන අතරතුර එම්බල මුහම්මද්! නුඹ දෙවියන්ගේ පණිවුඩකරුවෙකි. මා ජිබ්‍රායිල් වෙමි යන්නෙන් ඔහුට සියලු දිශාවන්ගෙන් ශබ්දයක් ඇසුණි.
මුහම්මද් තුමා නිවසට දුව ගොස් ඔහුගේ බිරිඳ හට මාව වසන්න. මාව වසන්න යැයි පවසා හාන්සි විය. කතීජා විසින් හණිකට කබායක් රැගෙනවිත් මුහම්මද් තුමාව ආවරණය කරන ලදි. පසුව මුහම්මද් නබිතුමා තරමක් යථා තත්ත්වයට පත් වූ විට, සිදු වූ සියල්ල කතීජා හට ඔහු විස්තර කළේය. ඇය සියල්ල අසා මුහම්මද් නබිතුමාට සැනසුම් වචන කිහිපයක් පවසා ඇගේ ඥාති සහෝදරයෙක් වූ වයසක නිසා දෑස් නොපෙණෙන වරකා බින් නවුෆල් නම් විද්වතා වෙත ගොස් සිදුවූ සියල්ල විස්තර කළාය. සියල්ල සාවදානයෙන් සවන් දුන් ඔහු ශුද්ධ දෙයක්! ශුද්ධ දෙයක්! යන්නෙන් හඬ නැගුවේය. වරකාගේ ආත්මයේ හිමිකරුගේ නාමයෙන් දිවුරා පවසමි. මුහම්මද් වෙත පැමිණියේ මෝසස් වෙත පැමිණි එම විශිෂ්ඨතම නාමුස් ය. (නෝමොස් යනු ග්‍රීක වචනයක් වන මෙහි තේරුම පණිවුඩ රැගත් සුරදූතයා යන්නයි). මුහම්මද් යනු මිනිසුන්ගේ (නබි) වක්තෘවරයෙකි. ඔහුට සුභ පතන්න යන්නෙන් පැවසුවේය. මේ පිළිබඳව කතීජා මුහම්මද් නබිතුමා වෙත ගොස් පැවසුවාය. මෙයින් සැනසුනු මුහම්මද් නබිතුමා සුපුරුදු පරිදි හිරා ගුහාව වෙත ගොස් භාවනා කළේය.
නමුත් මාස හයක පමණ කාලයකට නැවතත් කිසිදු සිදුවීමක් සිදූ නොවූ අතර ඔහු අල්ලාහ් කෙරෙහි යම් වරදක් කළා දැයි ඔහු සිතන්නට විය. නමුත් එම සිතුවිල්ල අසත්‍ය කරමින් කළකට පසු නැවත නැවතත් ජිබ්‍රායිල් විසින් මුහම්මද් නබිතුමා හට කුරාණ වාක්‍යයන් ක්‍රමක්‍රමයෙන් පහළ කරන ලදි. පසුව අල්ලාහ්ට වන්දනමාන කරන අයුරු කියා දෙන ලදි. මේ සියල්ල මුහම්මද් නබි තුමාණන් ඔහුගේ බිරිඳ වන කතීජාට කියා දුන්නේය. පසුව ඔහුට අල්ලාහ් පහළ කරන ලද මෙම අනාවරණයන් පිළිබඳව ඔහුගේ ඥාති සොයුරා වන අලි, පුතකු ලෙස හදා වඩා ගත් සෙයිද් සහ ඔහුගේ හොඳ මිත්‍රයකු වූ තයිම් ගෝත්‍රයේ අබූ බක්කර් වෙත අනාවරණය කළේය. ඔවුන් සියලු දෙනා මුහම්මද් නබිතුමාව කිසිදු පැකිළීමකින් තොරව පිළිගෙන ඉස්ලාම් දහම වැළඳ ගත්තෝය. අලි මෙම අවස්ථවේ වයස අවුරුදු දහයකි. සෙයිද් වහලකුව සිටි බැවින් ඔහුට මක්කාවේ කිසිදු පිළිගැනීමක් තිබුනේ නැත. අබූබක්කර් හට මක්කාවේ හොඳ පිළිගැනීමක් තිබුණි. මුහම්මද් නබිතුමාට කෙමෙන් කෙමෙන් කුරාණ වාක්‍ය පහළ වෙමින් තිබුණි. නමුත් තවම ඉස්ලාම් ආගම පිළිබඳව ප්‍රසිද්ධියේ කථා නොපැවැත්වූ අතර රහස්‍ය ලෙස මුහම්මද් නබිතුමාගේ ළඟම හිතවතුන් සහ හිතවතුන්ගේ ළඟම හිතවතුන් දහ පහලොස්දෙනෙකු පමණ මේ වන විට ඉස්ලාම් ආගම වැළඳගෙන සිටියහ. ඔහුව හදා වඩාගත මාමා අබූ තාලිබ් ඔහුගේ පුතුන් වන අලි සහ ජාෆර් ඉස්ලාම් ආගම වැළඳගැනීම පිළිබඳව කිසිදු විරුද්ධත්වයක් පළ නොකළ නමුත් ඔහු ඔහුගේ මුතුන්මිත්තන්ගේ විශ්වාසයන් අත්හැරීමට එකඟ නොවීය. ඔහුගේ අනෙක් මාමාවරු තිදෙනාගෙන් අබ්බාස්, මුහම්මද් නබිතුමා කියූ දෑ ගණන් ගැනීමට අකමැති වූ අතර හම්සාට ඔහු කියූ දෑ කිසිවක් තේරුම් ගැනීමට නොහැකි විය. කෙසේ වෙතත් මොවුන් දෙදෙනාම මුහම්මද් නබිතුමාට ආදරය කළහ. නමුත් අබූ ලහබ් ඔහුගේ බෑනා උමතු වී ඇති බව පැවසුවේය.
කළකට පසුව අල්ලාහ් විසින් මුහම්මද් නබිතුමාට ඔහුගේ පවුල සහ ඥාතීන්ට ඉස්ලාම් දහම පිළිබඳව අවවාද කරන ලෙස අණ කරන ලදි. මේ අනුව මුහම්මද් නබිතුමා අලි වෙත මේ බව පවසා කෑම වේලක් පිලියෙළ කර ඥාතීන් සියලු දෙනා ආරාධනා කරන ලෙසට උපදෙස් දුන්නේය. මේ අනුව දිනක් ඥාතීන් හතලිස් දෙනෙකු පමණ මුහම්මද් නබිතුමාගේ නිවසේ ආහාර වේලක් සඳහා ඒකරාශී විය. එක් පුද්ගලයකුට පමණක් ප්‍රමාණවත් වූ මෙම ආහාරය සියලු දෙනා විසින්ම ඇති වන තෙක් අනුභව කර අවසන් කළ නමුත් ආහාරවල කිසිදු අඩුවීමක් සිදුනොවීය. සියල්ලෝම ආහාර පාන අනුභව කර අවසන් කළ විගස මුහම්මද් නබිතුමා නැගිට ඔවුන් අමතා කථාකිරීමට සැරසුනු විට අබූ ලහබ් එයට හරස් වී නුඹේ සත්කාරය නුඹව වශී කර ඇත යනුවෙන් පවසා සියල්ලන්වම පිටමං කළේය. පරමාර්ථය ඉෂ්ඨ කරගත නොහැකිවීම හේතුවෙන් නැවතත් ඊළඟ දිනයේදී ද මුහම්මද් නබිතුමා විසින් එලෙසම අලි වෙත ආහාර පිලියෙළ කොට සියල්ලන්ව ආරාධනා කරන ලෙසට දැනුම් දුන්නේය. මේ අනුව නැවතත් ඔවුන් සියල්ලෝම පැමිණ පෙර පරිදිම ආහාර පාණ අනුභව කිරීමෙන් අනතුරුව කිසිවකු හරස්වීමට පෙර මුහම්මද් නබිතුමා විසින් ඔවුන් ආමන්ත්‍රණය කර මෙසේ පැවසුවේය.එම්බල අබ්දල් මුත්තලිබ්ගේ දරුවණි! මාගේ පණිවිඩයට වඩා උසස් පණිවිඩයක් රැගෙන පැමිණි වෙනත් කිසිදු අරාබි ජාතිකයකු මා නොදනිමි. මා ඔබට මෙලොව මෙන්ම පරලොව ද විශිෂ්ඨතම දෑ ලබා දෙන්නෙමි. අල්ලාහ් විසින් නුඹලාව ඔහු වෙතට කැඳවීමට මා හට නියෝග කර ඇත. මේ සඳහා මා හට උදව් කර මාගේ සොහොයුරා සහ මාගෙන් පසුව මෙම කාර්යය ඉදිරියට රැගෙන යාමට ඉදිරිපත් වන්නේ නුඹලා අතුරෙන් කවරෙහු ද? සියල්ලෝම නිශ්ෂබ්ද වූහ. ටික වේලාවකට පසු දැන් වයස අවුරුදු දහතුනක්ව සිටි අලි නැගිට අල්ලාහ්ගේ නබි තුමනි! මා නුඹට මේ කාර්යයේ උදවු කරමියි පැවසුවේය. මොහු නුඹලා අතුරින් මාගේ සොහොයුරා, මාගේ කාර්යය ක්‍රියාත්මක කරන්නා සහ මගෙන් පසුව මෙම කාර්යය ඉදිරියට රැගෙන යන්නාය. මොහුට සවන් දී මොහුව අනුගමනය කරන්න යන්නෙන් ඔහු පැවසුවේය. එහි සිටි සියල්ලෝම නැගිට සිනාසෙමින් අබූ තාලිබ්, නුඹේ පුතාට ඇහුම්කන් දී ඔහුව අනුගමනය කරන ලෙස නුඹට මොහු නියෝග කර ඇත යනුවෙන් පවසා නික්ම ගියෝය.
ආරම්භයේදී මුහම්මද් නබිතුමා ගේ ආගම පිළිබඳ හරි හැටි දැනුමක් මක්කා වැසියන්ට නොතිබුණු අතර කල් යත්ම මෙම ආගම ඔවුන් ඇදහූ දෙවිවරුන්ට තර්ජනයක් බව ඔවුනට වැටහෙන්නට විය. මේ හේතුවෙන් ඔවුන් එවක මක්කාවේ ප්‍රධාන පුරවැසියකු වූ අබූතාලිබ් වෙත ගොස් දෙවිවරුන්ගේ නාමයෙන් අප අපගේ මුතුන්මිත්තන්ගේ විශ්වාසයන් අපහාසයට ලක්වන්නටත් අපගේ සංස්කෘතිය සමච්චල් කරන්නටත් අපගේ දෙවිවරුන්ට නින්දා කරන්නටත් ඉඩ නොදෙන්නෙමු. මේ නිසා නුඹ නුඹගේ සොහොයුරාගේ පුත් මුහම්මද්ව නතර කරවු. නැතිනම් අප නුඹලා දෙදෙනා සමගම සටන් කරන්නෙමුයි පැවසුවෝය. මේ සම්බන්ධයෙන් මුහම්මද් නබිතුමා පැමිණි පසු අබූ තාලිබ් ඔහුව අමතා, මාගේ සොහොයුරාගේ පුතාණනි!. මාව සහ නුඹව මෙම අපහසු කාර්යයෙන් අත් හරිනු. මා හට දරාගන්නට බැරි අපහසුතාවයක් මා හට නොපටවනු යන්නෙන් පැවසුවේය. ඊට මුහම්මද් නබිතුමා, මා අල්ලාහ් මත දිවුරා පවසන්නෙමි. මාගේ දකුණු අතට හිරු සහ වම් අතට සඳු ගෙනත් තැබුවද මා මෙම කර්තව්‍යය ජයග්‍රහණය කරන තුරු හෝ කර්තව්‍යයෙන් වැනසෙන තුරු නතර නොකරමි යන්නෙන් පැවසුවේය. දුක්ඛිත ලෙස එතනින් පිටවනවාත් සමග අබූතාලිබ් විසින් ඔහු අමතා, නුඹ ඕනා දෙයක් ගොස් පවසවු. අල්ලාහ් මත දිවුරා පවසමි මා නුඹව අත්හරින්නේ නැත යන්නෙන් පැවසුවේය.
අබූතාලිබ් සමග සංවාදයෙන් කිසිදු ප්‍රතිඵලයක් අත් නොවූබව වැටහීමෙන් බොහෝ සෙයින් කුපිත වුවද, මුහම්මද් නබිතුමා බනූහාෂිම් වංශයේ නායකයාව සිටි අබූතාලිබ්ගේ ආරක්ෂාව යටතේ සිටි හෙයින් කිසිවක් කරගැනීමට නොහැකිවිය. නමුත් තත්ත්වය බොහෝ බරපතළ විය. මන්ද යත් මුළු අරාබියෙන්ම බැතිමතුන් වන්දනාව පිණිස මක්කාව බලා පැමිණෙන කාලය ළං වී ඇත. නමුත් මෙම වර්ෂයේ මක්කාවට පැමිණෙන බැතිමතුන් හට මුහම්මද් නබි තුමා සහ ඔහුගේ පිරිස විසින් ඔවුන්ගේ දෙවි වරුන්ට නින්දා අපහාස කර නව ආගමක් පිළිබඳව දන්වනු ලැබේ. බැලූ බැල්මට මෙයින් බොහෝ හාණිකර ප්‍රතිඵල ඇත. මෙයින් බොහෝ බැතිමතුන් මක්කාවට පැමිණීමෙන් වැලකී වෙළෙඳාමට බාධා පැමිණෙනු ඇත. මේ හේතුවෙන් ඔවුන් මෙයට පිළියමක් සෙවීම පිණිස කුරෙයිෂි වංශ නායකයින් විසින් රැස්වීමක් කැඳවා එහි සිටි බලවත් නායකයකු වන වලිද් බින් මුගීරාගෙන් අදහස් විමසන ලදි. මේ අනුව පැමිණෙන බැතිමතුන් වෙත මුහම්මද් යනු මව පියාගෙන් සහ දරුවන් දෙමව්පියන්ගෙන් වෙන් කිරීමේ බලයක් ඇති බලවත් මන්තර කාරයකු බවත් ඔහුගෙන් ඈත්ව සිටින ලෙසටත් අවවාද කිරීමට තීරණය කළහ. මේ අනුව මක්කා නගරයට ඇතුළුවන සියලු පාරවල් වල මෙසේ වන්දනාකරුවන්ට අවවාද කිරීමට පිරිස් යොදවන්නට තීරණය විය. මේ අනුව මුහම්මද් නබිතුමා පිළිබඳව යහ අයුරින් හෝ අයහපත් අයුරින් සහ ඔහුගේ අභිප්‍රාය පිළිබඳව සෑම දිශාවකටම ආරංචිවන්නට විය.