ඒබ්‍රහම්
ඒබ්‍රහම් පිළිබඳව බයිබලයේ මෙන්ම කුරාණයේද බොහෝ කාරණා අඩංගුව ඇත. බයිබලයට අනුව ඒබ්‍රහම්ගේ පියා ටේරා නම් වන අතර කුරාණයේ ඔහුගේ පියා අසාර් ලෙස හඳුන්වයි. ඒබ්‍රහම්ට නාහොර් සහ හාරන් නමින් සහොදරයින් දෙදෙනෙකි. මොවුන් ජේසුස් ඉපදීමට වර්ෂ 2166 ක පමණ කාළයකට පෙර පුරාණ මෙසපොටේමියාවේ නව බග්ඩාඩ් නගරයට ගිනිකොන දෙසින් පිහිටි උර් නම් ප්‍රාන්තයේ ජීවත් වූ බව ඇසත්මේන්තු කර ඇත. හාරන්ගේ පුත් ලොට් සහ ඒබ්‍රහම් ඉතාමත් සමීප හිතවතුන් බව වැටහේ. මෙම කාළයේ උර් ප්‍රන්තයේ ජනතාව බහුදේවවාදීන් වූ බව පුරා විද්‍යාත්මක සාධක මගින් තහවුරු වී ඇත. මෙම ස්ථානයේ මෙම කාළ වකවානුවේ නිර්මාණය කරන ලද විශාල පන්සලක් අදටත් දැකිය හැක.
ඒබ්‍රහම් සාරා නම් කාන්තාවක් විවාහ කරගන්නා ලදි. නමුත් බොහෝ කාලයක් මොවුන් දෙදෙනා හට දරුවකු නූපන් අතර ඒබ්‍රහම් විසින් ඔහුගේ බිරිඳ සාරාගේ මෙහෙකාරියක් වන හාජර් සමගද විවාහ විය. ඒබ්‍රහම් සහ හාජර්ට දාව ඉෂ්මායිල් නම් දරුවා උපන් අතර ඒබ්‍රහම් සහ සාරාට දාව අයිසාක් නොහොත් ඉස්හාක් උපන්හ. අයිසාක්ගේ පරම්පරාවෙන් බොහෝ වක්තෘෘවරුන් උපන්හ. ජේසුස්ද අයිසාක්ගේ පරම්පරාවෙන් පැවත ආ අයෙකි. නමුත් ඉෂ්මායිල්ගේ පරම්පරාවෙන් පැවත ආ එකම වක්තෘෘ මුහම්මද්ය.
ඒබ්‍රහම් පිළිබඳ මෙවන් බොහෝ කරුණු බයිබලයේ සඳහන්ව ඇති නමුත් මෙම කාරණා බොහෝමයක් පැහැදිළි නොවන අතර ඇතැම් කාරණා එකිනෙකාට පටහැනි ලෙස පැවසේ.
නමුත් ඉස්ලාම් ආගමේ මූලික ග්‍රන්ථය වන කුරාණයේ ඒබ්‍රහම් පිළිබඳව ඉතාමත්ම පැහැදිළි කුතුහලය ජනිත කරවන කාරණා රැසක් අගනාලෙස විස්තර කර ඇත. මේ නිසා අප මුළින්ම කුරාණයට අනුව ඒබ්‍රහම් යනු කවුදැයි දැනගැනීම වටී.
කුරාණයේ ඒබ්‍රහම්
ශුද්ධවූ කුරාණයේ ඒබ්‍රහම් පිළිබඳ බොහෝ කාරණා සඳහන්ව ඇති නමුත් ඔහුගේ ජීවිතයේ සිදුවූ ඉතාමත්ම වැදගත් සිදුවීම් 3ක් ඉතාමත් අලංකාර ලෙස විස්තර කර ඇත. එනම්
- ඒබ්‍රහම් තම ඥාතීන් සහ වැසියන් සමඟ ඇතිකරගත් ආරවුල
- ඒබ්‍රහම්ගේ නිවසට සුභ ආරංචිය ගෙන ආ අමුත්තන්ගේ කථාව
- ඒබ්‍රහම්ගේ පරීක්ෂණය
ඒබ්‍රහම් සහ ඔහුගේ ජනතාව
ඒබ්‍රහම් කුඩා කළ සිට ඉතාමත්ම තර්කාණුකූල සිතුවිළි ඇති පුද්ගලයෙකි. මේබව පහත කුරාණ වැකි අනාවරණය කරයි.
ඔහු තම පියාහට මාගේ පියාණෙනි! අසන්නටවත් බලන්නටවත් නොහැකි ඔබට කිසිදු ප්‍රයෝජනයක් නොමැති දෙයකට ඔබ වැඳුම් පිඳුම් කරන්නේ ඇයි දැයි ප්‍රශ්ණ කළ අයුරු සිහිකරන්න. (අල්කුරාණ් 19 - 43)
එවිට ඔහුගේ පියා එම්බල ඉබ්‍රාහීම්! නුඹ මාගේ දෙවිවරු ප්‍රතික්ෂේප කරන්නේද? නුඹ මෙයින් නොවැලකුනහොත් නියතවශයෙන් මම නුඹව ගල් ගසා මරා දමමි. මේ නිසා වහාම මාගෙන් අෑත්වන්න යැයි පැවසූහ. (අල්කුරාණ් 19 - 46)
ඔහු වටා රෑ බෝවූකල්හි ඔහු තරුවක් දුටුවේය. මෙය මාගේ අධිපතියානන් යැයි ඔහු කීය. නමුත් එය බැසයත්ම මම බැසයන දෑ ප්‍රිය නොකරමියි පැවසූහ. (අල්කුරාණ් 6 - 77)
තවද ආලෝකය පතුරුවමින් සඳ පායනු දුටු කල්හි මෙය මාගේ අධිපතියන් යැයි පැවසූහ. නමුත් එය බැස ගිය විට මාගේ අධිපතියානන් මාහට මග නොපෙන්වුවහොත් මා ද නිසැකවම නොමග යනු ඇතැයි පැවසූහ. (අල්කුරාණ් 6 - 78)
ආලෝකය පතුරුවමින් හිරු උදාවත්ම මෙයයි මාගේ අධිපති, මෙය ඉතාමත් විශාලයැයි පැවසූහ. නමුත් එය බැස ගිය විට එම්බල ජනයිනි! නුඹලා දෙවියන්ට සමානව තබන දැයින් මම බැහැර වෙමියි පැවසූහ. අහස් සහ පොළව මැවූ ඔහු වෙත මම නැඹුරු වෙමි. තවද අල්ලාහ හැර වෙනත් දෑ නමදින්නවුන්ගෙන් මම බැහැර වෙමියි පැවසූහ. (අල්කුරාණ් 6 - 79-80)
ඔහුගේ ජනතාව ඔහු සමඟ තර්ක කළ විට දෙවියන් මට යහ මග පෙන්වා දී තිබියදීත් නුඹලා මා සමඟ දෙවියන් පිළිබඳව තර්ක කරන්නේදැයි ප්‍රශ්ණ කළහ. නුඹලා අල්ලාහ්ට සමාන කරන දෙවියන් හට මම බිය නොවෙමි. මාගේ දෙවියන්ගේ අභිමතයෙන් තොරව ඔවුන් මාහට කිසිදු හානියක් සිදු කළ නොහැක. මාගේ දෙවියන් සියළු දෑ පිළිබඳව අවබෝධයෙන් යුක්තය. ඔබලා මේ පිළිබඳව නොසිතන්නේද? (අල්කුරාණ් 6 - 81)
සර්ව බලධාරී දෙවියන්ගේ අනුබලයෙන් තොරව නුඹලා ඔහුට වෙනත් අය සම කිරීමෙන්ද බිය නොවන කල්හි, මා හට කිසිදු හාණියක් සිදුකළ නොහැකි නුඹලාගේ දෙවිවරුන් හට මා බිය වෙමිද? එහෙයින් ආරක්ෂාව ලැබීමට වඩාත් හිමිකම් ඇත්තේ අප දෙපාර්ශවයෙන් කාහටද? නුඹලා දන්නවානම්? (අල්කුරාණ් 6 - 82)
දිනක් ඔහු නුඹලා මෙතරම් ඇප කැප වන මෙම පිළිමයන් මොනවාදැයි තම පියා සහ ඔහුගේ ජනයින්ගෙන් ඇසූකල්හි ඔවුහු අපගේ පියවරුන්ද මේවාට වඳිනු අප දුටුවෙමුයි පිළිතුරු දුන්හ. (අල්කුරාණ් 21 - 52 - 54)
ඊට ඔහු ඇත්තෙන්ම නුඹලා සහ නුඹලාගේ පියවරුද වැරදි මාර්ගයේ වූවෝය යැයි පැවසුවේය. (අල්කුරාණ් 21 - 52 - 55)
ඊට ඔවුහු නුඹ අපට සත්‍යය පවසන්නෙද? නැතිනම් විහිළු කාරයෙක්දැයි ප්‍රශ්ණ කළහ. (අල්කුරාණ් 21 - 56)
නැත. නුඹලාගේ අධිපති අහස් සහ පොළොවේ අධිපතියාණන් වන අතර මේවායේ මැවුම්කරු ඔහුමය. මම ඊට සාක්ෂි දරන්නෙක්මියි පිළිතුරු දිය. (අල්කුරාණ් 21 - 57)
තවද මා අල්ලාහ් මත දිවුරා පවසන්නෙමි නුඹලා නැති විටෙක මා මේ ප්‍රතිමාවන් විනාශ කිරීමට සැලසුම් කරන්නෙමියි පැවසූහ. (අල්කුරාණ් 21 - 58)
දිනක් ඔහු එහි ප්‍රධාන පිළිමය හැර අනෙක් සියළු පිළිම විනාශකර දැමීය. (අල්කුරාණ් 21 - 59)
අපගේ දෙවිවරුන්ට මෙසේ කළේ කවුරුන්දැයි ඔවුන් ප්‍රශ්න කළහ. මෙය කළ පුද්ගලයා සැබවින්ම වැරදි කරුවෙකි යැයි පැවසූහ. (අල්කුරාණ් 21 - 60)
ඉබ්‍රහීම් නම් තරුණයක් මේවා ගැන විරුද්ධව කථාකරනු අපට ඇසුණි. (අල්කුරාණ් 21 - 61)
අපට දැකීම පිණිස ඔහුව අප ඉදිරියට ගෙන එනු යන්නෙන් ඔවුහු අණ කළහ. (අල්කුරාණ් 21 - 62)
එම්බල ඉබ්‍රාහීම්, අපගේ දෙවිවරුන්ට මෙසෙ කළේ නුඹදැයි ඔවුන් විමසීය. (අල්කුරාණ් 21 - 63)
නැත. මොවුන්ගෙන් අර ලොකු ප්‍රථිමාව මෙසේ කළේය. ඔහුට කථා කළ හැකි නම් ඔහුගෙන් අසනු යන්නෙන් ඔහු පිළිතුරු දිය. (අල්කුරාණ් 21 - 64)
ඊට ඔවුන් තම පිරිස හමුවේ ඇත්තෙන්ම වැරදිකරුවන් තමුන්ය යන්නෙන් පැවසූහ.(අල්කුරාණ් 21 - 65)
ඉබ්‍රාහීම්ගේ පිළිතුර හමුවේ ලැජ්ජාවෙන් හිස පහත දැමූ ඔවුන් නැවත වරක් ඉබ්‍රහීම් හමුවේ නුඹ දැන සිටියා මොවුන්ට කථාකරන්නට බැරි බව යැයි පැවසූහ. (අල්කුරාණ් 21 - 66)
එසේ නම් නුඹලා අල්ලාහ් හැර නුඹලාට යහපතක් හෝ අයහපතක් කරන්නට නොහැකි දෑට නමස්කාර කරන්නෙහුදැයි ඇසීය. (අල්කුරාණ් 21 - 67)
නුඹලා සහ නුඹලාගේ දෙවි වරුන්ට (උෆ්) යැයි අවමන් කර නුඹලා තවමත් තේරුම් නොගන්නේදැයි ඇසීය. (අල්කුරාණ් 21 - 68)
ඊට එම වැසියෝ නුඹලා මීට යමක් කිරීමට අදහස් කරන්නේ නම් ඔහුව පුළුස්සා නුඹලාගේ දෙවිවරුන්ට උදවු වනු යැයි පැවසූහ. (අල්කුරාණ් 21 - 69)
ඊට අප (අල්ලාහ්) අහෝ ගින්න සිසිල්වී ඉබ්‍රාහීම්ට ආරක්ෂාව දෙනු යන්නෙන් ගින්නට අණ කළෙමු. (අල්කුරාණ් 21 - 70)
ඔවුන් ඔහුට තවත් හාණි පමුණුවන්නට අවශ්‍ය කළ නමුත් අප ඔවුන් පරාජයට පත් කළෙමු. (අල්කුරාණ් 21 - 71)
ඒබ්‍රහම්ගේ අමුත්තන්
මෙම විශිෂ්ඨ කතාන්තරය පිළිබඳව බයිබලයේද යම් කරුණු සඳහන්ව ඇති නමුත් බයිබලයේ විවිධ ස්ථාන වල මේ පිළිබඳව අතැමි කාරණා නොගැලපීම හේතුවෙන් සමස්ථ කතාන්තරයම කුරාණය ඇසුරින් පළමුව බලා පසුව බයිබලයේ මෙම කතාන්තරයි පිළිබඳව පවසා ඇති දෑ විමර්ෂණය කරමු.
තවද නියත වශයෙන්ම අපගේ දූතයින් ඉබ්‍රාහීම් වෙත පැමිණියහ. ඔබට සාමය පතමූයි ඔවුහු පැවසූහ. ඔබටද සාමය පතමීයි ඔහු පළිතුරු දිය. එවිට ඔහු හදිසියේ ගොස් පිළිස්සූ වසුපැටවකු අමුත්තන්ගේ කෑම පිණිස රැගෙන ආවේය. (අල්කුරාණ් 11 - 70)
නමුත් ඔවුන්ගෙන් කිසිවකුගේ අත් එම ආහාරය දෙසට යොමු නොවනු දැකීමෙන් ඔහුට එම අමුත්තන් කෙරෙහි සැකයක් ඇතිවී බියට පත්විය. එවිට ඔවුහු බිය නොවන්න. අප ලොට්ගේ ජනතාව කෙරෙහි එවන ලද්දෙමුයි පැවසූහ. (අල්කුරාණ් 11 - 71)
සමීපයේ සිටි ඔහුගේ බිරිඳ එවිට සිනාසුනි. එවිට අප ඇයට අයිසාක් පිළිබඳවද පසුව ජේකොබ් පිළිබඳවද සුභාරංචි දුන්නෙමු. (අල්කුරාණ් 11 - 72)
අහෝ මාගේ දුක! මා මහළු ස්ත්‍රියකි. මාගේ සැමියාද මහළු මනුස්සයෙකි. මා කෙසේ දරුවකු පිළිසිඳගනිමිද? ඇත්තෙන්ම මෙය පුදුමාකාර දෙයකියි ඇය පැවසුවාය. (අල්කුරාණ් 11 - 73)
ඊට ඔවුන් නුඹ දෙවියන්ගේ නියමය ගැන පුදුමවන්නෙහිද? එම්බල පවුලේ වැසියනි! අල්ලාහ්ගේ දයාව සහ ඔහුගේ ආශිර්වාදය ඔබලාට අත්වේවා. ඇත්තෙන්ම ඔහු සියළු ප්‍රශංසාවන්ට හිමිකරුය. තේජවන්තය යැයි පැවසූහ. (අල්කුරාණ් 11 - 74)
ඒබ්‍රහම්ගේ බිය පහවගොස් සුභාරංචිය ලද පසුව ඔහු ලොට් ගේ ජනතාව (සොඩොම් සහ ගොමෝරා) සම්බන්ධයෙන් ආයාචනා කරන්නට විය. (අල්කුරාණ් 11 - 75)
ඇත්තෙන්ම ඒබ්‍රහම් ඉතාමත්ම ඉවසිලිවන්තයකු මෙන්ම නිතර දෙවියන්ගෙන් ක්ෂමාව අයැදී දෙවියන් දෙසට හැරෙන්නෙකුද විය. (අල්කුරාණ් 11 - 76)
එම්බල ඉබ්‍රාහීම්! මෙම ආයාචනයෙන් වලකින්න. ඔබගේ අධිපතියාණන්ගේ විධානය පැමිණ හමාරය. නියත වශයෙන්ම නොවැලැක්විය හැකි දඬුවමක් ඔවුන් කෙරෙහි පැමිණෙනු ඇත. (අල්කුරාණ් 11 - 77)
මෙම අවස්ථාව පිළිබඳව බයිබලයේ සඳහන් වන්නේ මෙසේය.
ශුද්ධවූ බයිබලය - උත්පත්ති 18 (Genesis 18)
- ඔහු දවාලේ ග්‍රීෂ්ම වේලාවේ කූඩාරමේ දොරකඩ හිඳින කල ස්වාමීන්වහන්සේ මම්රේගේ ආලොන් ගස් ළඟදී ඔහුට පෙනුණුසේක;
- ඔහු ඇස් ඔසවා බැලීය, බලව, මනුෂ්‍යයන් තුන්දෙනෙක් ඔහු ඉදිරියෙහි සිටියෝය. ඔහු ඔවුන් දුටු විට ඔවුන් සම්මුඛවන පිණිස කූඩාරමේ දොරකඩ සිට දිවගොස් බිමට නැමී:
- මාගේ ස්වාමීනි, ඔබ ඉදිරියෙහි දැන් මම කරුණාව ලැබුයෙම්නම් ඔබගේ මෙහෙකරුවා කෙරෙන් අහක්ව නොයන ලෙස ඉල්ලමි.
- පැන් ටිකක් ගෙනෙන්ට ඉඩ දී ඔබවහන්සේලාගේ පාද සෝදා, ගස යට පහසුගත මැනව.
- ඔබවහන්සේලාගේ සිත් ශක්තිමත් කරගන්න පිණිස මම කෑම ටිකක් ගෙනෙන්නෙමි; පසුව ඔබවහන්සේලාට යත හැකිය. මක්නිසාද ඔබවහන්සේලා තමන් මෙහෙකරුවා වෙතට ආවේ ඒ පිණිසයයි කීය. ඔව්හුද: ඔබ කී ලෙස කරන්නැයි කීවෝය.
- එවිට ආබ්‍රහම් කූඩාරමේ සිටි සාරා වෙතට යුහුව ගොස්: සිහින් පිටි නැළි තුනක් ඉක්මනින් සූදානම්කොට අනා රොටි සාදන්නැයි කීය.
- ආබ්‍රහම් ගව රැළට දිවගොස් ළපටි හොඳ වස්සෙකු ගෙනවුත් මෙහෙකරුවාට දුන්නේය; ඔහු ඌ ඉක්මනින් පිළියෙළකෙළේය.
- ඔහු වෙඬරු හා කිරිද පිළියෙළකළ වස්සාද ගෙනවුත් ඔවුන් ඉදිරියෙහි තබා ගස යට ඔවුන් ළඟ සිටියේය; ඔව්හුද කෑවෝය.
- ඔබේ භාර්යාවවූ සාරා කොතැන්හිදැයි ඔව්හු ඔහුගෙන් ඇසුවෝය.
- කූඩාරමෙහියයි ඔහු කීය. එවිට උන්වහන්සේ: සැබවින්ම එන අවුරුද්දේ නියම කාලය පැමිණි විට මම ඔබ වෙතට නැවත එන්නෙමි; බලව, ඔබේ භාර්යාවවූ සාරා පුත්‍රයෙකු ලබන්නීයයි කීසේක. උන්වහන්සේට පස්සෙන් තිබුණු කූඩාරම් දොරකඩදී සාරාට ඒ ඇසුණේය.
- ආබ්‍රහම්ද සාරාද මහලුව වයෝවෘද්ධව සිටියෝය; ස්ත්‍රීන්ට ඇති නියමය සාරා පිළිබඳව නැවතී තිබුණේය.
- සාරා සිත තුළ සිනාසී: මා වයෝවෘද්ධ වූවායින් පසුත් මාගේ ස්වාමියා මහලුව සිටියදීත් මම ප්‍රීතියක් ලබන්නෙම්දැයි කීවාය.
- එවිට ස්වාමීන්වහන්සේ ආබ්‍රහම්ට කථාකොට: මහලුවූ මම සැබවින් දරුවෙකු වදන්නෙම්දැයි කියමින් සාරා සිනාසුණේ මක්නිසාද?
- ස්වාමීන්වහන්සේට බැරි දෙයක් ඇද්ද? එන අවුරුද්දේ නියම කාලය පැමිණි විට ඔබ වෙතට නැවත එන්නෙමි, සාරා පුත්‍රයෙකු ලබන්නීයයි කීසේක.
- සාරා භයවූ බැවින්: මා සිනාසුණේ නැතැයි කීවාය. උන්වහන්සේද: නැත; ඔබ සිනාසුණායයි කීසේක.
බයිබලයේ සහ කුරාණයේ මෙම සිද්ධිය ප්‍රකාශ කර ඇති අයුරු සංසන්දනාත්මකව බලන කළ, බයිබලය කුරාණයට සාපේක්ෂය ඉතාමත් දීර්ඝ ලෙස විස්තර කර ඇති බව පෙණේ. කුරාණයේ විශේෂත්වය වන්නේ කුරාණයේ සෑම පරිච්ඡේදයක් මෙන්ම මෙම සිද්ධියද සර්ව බලධාරී දෙවියන් විසින්ම මෙම සිද්ධිය ප්‍රකාශ කරන අයුරින් ප්‍රථම පුරුෂ භාෂාවෙන් පවසන අතර බයිබලයේ මෙම සිද්ධිය තෙවන පුරුෂ භාෂාවෙන් එනම් කිසිවකු කතාන්තරයක් පවසන අයුරින් මෙම සිද්ධිය විස්තර කරයි. තවද ඉහත 15 වන වගන්තිය දෙස බැලූ කල්හි මෙම සිද්ධිය තුළට මෙම කථාව රචනා කළ පුද්ගලයාගේ සිතුම් ද එක්වී ඇති බව අපට වැටහේ.
ඒබ්‍රහම්ගේ පරීක්ෂණය
ඒබ්‍රහම්ට බොහෝ කාළයකට දරුවකු නොලද අතර දෙවියන් විසින් ඔහු හට දරුවකුගේ සුභාරංචිය ගෙන ආවේ ඔහු වයස්ගත වූ පසුව බව පෙණේ. ඒ ආශ්‍රිත සිද්ධිදාමය මෙසේයි.
මම මාගේ අධිපතියාණන් වෙතට යන්නෙමි. නියතවශයේන ඔහු මා හට මග පෙන්වන්නේය. (අල්කුරාණ් 37 - 100)
මගේ අධිපතියාණෙනි! මා හට ධාර්මිෂ්ඨ පුතෙකු ලබා දෙනු මැනව. (අල්කුරාණ් 37 - 101)
අප ඔහුට ඉවසිලිවන්ත පුතකු ගැන සුභාරංචිය දුන්නෙමු. (අල්කුරාණ් 37 - 102)
හෙතෙම ඔහු සමග ඇවිදින වයසට එළඹුන කල්හි ඔහු මාගේ දයාබර පුතණුවනි! මා ඔබ ඝාතනය කරන බව මා සිහිනෙන් දුටිමි. ඒ ගැන ඔබ කුමක් සිතන්නේදැයි ඇසුවේය. එයට හෙතෙම මාගේ පියාණෙනි! ඔබට අණ කරනු ලැබූ පරිදි ඔබ කරන්න. අල්ලාහ්ගේ අභිමතය පරිදි මා ඉවසිලිවන්තයින්ගෙන් කෙනෙකු බව ඔබ දකිනු ඇතැයි පිළිතුරු දිය. (අල්කුරාණ් 37 - 103)
ඔවුන් දෙදෙනාම දෙවියන්ට අවනත වූ කල්හි ඔහු තම පුතුන් මුණින් අතට හරවා වැතිරුවේය. (අල්කුරාණ් 37 - 104)
එවිට අප ඔහුට එම්බල ඉබ්‍රාහීම්! යන්නෙන් අමතුවෙමු (අල්කුරාණ් 37 - 105)
ඇත්තෙන්ම නුඹ සිහිනය ඉටු කරෙහිය. මෙයාකාරයට අප යහපත් ක්‍රියා කරන්නවුනට තිළිණ දෙන්නෙමු. (අල්කුරාණ් 37 - 106)
එය නියත වශයෙන්ම පැහැදිළි පිරික්සුමකි. (අල්කුරාණ් 37 - 107)
අපි ඔහුව මහත් පරිත්‍යාගයක් මගින් ගලවා ගත්තෙමු. (අල්කුරාණ් 37 - 108)
කුරාණයෙහි මෙම සිදධියට සම්බන්ධ ඒබ්‍රහම්ගේ පුතුගේ නම සඳහන් නැති නමුත්, මෙම පුතු ඉෂ්මායිල් වන බව මුස්ලිම්වරුන්ගේ පිළිගැනීමයි. නමුත් බයිබලයේ සඳහන්වන්නේ මෙම සිද්ධියට සම්බන්ද පුතුන් ඉෂ්මායිල් නොව අයිසාක් බවය. බයිබලයට අනුව මෙම සිද්ධිදාමය මෙසේ සඳහන්වේ.
ශුද්ධවූ බයිබලය - උත්පත්ති 22 (Genesis 22)
ඊසාක් පූජා කරනු ලැබීම
- මේ කාරණාවලින් පසු දෙවියන්වහන්සේ ආබ්‍රහම් පරීක්ෂාකරමින්: ආබ්‍රහම් කියා ඔහුට කථාකළසේක; ඔහුද: මම මෙහියයි කීය.
- උන්වහන්සේ: ඔබේ පුත්‍රවූ ඔබ ප්‍රේමකරන ඔබේ එකම පුත්‍රවූ ඊසාක් රැගෙන මොරියා දේශයට ගොස්, මා විසින් ඔබට කියන කන්දක් පිට දවන පූජාවක් වශයෙන් ඔහු ඔප්පුකරවයි කීසේක.
- ආබ්‍රහම් අලුයම නැගිට තමාගේ කොටළුවා සූදානම්කොට, තමා කැටුව තමාගේ තරුණයන්ගෙන් දෙදෙනෙකු හා තමාගේ පුත්‍රවූ ඊසාක්ද රැගෙන, දවන පූජාව පිණිස දර පළාගෙන, නැගිට දෙවියන්වහන්සේ ඔහුට කී ස්ථානයට ගියේය.
- තුන්වෙනි දින ආබ්‍රහම් ඇස් එසවූයේ ඒ ස්ථානය දුර සිට දුටුවේය.
- ආබ්‍රහම් තමාගේ තරුණයන්ට කථාකොට: කොටළුවා සමඟ ඔබ සැම මෙහි සිටින්න, ළමයාත් මමත් අතනට ගොස් නමස්කාරකොට ඔබ සැම වෙතට නැවත එන්නෙමුයයි කීය.
- එවිට ආබ්‍රහම් දවන පූජාවට ගෙනා දර රැගෙන තමාගේ පුත්‍රවූ ඊසාක් පිට තබා තමාගේ අතින් ගිනිද පිහියද ගත්තේය; ඔව්හු දෙදෙනා එක්ව ගියෝය.
- ඊසාක් තමාගේ පියවූ ආබ්‍රහම්ට කථාකොට: මාගේ පියාණෙනියි කීය. ඔහුද: මාගේ පුත්‍රය, මම මෙහියයි කීය. ඔහු: බැලුව මැනවි, ගින්දරත් දරත් තිබේ, එහෙත් දවන පූජාවට බැටළුපැටවා කොයිදැයි කීවේය.
- ආබ්‍රහම්: මාගේ පුත්‍රය, දෙවියන්වහන්සේම දවන පූජාවක් පිණිස බැටළුපැටවා සපයා ගන්නවා ඇතැයි කීවේය.
- මෙසේ ඔව්හු දෙදෙනා එක්ව ගොස් දෙවියන්වහන්සේ ඔහුට කී ස්ථානයට පැමුණුණෝය; එවිට ආබ්‍රහම් එහි පූජාසනය ගොඩනගා, දර පිළිවෙළින් තබා, තම පුත්‍රවූ ඊසාක් බැඳ පූජාසනය උඩ දර පිට තැබුවේය.
- තවද ආබ්‍රහම් තමාගේ අත දිඟුකොට තම පුත්‍රයා මරන පිණිස පිහිය ගත්තේය.
- එවිට ස්වාමීන්වහන්සේගේ දූතයා ස්වර්ගයෙහි සිට ඔහුට අඬගසා: ආබ්‍රහම්, ආබ්‍රහම්යයි කීයේය. ඔහුද: මම මෙහියයි කීය. 12දේවදූතයා: ඔබේ අත තරුණයා පිට නොතබව, ඔහුට කිසිවක් නොකරව. මක්නිසාද ඔබේ පුත්‍රයා, ඔබේ එකම පුත්‍රයා මාගෙන් නොවැළැක්වූ බැවින් ඔබ දෙවියන්වහන්සේට භයවෙන බව දැන් දනිමියි කීයේය.
- ආබ්‍රහම් ඇස් ඔසවා බැලූ විට, බලව, තමා පිටිපස බැටළුවෙක් උගේ අංවලින් අකුලේ පටලැවී සිටිනවා දුටුයේය. එවිට ආබ්‍රහම් ගොස් ඒ බැටළුවා රැගෙන තමාගේ පුත්‍රයා වෙනුවට දවන පූජාවක් කොට ඔප්පුකෙළේය.
- ආබ්‍රහම් ඒ ස්ථානයට යෙහෝවා-යිරෙ22:14එනම්, - ස්වාමීන්වහන්සේ සපයාදෙනසේක, නොහොත් දක්නාසේක. යන නාමය තැබුවේය. මෙසේ: ස්වාමීන්වහන්සේගේ කන්දේදී සපයා දෙනුලබන්නේයයි අද දක්වා කියති.
- ස්වාමීන්වහන්සේගේ දූතයා දෙවෙනි වරත් ස්වර්ගයෙහි සිට ආබ්‍රහම්ට අඬගසා:
- ඔබේ පුත්‍රයා, ඔබේ එකම පුත්‍රයා වළක්වා නොගෙන මේ දෙය කළ බැවින්
- මම ඒකාන්තයෙන්ම ඔබට ආශීර්වාද කරන්නෙමි, අහසේ තාරකා මෙන්ද මුහුදු වෙරළෙහි වැලි මෙන්ද ඔබේ වංශය බොහෝසෙයින් වැඩිකරන්නෙමි; ඔබේ වංශය තමන් සතුරන්ගේ දොරටුව හිමිකරගන්නේය;
- මාගේ ශබ්දයට ඔබ කීකරුවූ නිසා ඔබේ වංශය කරණකොටගෙන පොළොවේ සියලු ජාතීහු ආශීර්වාද ලබන්නෝය කියා මා ගැනම දිවුළෙමියි ස්වාමීන්වහන්සේ කියනසේකැයි කීයේය.
- ආබ්‍රහම් තමාගේ තරුණයන් වෙතට හැරී ආයේය, එවිට ඔව්හු නැගිට බෙයර්-ෂෙබාට එක්ව ගියෝය; ආබ්‍රහම් බෙයර්-ෂෙබාහි වාසය කෙළේය.
- තවද මේ කාරණාවලට පසු: බලව, මිල්කාත් ඔබේ සහෝදරවූ නාහොර් නිසා පුත්‍රයන් වැදුවායයි ආබ්‍රහම්ට කියනලද්දේය; 21එනම්, ඔහුගේ කුලුඳුලාවූ ඌශ්ද ඔහුගේ සහෝදරවූ බූශ්ද ආරම්ගේ පියාවූ කෙමුවෙල්ද,
- කෙසෙද්ද හශෝද පිල්දාෂ්ද ජීද්ලප්ද බෙතුයෙල්ද යන මොව්හුය.
- බෙතුයෙල්ට දාව රෙබෙකා උපන්නාය. මිල්කා මේ අට දෙන ආබ්‍රහම්ගේ සහෝදරවූ නාහොර් නිසා බිහිකළාය.
- රෙයුමා නම්වූ ඔහුගේ උපභාර්යාවත් තෙබාද ගහම්ද තහෂ්ද මාකාද බිහිකළාය.
බයිබලයේ සඳහන් ඉහත පද වල අයිසාක් ඒබ්‍රහම්ගේ එකම පුත්‍රයා ලෙස ආමන්ත්‍රනය කර ඇත. නමුත් අයිසාක් ඉපදීමට කළින් හාජර්ට සහ ඒබ්‍රහම්ට දාව ඉෂ්මායිල් නමින් වැඩිමහල් පුතෙකු සිටි බව අප දනිමු. මේ නිසා බයිබලයේ මෙම කාරණය සම්බන්ධයෙන්ද නොගැලපීමක් තිබෙන බව අපට පෙණේ.
- මුහම්මද් නබිතුමාගේ ජීවිත කථාව
- ඊශ්‍රායල සහ පලස්තීනයේ සත්‍යය අසත්‍ය පිළිබඳ විග්‍රහයක්
- ෂරියා නීතිය යනු කුමක් ද?
- ඉස්ලාමීය මූලධර්ම වාදය, අන්තවාදය, වහාබ් වාදය සහ ත්‍රස්තවාදය පිළිබඳ විග්‍රහයක්
- හලාල් යනු කුමක්ද?
- ඉස්ලාම් ආගම පිළිබඳ හැඳින්වීමක්
- හින්දු ආගම සහ ඉස්ලාම් ආගම අතර සමානකම්
- ඉස්ලාම් සහ ක්‍රිස්තියාණි අතර සමානකම්
- මුහම්මද් නබිතුමා පිළිබඳව බයිබලයේ සඳහන් දෑ
- මුහම්මද් නබිතුමා පිළිබඳව හින්දු ආගමික මූලාශ්‍රවල සඳහන් දෑ
- අල් තක්යා (ටකියා) යනු කුමක්ද?