මුස්ලිම් විරෝධීන් එලිමහනේ කාබාව ඉදිරිපිට යඥා කිරීමත් මුස්ලිම්වරු සැඟවී අල්ලාහ්ට යාඥා කිරීමත් උමර්ට දරාගත නොහැකිවිය. මේ හේතුවෙන් උමර් සියලු මුස්ලිම්වරුන් තමන් සමග කාබාව ඉදිරිපිටට ගොස් එලිමහනේ අල්ලාහ්ට නැමදුම් කිරීමට ධෛර්යමත් කළේය. ඇතැම්විට ඔහු සහ හම්සා විශාල මුස්ලිම් සෙනඟක් සමග කාබාව ඉදිරිපිට ගොස් දෙවියන් වන්දනාමාන කළේය. මෙය කුරෙයිෂි නායකයින්ව බොහෝ සෙයින් නින්දාවට පත් කරන්නක් වූ නමුත් උමර්ගේ ප්‍රචන්ඩකාරිබව දන්නා හෙයින් ඔහුගෙන් වැලකී සිටියෝය. මෙම තත්ත්වයට යමක් කළ යුතු යැයි තීරණය කළ කුරෙයිෂි නායකයින් අබූ ජහ්ල්ගේ මූලිකත්වයෙන් මුහම්මද් නබිතුමා අයත් වංශය වන බනූ හාෂීම් වංශයට ආර්ථික සහ සමාජයීය සම්බාධක පැනවීමට තීරණය කළහ. මේ අනුව කුරෙයිෂි නායකයින් හතලිස් දෙනෙකු පමණ එකතු වී ලියවිල්ලකට අත්සන් තබන ලදි. මෙම එකඟතාවයට අනුව කිසිදු වංශයක කාන්තාවක් බනූ හාෂිම් වංශයේ පිරිමියකු සමග විවාහ විය නොහැකි අතර කිසිදු වංශයක පිරිමියකු බනූ හාෂිම් වංශයේ කාන්තාවක් සමග විවාහ විය නොහැක. කිසිවකු බනූ හාෂිම් වංශයේ කිසිවකු සමග වෙළඳ ගනුදෙනු වල නියැලිය නොහැක. හාෂිම් කුලයේ සියලු දෙනා මුහම්මද් නබිතුමාව ඔවුන්ගේ කුලයෙන් නෙරපන තෙක් හෝ මුහම්මද් නබිතුමා ඔහුගේ ආගම අත්හරින තෙක් මෙම සම්බාධක ක්‍රියාත්මක කිරීමට ඔවුන් එකඟ විය. කුරෙයිෂි වංශයට අයත් සියලුම කුලයන් මෙයට එකවර එකඟ නොවූ නමුත් වෙනත් බලවත් කුල වල නායකයින්ගේ බල කිරීම මත එකඟ වීමට සිදු විය. මුත්තලිබ් කුලයේ නායකයින් මෙම සම්බාධක වලට විරුද්ධ වූ හෙයින් ඔවුන්ද මෙම සම්බාධක වලට ඇතුළත් කරන ලදි. කුරෙයිෂි නායකයින් හතලිහකට අධික නායකයින් අත්සන් තබා මුද්‍රා තබන ලද මෙම ලියවිල්ල කාබාව තුළ තැන්පත් කරන ලදි.
තම ආත්මාරක්ෂාව පිණිස හාෂිම් කුලයට අයත් සියලු දෙනා හාෂිම් කුලයේ නායකයා සහ මුහම්මද් නබිතුමාගේ මාමා වූ අබූතාලිබ් ගේ නිවස අවට පදිංචි වූ අතර මුහම්මද් නබිතුමාගේ එක් මාමා කෙනෙකු වූ අබූ ලහබ් පමණක් හාෂිම් කුලයේ පිරිසගෙන් වෙන් වී අනෙක් කුරෙයිෂින් සමග පදිංචියට ගොස් මෙම සම්බාධක වලට ඔහුගේ එකඟතාවය පළ කළේය. නමුත් ඇතැම් කාන්තාවන් විවාහය හේතුවෙන් වෙනත් කුලයක සිටියද ඇයගේ උපන් කුලය වෙනස් නොවීම ආදී හේතු නිසා සම්බාධක සියයට සියයක්ම සාර්ථක නොවීය. කෙසේ වෙතත් සම්බාධක හරි හැටි ක්‍රියාත්මක කිරීම පිණිස අබූ ජහ්ල් නිතරම පරීක්ෂාකාරීව සිටියේය. එක් වථාවක් කතීජාගේ බෑනා වන හකීම් වහලකුද කැටුව ආහාර රැගෙන යන අවස්ථාවක් දුටු අබූ ජහ්ල් ඔවුන් හාෂිම් සාමාජිකයින්ට ආහාර රැගෙන යන බවට චෝදනා කරමින් විශාල ප්‍රශ්නයක් ඇති කිරීමට උත්සාහ කළේය. නමුත් අසාද් කුලයේ සාමාජිකයකු වූ අබුල් බක්තාරි එම ආහාර අසාද් කුලයේ කතීජාගෙන් රැගෙන තමන් වෙතට ගෙන එන්නට පැවසූවක් බව පැවසුවේය. අබුල් බක්තාරි මුස්ලිම් නොවුවද අබු ජහ්ල්ගේ කරදරය දරාගත නොහැකිව ඔටුවකුගේ හිස් කබලක් අතට ගත් ඔහු අබූ ජහ්ල්ගේ හිසට පහර දුන් අතර බිම වැටී සමතලා වූ අබූ ජහ්ල්ගේ සිරුර මතට පයින් ගසමින් පා පහර එල්ල කළේය. මෙම අවස්ථාවේ අසලින් ගමන් කරමින් සිටි හම්සා හට මෙය ඉතාමත්ම තෘප්තිමත් දර්ශනයක් විය.
කෙසේ වෙතත් සාමාන්‍යයෙන් මෙම සම්බාධක මැද වුව ද බනූ හාෂිම් කුලයට වෙනත් කුල වලින් ද සෑහෙන උදව් උපකාර ලැබිණි. අබූ බක්කර් සහ උමර් විසින් ද මෙම සම්බාධක අභිබවා හාෂිම් කුලයට බොහෝ උපකාර කළෝය. කෙසේ වෙතත් මෙම සම්බාධක නිසා බනූ හාෂිම් කුලය බොහෝ කම් කටොළු වලට වසර දෙකක් තිස්නේ මුහුණ දීමට සිදු විය.
මෙම කාළයේදී අබූ ලහබ්ට සහ ඔහුගේ භාර්යාවට සාප කරමින් සහ අපායට උරුම කරමින් කුරාණ වාක්‍යයයක් පහළ විය. අබූ ලහබ්ගේ බිරිඳට මෙය ආරංචිවී මෝල්ගසක් රැගෙන පල්ලිය තුළ සිටි අබූ බක්කර් දෙසට පැමිණ නුඹේ යහළුවා කොහේදැයි විමසුවාය. මෙයින් බොහෝ විමතියට පත් වූ අබූ බක්කර් ඔහුගේ ඉදිරියෙන් සිටි මුහම්මද් නබිතුමා දෙස බැලුවේය. මට ආරංචි වුණා ඔහු මට සාප කළ බව. ඔහු මගේ ඉදිරියට පැමිණියහොත් මා මෙම මෝලගසෙන් ඔහුගේ දත් සියල්ලම කඩා දමමි යන්නෙන් පවසා මුහම්මද් නබිතුමාට නින්දා කරමින්:
“අපි මුදම්මම්ව ප්‍රතික්ෂේප කරමු
ඔහුගේ අණ හෙලා දකිමු
ඔහුගේ ආගමට වෛර කරමු”
කවි පද කියමින් එතැනින් පිට විය. ඇය පිටත්ව ගිය පසු අබූ බක්කර් මුහම්මද් නබිතුමාගෙන් ඇයට නුඹව නොපෙණුනේදැයි ප්‍රශ්න කළේය. ඊට පිළිතුරු දුන් මුහම්මද් නබිතුමා අල්ලාහ් ඇගෙන් මාව දැකීමේ හැකියාව ඩැහැගන්නා ලදි. අල්ලාහ් කුරෙයිෂින්ගෙන් මට වන හාණි සියල්ල වලක්වන අයුරු විශ්මයජනක නොවේද? මගේ නම මුහම්මද් බව දැන දැන මොවුන් මුදම්මම්ට අපහාස කරති යන්නෙන් පැවසුවේය.
මේ අතර ඇතැම් කුරෙයිෂි ජාතිකයින් ඔවුන්ගේ බනූ හාෂීම් සොයුරන් සහ ඥාතීන්ට වන දුක් කම් කටොළු බලා සිටීමට නොහැකිව උපාය ශීලී ලෙස සැලසුම් කර වර්ෂ දෙකකට අධික කාලයක් ඇදී ගිය මෙම සම්බාධක ඉවත් කරන්නට සමත් විය. එහි ප්‍රථිඵලයක් ලෙස මුස්ලිම් වරුන්ට නැවතත් යම් සහනයක් අත්වී මෙම පුවත ඇබිසීනියාවේ මුස්ලිම් සරණාගතයින්ට ද ආරංචි විය. මේ හේතුවෙන් ඔවුන්ගෙන් ඇතැමුන් දැන් සියළු ප්‍රශ්න හමාරයි යැයි සිතා නැවතත් මක්කාවට පැමිණියෝය.