හම්සාගේ සිදුවීමෙන් පසුව මුහම්මද් නබිතුමාට ඍජුවම පහර දීමට සියල්ලෝම මැළි වූහ. විශේෂයෙන්ම හම්සා ඔහුගේ පැත්තේ සිටි හෙයින් ඔහුට මුහුණ දීමට ඔවුන් බිය වූවෝය. මේ හේතුවෙන් ඔවුන් මුහම්මද් නබිතුමාට යම් අල්ලසක් දී ඔහුගේ මෙම අරගලය අත්හැරවන්නට තීරණය කළෝය. මේ අනුව මෙම කාර්යය සඳහා සුදුසු යැයි තීරණය කළ උත්බා ඉබ්නූ රාබියා නම් පුද්ගලයා මුහම්මද් නබිතුමා වෙතට යවන ලදි. මේ අනුව කාබාව ඉදිරියේ වාඩිගෙන සිටි මුහම්මද් නබිතුමා වෙත ගිය උත්බා මාගේ සහෝදරයාගේ පුතාණෙනි! නුඹ දන්නවා නුඹ ඉතාමත්ම වැදගත් පවුලකින් පැවතෙන්නෙක් බව. මේ හේතුවෙන් අනිවාර්යයෙන්ම අප නුඹට ගරු කළ යුතුයි. නමුත් දැන් නුඹ අපේ ජනතාවට ඉතාමත්ම විශාල ප්‍රශ්නයක් වී ඇත. නුඹ අපේ සමාජය බෙදා වෙන් කර ඇත. නුඹ අපේ සංස්කෘත්‍රිය මෝඩ යැයි කියාද අපේ දෙවි වරුන් සහ ආගමට අපහාස කරමින්ද අපගේ මුතුන්මිත්තන් මිත්‍යා දෘෂිටිකයින් යැයිද පවසන්නෙහුය. මේ නිසා මා නුඹට යෝජනාවක් කරන්නෙමි. නුඹට සැප සම්පත් අවශ්‍ය නම් අප සියලු දෙනා අපගේ සැප සම්පත් වලින් නුඹට දී නුඹව මෙහි ධනවත්ම පුද්ගලයා බවට පත් කරන්නෙමු. නුඹට අවශ්‍ය ගෞරවය නම් නුඹව අප සියලු දෙනාගේ නායකයා බවට පත් කර නුඹේ අනුමැතිය නොමැතිව කිසිදු තීරණයකට නොපැමිණෙන්නෙමු. නුඹට අවශ්‍යනම් අප නුඹව අපගේ රජු බවට පත් කරන්නෙමු. නුඹ වෙතට පැමිණෙන දේවතාවගෙන් නුඹට මිදෙන්නට බැරි නම් අප අපගේ හොඳම දොස්තරවරු ලවා නුඹව සම්පූර්ණයෙන්ම සුව වන තුරු නුඹ වෙනුවෙන් වියදම් කරන්නෙමු යැයි පැවසුවේය. මේ සියල්ල අසා සිටි මුහම්මද් නබි තුමා දැන් නුඹ මා කියන දෑ ට සවන් දෙනු යන්නෙන් පිළිතුරු දුන්නේය.
උත්බා ඔහුගේ අත් පිටුපසට තබා හාන්සි වී ඊට එකඟ විය. මුහම්මද් නබිතුමා කුරාණයෙන් වාක්‍ය කිහිපයක් පාරායනා කරන්නට විය. අරාබි භාෂාවේ උච්චතම විශිෂ්ඨත්වයෙන් රචනා වී ඇති කුරාණය ඔහුගේ කන්වලට ඉතාමත්ම මිහිරි විය. ලෝකය නිර්මාණවී ඇති අයුරු, අතීතයේ වරින් වර පැමිණි වක්තෘවරු පිළිබඳ, එම වක්තෘවරුන්ට එරෙහිවූ ජනතාව විනාශ වූ අයුරු සහ අපායට නියම වූ අයුරු සහ විශ්වාස කරන්නවුනට සියලු අවශ්‍යතා මතුලොව ඉටුවන අයුරු පිළිබඳව බොහෝ කාරණා කාව්‍යමය ලෙස විස්තර කළ කුරාණ වාක්‍යයන් අවසානයේදී අල්ලාහ්ගේ සංඥා අතුරින් දිවා සහ රාත්‍රිය, හිරු සහ සඳු පිළිබඳව පවසා මේ සියල්ලන්ගේ නිර්මාතෘ අල්ලාහ්ට පමණක් නමස්කාර කරන්න යන්නෙන් අවසන් කොට එතැනම ඔහුගේ නළල බිම තබා අල්ලාහ්ට නමස්කාර කළේය. කියන්නට තිබෙන සියල්ල මා පැවසුවෙමි. දැන් සියල්ල ඔබට භාරය යන්නෙන් පැවසුවේය.
උත්බා ඔහුගේ සගයින් වෙතට ගිය විට ඔහුගේ මුහුනෙහි වෙනස දුටු ඔවුන් බොහෝ සෙයින් ව්‍යාකූල වූහ. නුඹට කුමක් වුණේ දැයි ප්‍රශ්න කළහ. මා මීට කළින් අසා නොමැති ආකාරයේ වදන් අසන්නට ලැබුණි. අල්ලාහ් මත දිවුරා කියමි මේ වදන් කවි වත් මායාවක් වත් ගොතන ලද බොරුවක් වත් නොව. කුරෙයිෂි ජනයිනි! මා කියන දේ අසනු. මෙම පුද්ගලයා සහ ඔහුගේ ක්‍රියාවන්ට අත නොගසනු. ඔහුව අත් හරින්න. මා අසන ලද වදන් ඉතාමත්ම සුභදායී වදන්ය. අරාබිවරු ඔහුව ධමනය කළහොත් නුඹලාව වෙනත් ජාතිකයින් විසින් ධමනය කර ඔහු ජය ගනීවි. ඔහු අරාබිය ජය ගතහොත් ඔහුගේ ජය නුඹලාගේද ජය වී නුඹලා භාග්‍යවන්තයින් වන්නේය යන්නෙන් උත්බා පැවසුවේය. එවිට එහි පිරිස ඔහුගේ දිවෙන් ඔහු නුඹව වශී කළේදැයි අසා සමච්චල් කළෝය. මා මාගේ අදහස පැවසුවෙමි. නුඹලා නුඹලාට වුවමනා දෙයක් කරන්න යැයි ඔහු පැවසුවේය.
නමුත් උත්සාහය අත්නොහැරි කුරෙයිෂිවරු නායකයින් සියල්ලෝම නුඹව දකින්නට කැමති යැයි පවසා මුහම්මද්ව සමුළුවකට ආරාධනා කළෝය. මොවුන්ගේ සිත්වල යම් වෙනසක් ඇතිවන්නට ඇතැයි සිතූ මුහම්මද් නබිතුමා හනි හණිකට ඔවුන්ගේ ආරාධනය පිළිගෙන එම සමුළුවට සහභාගීවිය. නමුත් ඔවුන් නැවත නැවතත් ඔහුට කළින් අසන්නට ලැබූ එම අල්ලස් ප්‍රදානය කරනු දුටු ඔහුට සියලු අපේක්ෂා භංග විය. ඔවුන් කථා කර අවසන් වූ පසු මුහම්මද් නබිතුමා මා හට කිසිදු වශී වීමක් වී නැත. මා නුඹලාගේ ගෞරවය ද අපේක්ෂා නොකරමි. මා නුඹලාගෙන් රජකමද අපේක්ෂා නොකරමි. නමුත් අල්ලාහ් විසින් මා හට ග්‍රන්ථයක් අනාවරණය කොට නුඹලා හට සුභාරංචියක් සහ අවවාදයක් කරන්නට අණ කරනු ලද්දෙමි. නුඹලා මා රැගෙන පැමිණි පණිවිඩය පිළිගන්නෙහු නම් එය නුඹලාට මෙලොව සහ පරලොව සුභදායී දැය රැගෙන එනු ඇත. නමුත් නුඹලා එය බැහැර කළෙහුනම්, අල්ලාහ් අප අතර යමක් නිශ්චය කරනතුරු මා ඉවසිල්ලෙන් බලා සිටිමි යන්නෙන් පැවසුවේය.
මෙය අසා සිටි එම ජනයා, අපි නුඹව අල්ලාහ්ගේ දූතයා බවට පිළිගන්නට නම් අප වටේ ඇති මේ කඳු සියල්ල ඉවත් කොට අපගේ භූමිය සමතලා කොට මේවායින් සිරියාව සහ ඉරාකයේ මෙන් ගංගා ගලා බසින්නට සලස්වා අපගේ මරණයට ලක්වූ කුසෙයි නම් මිත්තාව නැගිට්ටුවා දෙන මෙන් අල්ලාහ්ට අයාචනා කරනු. මේ සියල්ල නුඹට කරන්නට බැරි නම් නුඹට අපෙන් බේරාගන්නට ආයාචනා කරනු. නැතිනම් අල්ලාහ්ට සුර දූතයෙකු එවා නුඹ පවසන දෑ සත්‍ය බවට තහවුරු කරන ලෙස පවසනු යන්නෙන් පැවසුවෝය.
ඊට පිළිතුරු දුන් මුහම්මද් නබි තුමා, මා මෙවන් දෑ අල්ලාහ්ගෙන් ඉල්ලන කෙනෙකු නොවෙමි. මා මෙහි යවන ලද්දේ නුඹලාට සුභාරංචියක් සහ අවවාදයක් ලබා දීම පිණිස පමණි. එසේ නම් අහස අපගේ හිසේ වැටෙන්නට සලස්වන්නැයි අපහාසාත්මකව ඔවුන් පැවසුවෝය. එසේ කිරීමට තීරණය කිරීම අල්ලාහ්ට භාරය. ඔහුට අවශ්‍ය නම් එසේ කරාවි යන්නෙන් පිළිතුරු දුන්නේය.
ඔවුනට තිබුණු තවත් ප්‍රහේලිකාවක් නම් මුහම්මද් නබිතුමාට නිතර පහළ වන අල්කුරාණ් වාක්‍යවල එන අර්රහ්මාන් නම් වචනය හෙවත් මහා කාරුණිකයා පිළිබඳය. මේ සම්බන්ධයෙන් යමක් කියන්නට අදහස් කළ ඔවුන් අපට ආරංචි නුඹට මේ සියල්ල කියා දුන්නේ යමාමා නගරයේ රහ්මාන් නම් පුද්ගලයා යැයි කියා. රහ්මාන්ව අප කවදාවත් විශ්වාස නොකරමු යන්නෙන් පැවසූහ. අපි නුඹව දැන් තේරුම්ගත්තා මුහම්මද්. අප නුඹට සාමයෙන් සිටින්න ඉඩ නොදෙමු. අපි නුඹව විනාශ කරන තෙක් හෝ නුඹ අපව විනාශ කරන තෙක් අප නුඹට විරුද්ධව මෙලෙස ක්‍රියා කරන්නෙමු. නුඹ අල්ලාහ්ව සහ සුරදූතයින් රැගෙන එන තෙක් අප නුඹව විශ්වාස නොකරන්නෙමු යන්නෙන් පවසූහ. මේ සියල්ල අසා සිටි මුහම්මද් නබි තුමා නැගිට පිටත්වත්ම ඔහුගේ සමීප ඥාතියකු වූ අබූ උමයියාගේ පුත් අබ්දල්ලාහ් නුඹ ඉනිමගක නැග අහසට ගොස් සුර දූතයින් සිවු දෙනෙකු රැගෙන නැවත පොළවට පැමිණියද මා නුඹව විශ්වාස නොකරමියි පැවසුවේය. අබ්දල් මුත්තලීබ් ගේ මුණුබුරකු වන අබ්දල්ලාහ් හට ඔහුගේ මව වන අතිකා විසින් මුහම්මද් නබිතුමාගේ පියා වන අබ්දල්ලාහ් සිහි කිරීම පිණිස ඔහුගේ නම තබන ලදි. මෙතරම් සමීප ඥාතියකුගෙන් මෙවන් ප්‍රකාශ අසන්නට ලැබීම පිළිබඳව අතිශයින්ම කම්පා වූ මුහම්මද් නබිතුමා නිවසට ගියේය.