ඇබිසීනියාවෙන් ලද පුවතින් පසු කුරෙයිෂිවරු බොහෝ සෙයින් කෝපයටත් භීතියටත් පත්විය. මේ අනුව ඔවුන් තම ඉස්ලාම් විරෝධී ක්‍රියාකාරකම් තීව්ර කරන්නට පෙළඹුනහ. අබූ ජහ්ල්ගේ බෑනෙකු වන විසි හය හැවිරිදි උමර් ඉබ්නූ කත්තාබ් කුරෙයිෂිවරුන්ගේ දෙවිවරුන් හට බෙහෙවින් භක්තිමත් පුද්ගලයෙකි. මේ හේතුවෙන් ඔහු ඉස්ලාම් දහමට එරෙහිව තදින්ම ක්‍රියා කළ පුද්ගලයෙකි. ඇබිසීනියාවේ සිදුවීමෙන් පසුව දැඩි ලෙස කෝපයට පත් වූ උමර් මේ සියල්ල නවතිනුයේ මුහම්මද්ගේ මරණයෙන් පමණක් බව තීරණය කළේය. මේ අනුව මුහම්මද් නබිතුමාව ඝාතනය කිරීමේ අරමුණින් ඔහු තම කඩුව ද රැගෙන නිවසින් පිටත් විය. මෙලෙස මොහු හදිසියේ කෝපයෙන් යනු දුටු නුඅයිම් ඉබ්නූ අබ්දල්ලා නම් පුද්ගලයකු ඔහු යන දිහාව තේරුම් ගත්තේය. නුඅයිම් රහසිගත ලෙස ඉස්ලාම් ආගම වැළඳගෙන සිටියේය. මේ නිසා මොහු උමර්ව නවත්වා නුඹ කොහේ යන්නේදැයි ප්‍රශ්න කළේය. කුරෙයිෂින්ව දෙකඩ කරපු අර ද්‍රෝහියාව මරණ්නට යන්නෙමියි ඔහු කෝපයෙන් පිළිත්රු දිය. දැඩි ලෙස කෝපයට පත් වූ මෙම තරුණයා ඔහුගේ කර්තව්‍යය නිමා කරනතෙක් නොනවතින බව දන්නා හෙයින් ඔහුගේ ක්‍රියා කලාපය අඩාල කිරීමේ අරමුණින් යමක් හදිසියේ සිතන්නට විය. එම්බල උමර්! ඇයි පළමුව නුඹ නුඹගේ නිවසේ උදවිය නුඹගේ මගට නොගන්නේ යන්නෙන් පැවසුවේය. මගේ නිවසේ මොන උදවියදැයි උමර් විමතියෙන් සහ කෝපයෙන් ඇසුවේය. නුඹේ සොහොයුරිය ෆාතිමා සහ ඔහුගේ පුරුෂයා සයිද්. ඔවුන් දෙදෙනාම මුහම්මද්ගේ ආගම අනුගමනය කරන්නෝය. ඔවුන් ජීවතුන් අතර සිටියොත් එහි වරද නුඹ මතට පැටවේවි යන්නෙන් පැවසුවේය. කිසිදු කථාවකින් තොරව උමර් ඔහුගේ සොයුරියගේ නිවස දෙසට හැරවුණි. නුඅයිම් පසුව මුහම්මද් නබිතුමා වෙතට මේ බව දැන්වීමට ගිය අතර උමර්ගේ සොයුරියගේ නිවසේ කබ්බාබ් නම් පුද්ගලයකු මෑතකදී පහළ වන ලද කුරාණයේ පරිච්ඡේදයක් වූ තාහා නම් පරිච්ඡේදයේ වාක්‍යයන් කිහිපයක් ලියූ ලියවිල්ලක් ද රැගෙන සයිද් සහ ෆාතිමා සමග පාරායනා කරමින් සිටියෝය. උමර් ෆාතිමාගේ නම කෝපයෙන් කෑ ගැසුවේය. මෙය ඇසුනු සැණින් බියට පත්වූ කබ්බාබ් වහාම නිවසේ මුල්ලකට ගොස් සැඟවුණි. එම ලියවිල්ල රැගත් ෆාතිමා හණිකට ඇගේ ඇඳුම් අතර සඟවාගත්තාය.
කුමක් ද නුඹලා මතුරමින් සිටියේ? යන්නෙන් උමර් ප්‍රශ්න කළේය. එවැනි කිසි දෙයක් නොමැතිබව ඔවුන් පැවසුවෝය. මට යමක් ඇසුණි. තවද නුඹලා මුහම්මද්ගේ අනුගාමිකයින් වුණු බවද මට අසන්නට ලැබුණි යන්නෙන් පවසා සයිද්ට පහර දිය. ෆාතිමා ඇගේ සැමියා බේරාගැනීමට ඔවුනතරට පැමිණි විගස උමර් ඇයට ද පහර දිය. එවිට ඇය ඔව්. අපි අල්ලාහ්ව සහ ඔහුගේ දූතයාණන් වන මුහම්මද්ව පමණක් විශ්වාස කරමු. නුඹට ඕනෑ දෙයක් අපට කරව් යන්නෙන් ෆාතිමා තරයේ ප්‍රකාශ කළාය. රුධිරයෙන් තෙත් වුණු ෆාතිමාගේ මුහුණ දැක උමර් තරමක් දුක් විය. ඔහුගේ සොයුරියගේ ප්‍රතිචාරය හමුවේ තරමක් සන්සුන් වූ උමර් නුඹලා පාරායනා කරමින් සිටි එම ලියවිල්ල මට දෙනු යන්නෙන් පැවසුවේය. නුඹට එය ලබාදීමට අප බිය වන්නෙමුයි ඇය පැවසුවාය. ඔහු කඩුව පැත්තකට දමා බිය නොවනු. එය කියවීමෙන් පසුව එය නැවත දෙන්නෙමි යන්නෙන් ඔහුගේ දෙවියන්ගෙ නාමයෙන් දිවුරා පැවසුවේය. ඔහු තරමක් සන්සුන් වී ඇතිබව තේරුම් ගත් ඔහුගේ සොයුරිය සොයුරාණෙනි! නුඹ පිළිම වන්දනයෙන් අපවිත්‍රව සිටින්නෙහුය. මෙය ඇල්ලීමට නුඹ පවිත්‍රව සිටිය යුතුයි යන්නෙන් පැවසුවාය. එවිට ඔහු තමන්ව සෝදා පවිත්‍ර වී පැමිණ එම ලියවිල්ල ලබාගෙන කියවන්නට විය. ඔහු නොදැනුවම ඉතාමත් උසස් සහ අලංකාර ලෙස රචනා වී ඇත යන්නෙන් පැවසුවේය. මේ සියල්ල බලා සිටි කබ්බාබ් සැඟව සිටි සථානයෙන් පිටතට පැමිණ උමර්. අල්ලාහ්ගේ දූතයාණන් නුඹට ඉස්ලාම් දහම ලබා දෙන මෙන් ආයාචනා කළේය. මේ නිසා නුඹ ඉස්ලාම් දහම වැලඳගනු ඇතැයි මා විශ්වාස කරමි යන්නෙන් පැවසුවේය. දැන් මුහම්මද් කොහිදැයි උමර් ප්‍රශ්න කළේය. ඔහු අර්කම් ගේ නිවසේ බව කබ්බාබ් පැවසුවේය. උමර් ඔහුගේ කඩුව ද රැගෙන අර්කම්ගේ නිවසට ගොස් තට්ටු කළේය. එක් පුද්ගලයකු දොරේ සිදුර තුළින් බලා මුහම්මද් නබිතුමා වෙත ගොස් අපේක්ෂා කළ ලෙස උමර් ඔහුගේ කඩුව ද රැගෙන පැමිණ සිටියි යන්නෙන් පැවසුවේය. ඊට එහි සිටි හම්සා ඔහුව ඇතුළට එවන්න. ඔහු හොඳකට පැමිණියා නම් අප ඔහුට යහපත් දෙයින් පිරිනමමු. ඔහු නරකකට පැමිණියානම් ඔහුගේ කඩුවෙන්ම ඔහුව මරා දමමු යන්නෙන් පැවසුවේය. ඊට එකඟවූ මුහම්මද් නබිතුමා උමර් ඇතුළුවූ සැනින් ඔහුව ඔහුගේ ඉන පටියෙන් කාමරය මැදට ඇද නුඹ කුමකට මෙහි පැමිණියේද? නුඹට අල්ලාහ් දැඩි දඬුවමක් අත්කර දෙන තුරු නතර නොවන බවයි මට පෙණෙන්නේ යන්නෙන් පැවසුවේය. අල්ලාහ්ගේ දූතයාණනි! මා අල්ලාහ් සහ ඔහුගේ දූතයාණන් සහ ඔහු රැගෙන පැමිණි දැය පිළිබඳ විශ්වාසය පළ කිරීමට පැමිණියෙමි යන්නෙන් පැවසුවේය. අල්ලාහු අක්බර් හෙවත් අල්ලාහ් අති ශ්‍රේෂඨයි යන්නෙන් මුහම්මද් නබි තුමා හඬ නැගූ විගස එහි සිටි සියල්ලන්ටම සුභ ආරංචිය වැටහිණි.
උමර් ඊළඟ දිනයේ උදෑසනින් මුහම්මද් නබිතුමාට වඩාත්ම බලවත් සතුරා කවුරුන්දැයි සිතා අබූ ජහල්ගේ නිවසට ගොස් දොරට තට්ටු කළේය. උමර්ව දුටු අබූ ජහල් ඔහුට ඉතාමත්ම මිත්‍රශීලී ලෙස ආමන්ත්‍රණය කොට මාගේ සොයුරියගේ පුතාණෙනි! නුඹ මෙහි පැමිණීමට කාරණය කුමක්දැයි ඇසුවේය. ඊට පිළිතුරු දුන් උමර් මා අල්ලාහ් සහ ඔහුගේ දූතයාණන් වන මුහම්මද් නබිතුමාව විශ්වාස කරන අතර ඔහු රැගෙන පැමිණි පණිවිඩයේ සත්‍යතාවය කෙරෙහි සාක්ෂි දරමි යන්නෙන් පැවසුවේය. බෙහෙවින් කෝප වුණු අබූ ජහ්ල් නුඹට සහ නුඹ ගෙනා පුවතට සාප වේවා යන්නෙන් පවසා දොර තදින් ගසා වැසුවේය.