මේ අතර ඉස්ලාම් ආගමේ වර්ධනය මක්කා නගරයේ බොහේ පවුල් දෙකඩ වන්නට හේතු විය. ඇතැම් පවුල් වල ස්වාමියා ඉස්ලාම් ආගම වැළඳ ගත් අතර බිරිඳ ඉස්ලාම් ආගමට පිටු පැවාය. ඇතැම් පවුල් වල බිරිඳ ඉස්ලාම් ආගම වැළඳ ගත් අතර ස්වාමියා පිටුපෑවේය. අතැම් පවුල් වල දරුවන් දෙමව්පියන්ගෙන් ඉස්ලාම් ආගම හේතුවෙන් වෙන් විය. මෙවන් වාතාවරණයකදී කුරෙයිෂි නායකයින්ගේ සමුළුවකදී මුහම්මද් නබි තුමා අත්තෙන්ම අල්ලාහ්ගේ දූතයකුද යන වග පිළිබඳව සනාථ කිරීමට ලොව පැරණිතම ආගම අදහන යත්‍රිබ් නුවර යුදෙව්වන්ගේ මතය විමසීමට ඔවුන් එකඟ විය. මේ අනුව යුදෙව් ආගමික පූජක වරු හෙවත් රබ්බින් ගේ මතය විමසූවිට ඔවුන් ප්‍රශ්න තුනක් ලබා දී මෙම ප්‍රශ්න තුනට ඔහු පිළිතුරු සැපයුවහොත් ඔහු අල්ලාහ්ගේ දූතයෙකි. නැතිනමු ඔහු නුඹලාව මුලා කරන්නෙකි යන්නෙන් පැවසුවෝය. එම ප්‍රශ්න තුන මෙසේය.
මෙම ප්‍රශ්න වලට ඔහු පිළිතුරු සැපයුවහොත් ඔහුව අනුගමනය කරන්න. මන්ද ඔහු අල්ලාහ්ගේ දූතයාය යන්නෙන් එම රබ්බින් ඔවුනට අවවාද කළෝය.
මෙම ප්‍රශ්න තුන ලද විට කුරෙයිෂි ජාතිකයින් එම ප්‍රශ්න මුහම්මද් නබි වෙත යොමු කළෝය. මුහම්මද් නබි විසින් ඒවාට පිළිතුරු හෙට පවසන්නම් යැයි පැවසුවේය. නමුත් ඊළඟ දිනයේදී ද ඔහුට මෙම ප්‍රශ්න වලට පිළිතුරු දිය නොහැකි විය. අනපේක්ෂිත ලෙස ජිබ්‍රායිල් සුරදූතයා මෙම අත්‍යාවශ්‍ය මොහොතේ තවමත් නොපැමිණියේය. සතුරන්ගේ නින්දා අපහාස වැඩි වන්නට විය. ඉස්ලාම් විරෝධීන් බොහෝ සතුටට පත්වූවෝය. මෙසේ දින පහළොවක් පමණ ගෙවුණු පසුව ජිබ්‍රායිල් පැමිණ මුහම්මද් නබිතුමාට කිසි දිනක මා හෙට පවසන්නම් යන්නෙන් නොපවසවු. සෑම විටම “ඉන්ෂා අල්ලාහ්” හෙවත් අල්ලාහ් කැමැති වූවා නම් යන්නෙන් පවසවු යන්නෙන් අවවාද කර එම ප්‍රශ්න තුනට පිළිතුරු ලබා දිය.
එම පිළිතුරු ලැබීමේ ප්‍රමාදය මුහම්මද් නබිතුමාට බොහෝ සෙයින් වේදනාකාරී වුවද ඉස්ලාම් ආගම පිළිගත් උදවියට මෙම කුරාණ වාක්‍ය දෙවියන්ගෙන්ම ලද ඒවා යන බවට සනාථ කරන්නක් විය. මන්ද යත් එම කුරාණ වාක්‍ය මුහම්මද් නබි විසින් ගොතන ලද ඒවා නම් මෙවන් අත්‍යාවශ්‍ය මොහොතක මුහම්මද් නබිතුමා විසින් මෙම පිළිතුරු සියල්ල කළින්ම ලබා දෙන්නට තිබුණ හෙයිනි. තවද මෙම ප්‍රශ්න වලට කුරාණය ලබාදුන් පිළිතුරු වල අලංකාරවත් බව සහ විස්තරාත්මක බව මෙන්ම එවක මක්කා වාසීන් පමණක් නොව, ලොව කිසිවකු දැන නොසිටි කාරාණා විස්තරාත්මකව පැහැදිළි කිරීම හේතුවෙන් විශ්වාස කළවුන්ගේ විශ්වාසය තවත් වැඩි විය. නමුත් අවිශ්වාසකරන්නවුනට කිසිවක් සිතාගත නොහැකි විය.
එම තරුණයින් පිළිබඳ විශ්මය ජනක කථාව ඉෆසුස් වල නිදාගත්තවුන් නමින් ද හඳුන්වයි. ක්‍රි.ව තුන්වන සියවසේ තරුණයින් පිරිසක් එක් දෙවියකු පමණක් ඇදහීමෙහි නිරතවීම හේතුවෙන් ඔවුන්ගේ සමාජයෙන් ඔවුනට මරණ තර්ජන පැමිණි කල්හි ගුහාවක සැඟවීගත් ඔවුන් එහි නිදාගත්තෝය. ඔවුන් නැවතත් අවදි වූයේ වර්ෂ තුනිසීයකට පසු ප්‍රාතිහාර්යමත් ලෙසය. මෙම කථාව කුරාණයේ ඉතාමත්ම සවිස්තරාත්මකව කිසිදු ඇසකින් නොදුටු කාරණා ඇතුළත්ව විස්තර කර ඇත.
දෙවන ප්‍රශ්නයේ සඳහන් එම විශ්ෂ්ඨ සංචාරකයාගේ නම දුල්කර්නයින් හෙවත් අං දෙකක් ඇත්තා විය. කුරාණය මොහු සම්බන්ධයෙන් ඈත නැගෙනහිර සහ ඈත බටහිර සංචාරය පිලිබඳව සඳහන් කොට සංචාරය කරන ලද කිසිවකු නොදන්නා තෙවන ස්ථානයක් පිළිබඳවද සඳහන් කරයි. මෙම ස්ථානයේ යාජුජ් සහ මාජුජ් (ගොග් සහ මගොග්) ගෙන් එහි පිරිස බේරාගත් අයුරු පිළිබඳව සවිස්තරාත්මක ලෙස කරුණු ඉදිරිපත් කර ඇත.
තෙවන ප්‍රශ්නයට පිළිතුරු වශයෙන් ආත්මය මාගේ පරමාධිපතිගේ නියෝගයෙන් වූවක් බවත් එහි දැනුම අප හට දී නොමැති බවත් කුරාණයේ පවසනු ලැබිණ.
මෙම සංසිද්ධිය හේතුකොටගෙන කුරෙයිෂිවරුන් ඉස්ලාම් ආගම ගැන කිසිදු පැහැදීමක් ඇති නොවූ නමුත් වෙනත් පිරිස් ඉස්ලාම් ආගම පිළිබඳ පැහැදී ඉස්ලාම් ආගම වැළඳගත්හ. මෙසේ ඉස්ලාම් ආගමට අනුගාමිකයින් වැඩි වත්ම මුස්ලිම් වරුන්ට විරුද්ධව ක්‍රියාකාරකම් ද තීව්ර විය. ඔවුන් සිරගත කොට පහර දෙමින් කුසගින්නෙන් සහ පිපාසයෙන් රත්වූ පොළවේ වතුරවා ඔවුන් දහම අත් හරින තෙක් වධ හිංසා පමුණුවන ලදි.
ජුමා ගෝත්‍රයේ නායක උමයියා සතුව බිලාල් නමින් එක් අප්‍රිකානු වහලෙක් විය. උමයියා ඔහුව දහවලේ එළිමහනේ පොළවේ විශාල ගලක් ඔහුගේ පපුවේ තබා නුඹ මැරියවු. නැතිනම් මුහම්මද්ගේ ආගම අත් හැර නැවතත් ලාත් සහ උස්සා දෙවිවරු වන්දනා යන්නෙන් පැවසුවේයන නමුත් බිලාල් ඔහු එක්කෙනෙකි, ඔහු එක්කෙනෙකි යන්නෙන් මතුරමින් සිටියේය. අබූබක්කර් මෙය දැකීමෙන් උමයියා නුඹ අල්ලාහ්ට බිය නොවේද? මෙම අහිංසක වහලාට මෙලෙස සලකන්නේ යන්නෙන් ප්‍රශ්න කළේය. ඊට උමයියා නුඹයි මොහුගේ සිතුවිලි දූෂණය කළේ. නුඹම මොහුව බේරාගනිවු යන්නෙන් පැවසුවේය. ඒ අනුව අබූ බක්කර් විසින් උමයියා ඉල්ලූ මිළ ලබා දී ඔහුව නිදහස් කරන ලදි.
යාසිර්, සුමයියා සහ ඔවුන් දෙදෙනාට දාව උපන් පුත් අම්මාර් හටද බොහෝ වධ හිංසා පමුණුවනු ලැබී සුමයියා එම වධ හිංසා හේතුවෙන් අපවත් විය. මේ හේතුවෙන් අම්මාර් තමන් ඉස්ලාම් ආගම අත්හැරි බව පැවසුවේය. මෙලෙස බොහෝ ඉස්ලාම් බැතිමතුන් වධ හිංසා හමුවේ අසරණයට පත්ව ඉස්ලාම් ආගම අත්හැරි බව ප්‍රකාශ කළෝය. මේ නිසා මුහම්මද් නබිතුමා විසින් ඔහුගේ අනුගාමිකයින්ට ඇබිසීනියාවේ යහපත් ධර්මිෂ්ඨ රජ කෙනෙකු සිටින බවත් එය ධර්මානුකූල රටක් බවත් අල්ලාහ් විසින් නුඹලාව තමන්ගේ වධ හිංසා වලින් ගලවා ගන්නට වෙනත් මගක් පාදන තුරු නුඹලා එම රටට දේශාන්තරණය කරන ලෙස අවවාද කළේය. මේ අනුව ඇතැම් අනුගාමිකයින් ඇබිසීනියාවට දේශාන්තරණය කළෝය.