ඇබිසීනියානු ජනයා මුස්ලිම් ජනතාව සාදරයෙන් පිළිගන්නා ලදි. ඔවුනට අල්ලාහ් ඇදහීමට සම්පූර්ණ නිදහස ලබා දෙන ලදි. එලෙස දේශාන්තරණය කළ ජනතාව අසූදෙනෙකු පමණ වූ අතර ඔවුන් සියල්ලෝම එක්වර දේශාන්තරණය නොකළහ. ඔවුන් කෙමෙන් කෙමෙන් කණ්ඩායම් වශයෙන් දේශාන්තරණය කළහ. මෙය බොහෝ රහසිගත ලෙස සිදුවූ අතර බොහෝ දෙනා දේශාන්තරණය කොට ගමනාන්තය ළඟාවන තෙක් මේ බව කිසිවකු දැන නොසිටියහ. පසුව කුරෙයිෂි ජනයාට මේ බව ආරංචි වීමෙන් මෙම තත්ත්වය පිළිබඳව බියට පත්විය. තමුන්ට කිසිදු බලයක් නොමැති එම දේශයට ගොස් මෙම ආගම ව්‍යාප්ත වීමෙත් ඔවුනට තර්ජනයක් වෙතැයි බිය වූ නිසා ඔවුනට එම දේශයේ ද ජීවත් වීමට ඉඩ නොදිය යුතුයි යන අධිශ්ඨානයෙන් උපායක් සැලසුම් කළෝය. මේ අනුව ඔවුන් හම් වලින් සැදුම් ලත් භාණ්ඩ බොහෝමයක් එකතු කොට ඇබිසීනියාවේ රජතුමා (නේගුස්) ගේ අමාත්‍යවරුන්ට සහ නේගුස්ට ද බොහෝ වටිනා තිළින පිළියෙල කළහ. මෙසේ පිළියෙල කොටගත් තෑගිබෝග ද රැගෙන කුරෙයිෂිවරුන් නියෝජනය කිරීම පිණිස අම්ර් ඉබ්නුල් ආස් සහ තවත් කෙනෙකු තෝරා ඇබිසීනියාව බලා පිටත් කළහ. සැලසුම් කළ පරිදි මෙම කුරෙයිෂින් දෙදෙනා ඇබිසීනියාවට ගොස් නේගුස් ගේ අමාත්‍යවරු එකිනෙකා මුණගැසී තෑගි බෝග සියල්ල ලබා දී පෙර සැලසුම් කරගත් පරිදි මෙසේ පැවසූහ.
“අපගේ සමාජයේ මෝඩ කාන්තාවන් සහ පුරුෂයින් පිරිසක් නුඹලාගේ රාජධානියේ සෙවණ ලබා සිටීති. ඔවුන් අප අදහන ආගම අත්හැර නුඹලාගේ ද නොවන නව ආගමක් නිර්මාණයකොටගෙන අදහයි. අපගේ සමාජයේ නායකයින් ඔවුන් නියෝජනය කිරීමට අප දෙදෙනාව නුඹලාගේ රජු වෙත මේ සම්බන්ධයෙන් දැනුවත් කොට ඔවුන්ව නැවතත් අපගේ සමාජයට රැගෙන එන්නට අපව මෙහි එවන ලදි. මේ නිසා අප මෙම කාරණය නුඹලාගේ රජු වෙත ඉදිරිපත් කළ විට නුඹලාගේ එකඟත්වය මීට පළ කරව. ඔවුන් සමග කිසිදු සංවාදයක නොයෙදෙව්.”
අමාත්‍යවරු සියල්ලෝම මීට එකඟ විය. මේ අනුව මෙම කුරෙයිෂිවරු දෙදෙනා රජතුමා හමු වී අමාත්‍යවරුන්ට කළාක් මෙන් සියල්ල විස්තර කර තවද මොවුන්ගේ සමාජයේ නායකයින් මොවුන්ගේ ඥාතීන්ද වේ. මේ නිසා කරුණාකර මොවුන්ව නැවත ඔවුන්ගේ සමාජයට යවන්න යැයි පැවසුවෝය. අමාත්‍ය මණ්ඩලය එක හෙලාම මීට එකඟ වී මොවුන් පිළිබඳව වඩා හොඳින් දන්නේ මොවුන්ගේ ඥාතීන්ම වේ යන්නෙන් පවසා රජුට ඔවුන් පිටමං කිරීමට බලපෑම් කළෝය.
නමුත් මේ සියල්ල අසා සිටි රජතුමා තෘප්තිමත් නොවීය. අල්ලාහ්ගේ නාමයෙන් මට ඔවුන් පාවා දෙන්නට බැරිය. ඔවුන්ව මෙතැනට ගෙනැවිත් ප්‍රශ්න නොකර සියලු දේ නොදැන එලෙස පිටමං කරන්නේ කෙසේ ද? මගේ ආරක්ෂාව පතා සියලු රටවල් අභිබවා මාගේ රටට ගොඩවූ මෙම පුද්ගලයින් පාවා දෙන්නට මට කිසිසේත්ම හැකියාවක් නැත. ඔවුන් සියල්ල ප්‍රශ්න කළ පසු මොවුන් පවසන දෑ සත්‍ය නම් මොවුන්ගේ ඉල්ලීම පරිදි මොවුන් වෙත එම පිරිස පිටමං කළ හැක. එසේ නැතිනම් මා ඔවුන් ආරක්ෂා කිරීමට සියලු දේ කරන්නෙමියි යන්නෙන් පැවසුවේය.
මේ අනුව ඔහු මුහම්මද් නබිතුමාගේ අනුගාමිකයින් සියල්ලෝම ගෙන්වුවේය. තවද ඔහුගේ ආගමික නායකයින්ද ගෙන්වුවේය. ඔවුන් ඔවුනගේ ආගමික මූලාශ්‍ර රැගෙන සිංහාසනය ඉදිරිපිට වැතිරුවෝය. අම්ර් සහ ඔහුගේ සගයා මෙම හමුවීම පිළිබඳව බොහෝ අකමැත්තෙන් සිටියෝය. මන්දයත් ඇබිසීනියානුවන් බොහෝ දෙනා ක්‍රිස්තියාණි දහම අදහන්නන් වූහ. බොහෝ දෙනා ආගමට බොහෝ ලැදි වූ අතර භෞතීස්ම වී සිටියහ. මොවුන් මක්කා වැසියන් දේශපාලනමය සහ වෙළඳ කටයුතු සඳහා සම්බන්ධකම් පැවැත්වුව ද ඇත්තෙන්ම මක්කා වැසියන් මිථ්‍යා දෘෂ්ටිකයින් ලෙස සැලකූහ.
සියල්ලෝම පැමිණි පසු රජතුමා නැගිට මුහම්මද් නබිගේ අනුගාමිකයින් ආමන්ත්‍රණය කරමින්, කුමක් ද මේ නුඹලාව නුඹලාගේ පිරිසගෙන් වෙන් කරන ලද මේ නව දහම? යන්නෙන් ප්‍රශ්න කළේය. එහි රාජ්‍ය පරිවර්තකයින් මේ සියල්ල ඔවුනට තෙරුම් ගැනීමට අරාබි භාෂාවට පරිවර්තනය කළහ. එම සරණාගතයින් අතර සිටි මුහම්මද් නබි ගේ ඥාති සොහොයුරකු වූ ජාෆර් පිළිතුරු දිය. රජතුමනි! අප අතීතයේ දැඩි මිථ්‍යා දෘෂ්ඨිකයින්ව සිටියෙමු. පිළිම වන්දනා කළෙමු. මළ කුණු අනුභව කළේමු. පිළිකුල් සහගත දෑ කළෙමු. බලවතුන් විසින් අසරණයින් පාගා දැමුවෙමු. මෙලෙස ජීවත්වූ අප හට අල්ලාහ් විසින් අප අතරින් දූතයකු යවා ඇත. ඔහුගේ පෙළපත, ඔහුගේ සත්‍යවන්ත භාවය සහ අවංක භාවය අප දනිමු. ඔහු අප අල්ලාහ් වෙතට ආරාධනා කළේය. අල්ලාහ්ගේ ඒකීය භාවයට සාක්ෂි දරා අපගේ මුතුන් මිත්තන් අදහන ලද ගල් පිලිම අත්හරින්නට අවවාද කළේය. අපට සත්‍යය පවසන්නටත්, පොරොන්දු ඉටු කරන්නටත්, ඥාති සබඳතා පවත්වාගන්නටත් අසල්වැසියන්ගේ අයිතිවාසිකම් සුරකින්නටත්, අපරාධ සහ ලේ ගැලීම් වලින් වලකින්නටත් ධෛර්යමත් කළේය. මේ නිසා අප අල්ලාහ්ව පමණක් නමදින්නෙමු. ඔහුට සමාන කිසිවක් නොතබන්නෙමු. ඔහු අනුමත කළ දෑ භුක්ති වඳින්නෙමු. අනුමත නොකළ දෑ බැහැර කරන්නෙමු. මේ හේතුවෙන් අපගේ ජනතාව අපට විරුද්ධ වී ඇත. අපට වධ හිංසා පමුණුවා අපට අපගේ ධර්මයෙන් වැලකී නැවත පිලිම වන්දනාවට යොමු කරවීමට උත්සාහ කරන්නෝය. මේ නිසා අප අන් සියල්ලන් අභිබවා නුඹව තෝරාගෙන නුඹලාගේ දේශයට පැමිණියෙමු. නුඹගේ ආරක්ෂාව හමුවේ අප සතුටු වන්නෙමු. මේ නිසා රජතුමනි! නුඹේ පාලනයෙන් අපට කිසිදු අසාධාරණයක් නොවෙතියි අප අපේක්ෂා කරන්නෙමු යන්නෙන් පැවසුවේය.
මේ සියල්ල රාජකීය පරිවර්තකයින් විසින් පරිවර්තනය කළායින් පසුව රජු ඔවුන් සතුව ඇති අල්ලාහ් පහළ කරන ලද දේව වාක්‍ය කිහිපයක් පාරායනා කරන ලෙස පැවසුවේය. මේ අනුව ජාෆර් විසින් මෑතකදී පහළ වූ මර්යම් නම් පරිච්ඡෙදයයේ පද කිහිපයක් පාරායනා කළේය. “තවද මර්යම් ගැන ග්‍රන්ථයේ සඳහන් දෑ මතක් කරනු. ඇය සිය ජනතාවගෙන් ඉවත්ව නැගෙනහිර දෙස ස්ථානයකට ගිය විට, ඇය තමා සහ ඔවුන් අතර තිරයක් දමාගත්තාය. පසුව අප අපගේ සුරදූතයාව ඇය වෙතට යැව්වෙමු. ඇයට ඔහු සෑම අතින්ම මිනිසකු ලෙස දිස්විය. එවිට ඇය මම ඔබෙන් මිදීමට මහා කාරුණිකයාගෙන් ආරක්ෂාව පතමි. ඇත්තෙන්ම ඔබ ඔහු කෙරෙහි බියවන්නේ නම් යැයි ඇය කීවාය.” (අල්කුර්ආණ් 19 18-19)
“මා ඔබ වෙත පිවිතුරු පුත්‍රයකු පිළිබඳ සුභාරංචිය පිරිනමනු පිණිස ඔබේ අධිපතියාණන් විසින් යවන ලද පණිවුඩකරුවකු පමණක් වෙමියි පිළිතුරු දිය. එයට ඇය මා හට කෙසේ දරුවකු ලැබිය හැකිද? කිසිදු මිනිසකු මා ස්පර්ෂ කර නොමැති අතර මා අපචාරී කාන්තවක්ද නොවෙමියි පැවසුවාය.” (අල්කුර්ආණ් 19 20-21)
“එලෙසමය. එය මට පහසු කාර්යයකි. තවද අප ඔහුව මිනිසුන්ට සාධකයක් ලෙසද දයාවක් වශයෙන්ද පත්කරන්නෙමු. මෙය නිශ්චය කරනලද කාරණයකියි ඔබේ අධිපතියාණන් පැවසූබව දැනුම්දිය.” (අල්කුර්ආණ් 19 22)
මෙම කුරාණ වාක්‍යයන් හමුවේ රජතුමාගේ නෙත් කඳුලින් තෙත් විය. ඔහුගේ පූජකවරුන්ගේ ද නෙත් කඳුලින් තෙත් විය. මෙම වාක්‍යයන් ඇත්තෙන්ම පහළ වී ඇත්තේ ජේසුස් වහන්ස වෙත වදන් පහළ කරන ලද එම මූලාශ්‍රයෙන්මය. පසුව ඔහු කුරෙයිෂින් දෙස බලා නුඹලාට යත හැක. අල්ලාහ්ගේ නාමයෙන් අප ඔවුන් නුඹලා හට පාවාදෙන්නේ නැත යනුවෙන් පැවසුවේය.
නමුත් රජ මාලිගාවෙන් පිටත පැමිණි පසුව සිදුවීම දරාගත නොහැකි වූ කුරෙයිෂින් දෙදෙනා නැවතත් කරුණු සොයා බලා තවත් සැලසුමක් සකස් කළෝය. මේ අනුව ඔවුන් නැවතත් රජතුමා බැහැ දැක රජතුමණි! මොවුන් මරියම්ගේ පුත් ජේසුතුමා පිළිබඳව විශාල බොරුවක් ප්‍රචාරය කරයි. ඔවුන් ජේසුතමා දෙවියන්ගේ පුත් නොවන බවත් ඔහු වහලකු බවත් ප්‍රකාශ කරයි යන්නෙන් පැවසුවෝය. මේ අනුව රජතුමා ඔවුන් නැවතත් කැඳවන ලදි. සිදුවීම ආරංචි වූ මුස්ලිම්වරු තරමක් කලබල වී මෙම ප්‍රශ්නය හමුවේ කුමක් පවසන්නේදැයි සාකච්ඡා කළ අතර ඔවුනට අල්ලාහ් පවසන ලද සත්‍යය පැවසීම හැර වෙනත් විකල්පයක් නොමැති බවට එකඟ විය. මේ අනුව ඔවුන් රජ මාලිගාවට අතුළු වුණු විට නුඹලා මරියම්ගේ පුත් යේසුස් පිළිබඳව කුමක් පවසන්නේදැයි රජු විසින් ප්‍රශ්න කළේය. අප පවසන්නෙ අපගේ නබිතුමාණන් අපට පැවසූ දෙයමය. යේසුස් වහන්ස අල්ලාහ්ගේ වහලෙකි, දූතයෙකි, ඔහුගේ ආත්මයයි, භාග්‍යමත් කන්‍යා මරියම් හට දෙන ලද ඔහුගේ වචනයයි යන්නෙන් ජාෆර් පිළිතුරු දිය. මීට රජතුමා කුඩා ලී කැබැල්ලක් අතට ගෙන යේසුස් වහන්ස නුඹ පැවසූ දැයට වැඩිය මෙම ලී කැබැල්ලේ දිග තරමටවත් කිසිදු අයුරකිනි වැඩි නොවන්නේය යන්නෙන් පැවසුවේය. මෙම පිළිතුර හමුවේ එහි සිටි අමාත්‍ය මණ්ඩලයේ සියලු දෙනා වාද කරන්නට විය. මෙවිට රජතුමා හණිකට ජාෆර් සහ ඔහුගේ සගයින්ට පිටත් වන ලෙස පවසා නුඹලා මාගේ දේශයේ ආරක්ෂිතය. රත්තරන් කන්දක් දුන්නත් මා නුඹලාට හිරිහැර නොකරමියි පවසා කුරෙයිෂිවරුන් දෙදෙනා හට ඔවුන් ගෙන ආ තිළිණ නැවත භාර දෙන ලෙස අණ කළේය. මේ අනුව අම්ර් සහ ඔහුගේ සගයා නින්දාවට පත්ව නැවතත් මක්කාව බලා පිටත් වූහ.