යත්‍රීබ් නුවර අවුස් සහ කස්රජ් වාංශිකයින් සිවිල් යුද්ධ හතරකින් පසුව දැන් තාවකාලිකව සටන නතර කර සිටියෝය. මේ හේතුවෙන් මොවුන් සියලු දෙනාවම ඒකරාශි කළ හැකි නායකයකුගේ අවශ්‍යතාවය මොවුන් සියලු දෙනාට දැනෙන්නට විය. මේ හැරුණුකොට වෛරයෙන් සහ නපුරින් පිරිහුණු මොවුනට වෙන කිසිදු පිළිසරණක් නොවීය. මෙම ක්ෂේමභූමියේ අබ්දල්ලාහ් ඉබ්නූ උබෙයි නමින් කස්රජ් වංශයට අයත් පිළිගත් නායකයකු සිටියේය. මෑත සටනේ ඔහුගේ භට පිරිස් අවසන් මොහොතේදී පසුබැසීය. කෙසේ වෙතත් අවුස් තවමත් මොහු කස්රජ් වංශයට අයත් වීම හේතුවෙන් මොහුව නායකයකු ලෙස පිළිගැනීම සැක සහිතය.
පසුගිය වසරේ අකබාහි හමුවූ කස්රජ් වාංශිකයින් සය දෙනා නැවතත් මෙම වසරේ තවත් පස් දෙනෙකු සමග මුහම්මද් නබිතුමාව අකබාහි හමුවිය. මොවුන්ගෙන් දෙදෙනෙකු අවුස් වංශයට අයත් වූවන් විය. පළමු අකබා ලෙස නම් වුණු මෙම දිනයේ මොවුන් දොළොස් දෙනා මුහම්මද් නබි තුමා වෙත “මෙම පළමු අකබා දිනයෙහි අල්ලාහ් සමග වෙනත් කිසිවකු අදේශ නොකරන බවටත්, සොරකම් නොකරන බවටත්, කාම මථ්‍යාචාරයේ නොයෙදෙන බවටත්, අපගේ කුඩා දරුවන් ඝාතනය නොකරන බවටත්, කේලාම් අපවාද නොනගන බවටත් නුඹ පෙන්වා දෙන නිවැරදි මාර්ගයට පිටු නොපාන බවටත් අල්ලාහ්ගේ දූතයාණන්ට අවනත වන බවටත්” ප්‍රතිඥා දුන්නෝය. ඊට පිළිතුරු දුන් මුහම්මද් නබිතුමා, නුඹලා මෙම ප්‍රතිඥාව ඉෂ්ඨ කළහොත් ස්වර්ගය නුඹලාටය. මෙම පවු වලින් කිසිවක නැවත නියැලුනහොත් ඊට ප්‍රයශ්චිත්තයක් ලෙස නුඹලාට මෙම ලොවෙහිම දඬුමකට යටත් විය හැක. නමුත් එම පව නැවත නැගිටුවන දිනය තෙක් සැඟවූවේ නම් දඬුම් කිරීම හෝ සමාව දීම අල්ලාහ්ට භාරය යන්නෙන් පැවසුවේය. පසුව මුහම්මද් නබිතුමා ඔහුගේ අනුගාමිකයකු වූ මුසාබ් අබ්ද් අද්දාර් නම් පුද්ගලයාව මොවුන් සමග ඉස්ලාම් ධර්මය සහ කුරාණය ඉගැන්වීම පිණිස යත්‍රිබ් නුවරට යවන ලදි. මොහු පළමු සය දෙනා ගෙන් කෙනෙකු වූ අසාද් ඉබ්නූ සුරාරා සමග ලැගුම් ගත්තේය.
කස්රජ් ගෝත්‍රයේ සාමාජිකයකු වූ අසාද් ගේ ඥාතියකු වූ සාද් ඉබ්නු මුආද් අවුස් ගෝත්‍රයේ බලවත් නායක‌යෙකි. සාද් මෙම නව ආගමට තරයේ විරුද්ධ විය. නමුත් ඔහුගේ ඥාති සොයුරු අසාද් හට මේ බව ඍජුවම පැවසීමට පැකිළුණු ඔහු ඔහුගේ සගයකු වූ උසයිද් හට එම උද්‍යානයේ වාඩි වී සාකච්ඡාවක නියැලෙමින් සිටි එම ඉස්ලාම් බැතිමතුන් පෙන්වා අපගේ දුබලයින්ව ගොනාට අන්දන්න පැමිණි එම පුද්ගලයින් වෙත ගොස් මෙතැනින් පිටුවහල් කරනු. අපගේ දේශයට පැමිණීම තහනම් කරනු. අසාද් මාගේ ඥාතියකු නොවූවා නම් මෙම කර්තව්‍යය නුඹට භාර නොදී මා විසින්ම කරන්නෙමි යන්නෙන් පැවසුවේය. මේ අනුව උසෛද් ඔවුන් වෙත ගොස් අපගේ දුබලයින් ගොනාට අන්දන්න ද නුඹලා මෙහි පැමිණියේ? නුඹලාගේ ජීවිත වලට නුඹලා ආදරෙයි නම් වහාම මෙම රටින් පිට වනු යන්නෙන් සැර හඬින් කෑ ගැසුවේය. ඊට සවන් දුන් මක්කාවාසී මුසාබ් ඔහු දෙස බලා ඉතාමත් සාමකාමී ලෙස මෙතැනින් වාඩි වී මා පවසන දෙයට සවන්දී නුඹ ඊට එකඟ නම් අප හා එකතු වනු. එසේ නැතිනම් අපෙන් වෙන් වනු යන්නෙන් පැවසුවේය. එය සාධාරණ ඉල්ලීමක් යැයි සිතූ උසෛද් වාඩි විය. මුසාද් ඉස්ලාම් දහම සම්බන්ධයෙන් සියලු දෑ ඔහුට පවසා කුරාණයේ වාක්‍යයන් කිහිපයක් ද පාරායණා කර පෙන්වුවේය. කෙතරම් අලංකාර ද මෙම වචන යන්නෙන් උසෛද් පැවසුවේය. මෙම දහම වැළඳගැනීමට මා කුමක් කළ යුතුදැයි ඔහු ප්‍රශ්න කළේය. පවිත්‍ර වස්ත්‍රයන් ඇඳ හිස සිට පාදය දක්වා දෝවනය කර අල්ලාහ් හැර නැමදීමට සුදුසු වෙනත් කවරෙකුවත් නොමැත. මුහම්මද් අල්ලාහ්ගේ දූතයා යැයි සාක්ෂි දරමි යන්නෙන් පවසා ඉස්ලාම් ආගම වැළඳ ගන්නා අයුරු ඔහුට පෙන්වා දුන්නෝය. පසුව අල්ලාහ් නමදින අයුරු ද පෙන්වා දුන්නෝය. පසුව ඔහු මා පිටුපස එක් පුද්ගලයෙක් සිටියි. ඔහු ඉස්ලාම් දහම වැළඳ ගතහොත් ඔහුගේ සමූහයම ඉස්ලාම් දහම වැළඳගනු ඇත. මා ඔහුව නුඹ වෙතට එවන්නම් යන්නෙන් පවසා නික්ම ගියේය.
නුඹ කුමක් කළෙහිදැයි සාද් ඇසීය. මා ඔවුන් සමග කථා කළෙමි. ඔවුන්ගෙන් කිසිදු හාණියක් නැත යන්නෙන් උසෛද් දිවුරා පැවසුවේය. නුඹෙන් කිසි වැඩක් නැත යන්නෙන් පවසා විශ්වාස කරන්නන් උද්‍යානයේ වාඩි වී සිටි පෙදෙසට ගොස් ඔහුගේ ඥාති සොයුරු අසාද්ට බැන වැදී තම ඥාතිත්වයෙන් ප්‍රයෝජන ගන්නා බව චෝදනා කළේය. මුසාබ් ඊට හරස් වී උසෛද් සමග සංවාදයේ යෙදුනු අයුරින්ම මොහුත් සමග ද සංවාදයේ යෙදුනේය. අවසානයේ ප්‍රථිඵලය සමාන විය. අසාද් ද ඉස්ලාම් දහම වැළඳගන්නා ලදි.
පසුව සාද් උසෛද් ද කැටුව ඔවුන් නියෝජනය කළ ජනතාව වෙත ගොස් ඔවුන් ආමන්ත්‍රණය කළෝය. ජනයිනි! මා නුඹලා හමුවේ කවුරුන් ද? නුඹ අපට සේවය කරන අපගේ නායකයා ය. අප අතරින් සාධාරණව තීරණය ගත හැකි සහ සුභවාදීම නායකයාය යන්නෙන් ඔවුන් පිළිතුරු දිය. එසේ නම් මා කියන දේ අසවු. නුඹලා අල්ලාහ් සහ ඔහුගේ දූතයා පිළිබඳව විශ්වාස කරන තුරු මා නුඹලාගේ පිරිමින් සමග හෝ නුඹලාගේ කාන්තාවන් සමග හෝ කිසිදු සංවාදයක නොයෙදෙමි යන්නෙන් පවසා නික්ම ගියේය. රාත්‍රිය උදාවන්නටත් පෙර ඔවුන් සියලු දෙනා ඉස්ලාම් දහම වැළඳ ගත්තෝය.
මුසාබ් ඔවුන් සමග මාස එකොළහක් සිටියේය. ඔහු තුළින් බොහෝ දෙනා ඉස්ලාම් දහම වැළඳගත්හ. ඊළඟ වන්දනා සමය උදාවන්නට ප්‍රථම ඔහු මක්කාවට ගොස් නබිතුමා හට අවුස් සහ කස්රජ් කුලයන් ඉස්ලාම් දහම තුළින් සාමය අත්කරගත් එම සුභ පුවත ලබා දුන්නේය.
මුහම්මද් නබිතුමාගේ මාමා කෙනෙකු වූ අබ්බාස් තවමත් ඉස්ලාම් දහම වැළඳගෙන සිටියේ නැත. නමුත් මුහම්ද් නබිතුමා ඔහු කිසි දිනක තමන්ගේ රහසක් හෙළි නොකරන බවට විශ්වාස කළේය. මේ හේතුවෙන් ඔහු අබ්බාස් වෙත ගොස් යත්‍රිබ් නුවරින් තමන් හමුවන්නට පැමිණෙන්නට නියමිත් නියෝජිතයින් පිළිබඳව ඔහුට හෙළි කළේය. මීට සවන් දුන් අබ්බාස් මුහම්මද් නබිතුමා සමග මෙම ගමන යෑම ඔහුගේ වගකීමක් බවට පත්කරගත්තේය. තීරණය කරගත් පරිදි යත්‍රිබ් වැසියන්ගේ නියෝජිතයින් අකබාවට පැමිණියෝය. මුහම්මද් නබිතුමා අබ්බාස් සමග වාඩි වී සිටියෝය. අබ්බාස් නැගිට පළමුව කථා කරන්නට පටන් ගත්තේය. කස්රජ් වැසියනි! අප මුහම්මද්ට කෙතරම් ගරු කරන්නේදැයි නුඹලා දන්නෙහිය. අප ඔහුව ඔහුගේ මිනිසුන්ගෙන් ඔහුව බේරාගෙන ඔහුගේ කුලයේ ගෞරවනීය සථානයක් ලබාදී ඔහුගේ රටේ ඔහුව ආරක්ෂා කර ඇත්තෙමු. නමුත් ඔහු නුඹලා සමග එක්වන්නට තීරණය කර ඇත්තෙහිය. මේ නිසා නුඹලා නුඹලාගේ දිවුරීමේ සත්‍යවාදිහු නම් ඔහුව සියලු බාධක සහ සතුරන්ගෙන් ආරක්ෂා කරන්නෙහු නම් ඔහු නුඹලාට භාරය. නමුත් නුඹලා පසුව බාධක හමුවේ ඔහුව පාවා දෙන්නෙහි නම් දැන්ම ඔහුව අත් හරිනු.
ඊට යත්‍රීබ් වාසීන් සියල්ලෝම එකඟ විය. මොවුන් අතර යත්‍රීබ් වාසීන් හැත්තෑ පස් දෙනෙකු සිටි අතර මොවුනගෙන් දොළොස් දෙනෙකු නායකයන් ලෙස තොරාගන්නා ලෙස මුහම්මද් නබිතුමා උපදෙස් දුන්නේය. මේ අනුව මොවුන් සියලු දෙනා එකිනෙකා මුහම්මද් නබි තුමාට ප්‍රතිඥා දෙන ලදි.