මදීනා පල්ලිය සම්පූර්ණයෙන් නිම වීමට මාස හතක් පමණ ගත විය. පසුව මෙම පල්ලිය දෙපස ඔහුගේ බිරින්දෑවරු දෙදෙනා වන සවුදා සහ අයිෂා සඳහා කුඩා නිවෙස් දෙකක් සෑදීමට ඔහු උපදෙස් දුන්නේය. පසුව ඔහු සවුදා, උම් කුලතුම්, ෆාතිමා, ආයිෂා, රුමාන්, සහ අස්මා යන මුහම්මද් නබිතුමා සහ අබූබක්කර්ගේ පවුලේ උදවිය රැගෙන ඒම පිණිස සෛද් සහ අබ්දල්ලාහ් යන අයට උපදෙස් දිය. ඊට අමතරව සෛද් ඔහුගේ බිරිඳ උම් අයිමාන් සහ ඔහුගේ පුත් උසාමාවද රැගෙන ආවේය.
මුහම්මද් නබිතුමා පුතකු ලෙස හදා වඩා ගත් සෛද් මේ වන විට උම් අයිමාන් නම් කාන්තාවක් විවාහ කරගෙන සිටි අතර දැන් ඔහුට තවත් විවාහයක් සිදු කරගැනීමට මුහම්මද් නබිතුමා යෝජනා කළේය. බහු භාර්යා විවාහය එවක අරාබියේ සුලබ සම්ප්‍රදායක් වුවද ඇතැම් විට මදීනාවෙහි කාන්තා ජනගහනය පුරුෂ ජනගහනයට වඩා වැඩි වීම හේතුවෙන් ඊට විසඳුමක් ලෙස මෙලෙස බහු භාර්යා විවාහය ඔහු ධෛර්යමත් කළා විය හැක. මේ අනුව මුහම්මද් නබිතුමා විසින් සෛනබ් නම් අලංකාර කාන්තාවක් මේ සඳහා යෝජනා කළේය. සෛනබ් මුලදී මෙම විවාහයට අකමැති වුවද මුහම්මද් නබිතුමාගේ ඉල්ලීමට පිටුපෑමට මැළිවීම හේතුවෙන් එකඟ විය.
මුහම්මද් නබිතුමා ඔහුගේ දූවරු සමග සවුදාගේ නිවසේ ජීවත් විය. ටික කාලයකට පසුව මුහම්මද් නබිතුමා සහ ආයිෂා අතර විවාහ මංගල්‍යය ද නියම විය. මේ වන විට ආයිෂාට වයස අවුරුදු නවයක් විය. මුහම්මද් නබිතුමා අබූබක්කර් සමග තිබූ ඉතාමත්ම සමීප සම්බන්ධය හේතුවෙන් ආයිෂා හට මුහම්මද් නබිතුමා ඉතාමත්ම හුරු පුරුදු පුද්ගලයකු විය. විවාහ මංගල්‍යය ඉතාමත්ම චාම් ලෙස පැවැත් වුණි. එවක මදීනාවෙහි බලවත්ම පුද්ගලයා සමග ඇය විවාහ වී සිටිය ද ඇය ඇගේ පියාගේ නිවස වෙනුවට මුහම්මද් නබිතුමාගේ නිවසේ ජීවත් වීමට සිදුවීම හැරුනුකොට ඇයගේ ජීවිතයේ එතරම් වෙනසක් නොදැණුනු බව පසු කළක ඇය පවසා තිබේ. ඇය සාමාන්‍ය පරිදි ඇගේ මිතුරියන් සහ බෝනික්කන් සමග සෙල්ලම් කරමින් සිටි බවත් ඇතැම් විට මුහම්මද් නබිතුමා ද ඇය සහ ඇගේ මිතුරියන් සමග සෙල්ලම් කළ බවත් පවසා තිබේ. ඇතැම් විට ඇගේ මිතුරියන් සමග නිවසේ කල් ගත කළ අවස්ථාවේ මුහම්මද් නබිතුමා පැමිණෙනු දුටු විට ඔවුන් එතැනින් පිටවන්ට ලැහැස්ති විය. මෙය දුටු මුහම්මද් නබිතුමා නුඹලා නොසෙල්වී සිටු යන්නෙන් පවසා ඔවුන් එතැනින් පිටවීමෙන් වැලැක්වා සේල්ලම් කරන්නට ධෛර්යමත් කළේය.