සියලු වංශවල සාමාජිකයින් විසින් සිරබාරයට ගෙන සිටි ඔවුනගේ ඥාතීන් නිදහස් කරගැනීම පිණිස විටින් විට මදීනාවට පැමිණියෝය. මුහම්මද් නබිතුමාගේ බිරිඳ සවුදා ගේ මස්සිනා සුහෛල් ද සිරකරුවන් අතර විය. ඇගේ වංශයේ නායකායා වූ සුහෛල් දෑත් ගෙල පසුපස බැඳ තිබූ අයුරු දැක කම්පනයට පත්ව ඇගේ පැරණි සිතුම් මතු වී නුඹ යුද පිටියේම වීරයකු ලෙස මැරී තිබුණේ නම් මා වඩා සතුටට පත් වෙමියි පැවසුවාය. මෙය ඇසුණු මුහම්මද් නබිතුමා සවුදා හට නුඹ අල්ලාහ් සහ ඔහුගේ දූතයාට එරෙහිව කරදර ඇති කරන්නේ දැයි ප්‍රශ්ණ කළේය. එවිට සවුදා ඇය කළ ප්‍රකාශයේ වරද තේරුම්ගෙන පසුතැවිලි විය. නොබෝ දිනකින් සුහෛල්ගේ වංශයෙන් පිරිසක් පැමිණ ඔහුව නිදහස් කරගෙන ගියෝය.
අන්සාරිවරු කිහිප දෙනෙකු ඔවුන් භාරයේ සිටි අබ්බාස් රැගෙන මුහම්මද් නබිතුමා වෙත ගොස් මුහම්මද් නබිතුමාව සතුටු කිරීමේ අරමුණින් අල්ලාහ්ගේ දූතයාණෙනි! අපට මොහුව කප්පම් නොගෙන නිදහස් කරන්නට අනුමැතිය දෙනු යන්නෙන් පැවසුවෝය. ඊට එකඟ නොවූ මුහම්මද් නබිතුමා ඔහුගේ මාමා අබ්බාස් දෙස බලා අබ්බාස් නුඹ ධනවත් තැනැත්තෙක්. මේ නිසා නුඹ නුඹව, නුඹේ බෑනන් අකිල් සහ නවුෆල් සහ නුඹේ මිත්‍රයා උත්බාව ද කප්පම් ගෙවා නිදහස් කරගනු යන්නෙන් පැවසුවේය. අබ්බාස් මීට විරුද්ධ වී මා කළින් සිටම මුස්ලිම්වරයකු ව සිටියෙමි. නමුත් මාගේ මිනිසුන් මාව සටනට පෙළඹුවෝය යන්නෙන් පැවසුවේය. නුඹේ ඉස්ලාම් දහම පිළිබඳව අල්ලාහ් වඩාත් හො‍ඳින් දනී. නුඹ පවසන්නේ සත්‍යය නම් ඔහු නුඹට ඒ සඳහා තිළිණ කරයි. නමුත් එළිපිට නුඹ අපට විරුද්ධව සටන් කළෙහුය. මේ නිසා අපට කප්පම් ගෙවනු යන්නෙන් පැවසුවේය. ඊට අබ්බාස් ඔහු සතුව මුදල් නොමැති බව ප්‍රකාශ කළේය. එසේ නම් නුඹ ෆද්ල්ගේ මව වෙත භාර දුන් මුදල් කොහිද? නුඹ සටනින් මරණයට පත් වූවහොත් ෆද්ල්ට, අබ්දල්ලාට, කිතාම්ට සහ උබයිදල්ලාට මෙපමණ බැගින් ගෙවන්නට උපදෙස් දී ඇයට දුන් මුදල් වලට කුමක් සිදුවී දැයි ඔහු ප්‍රශ්ණ කළේය. නුඹව සත්‍යය සමග එවනු ලැබූ ඔහුගේ නමින් දිවුරා පවසන්නෙමි! මා සහ ඇය හැරෙන්නට වෙන කිසිවකු මේ පිළිබඳව දැන සිටියේ නැත. නුඹ අල්ලාහ්ගේ දුතයා බව මා පිළිගනිමියි පවසා මුහම්මද් නබිතුමාගේ නියෝගය පරිදි කප්පම් ගෙවා ඔහුව, ඔහුගේ බෑනන් සහ මිත්‍රයා නිදහස් කරන්නට එකඟ විය.
තවත් සිර කරුවකු වූ මුහම්මද් නබිතුමාගේ බෑනා හෙවත් සෛනබ්ගේ සැමියා වන අබුල් ආස් නිදහස් කරගැනීමට ඔහුගේ සොහොයුරු අම්ර් පැමිණ සිටියේය. ඔහුව නිදහස් කිරීම පිණිස මුදල් සමග මාලයක් ද සෛනබ් අම්ර් සමග යවා තිබුණි. මෙම මාළය දුටු විගස මුහම්මද් නබිතුමා හට දැඩි ශෝකයක් ඇති විය. මෙය ඔහුගේ ආදරණීය බිරිඳ කතීජා විසින් ඇගේ දුවට දෙන ලද මාළයයි. මුහම්මද් නබිතුමා අබුල් ආස්ව සන්තකයේ තබා සිටි මුස්ලිම්වරු වෙත එම මාළය නැවත සිරකරුට ලබා දී ඔහුව නිදහස් කරන ලෙසට ඉල්ලා සිටියේය. ඔවුන් මාළය සහ මුදල් ද නැවතත් සිරකරු වෙත ලබා දී නිදහස් කළෝය. ඔහු මක්කාව බලා පිටත්වන විට මුහම්මද් නබිතුමා ඔහුට සෛනබ්ව මදීනාවට එවන ලෙස පැවසුවේය. ඔහු ශෝකයෙන් ඊට එකඟ විය.
අබ්දල්ලා ඉබ්නු ජහ්ෂ් සතුව වලිද් නම් තරුණයෙක් සිරබාරයේ සිටියේය. මොහු මක්සූම් වංශයේ නායකයකුව සිටි මරණයට පත්වූ වලිද් ගේ අවසාන පුතුය. ඔහුගේ සොයුරන් කාලිද් සහ හිශාම් ඔහුව නිදහස් කරගෙන යාමට පැමිණියෝය. මුහම්මද් නබිතුමාගේ උපදෙස් අනුව ඔහුගේ පියාගේ සුප්‍රකට යුද ඇඳුම් කප්පම් ලෙස ලබා ඔහුව නිදහස් කළෝය. නිදහස ලබා මක්කාවට යන අතරතුර ඔහු ඔහුගේ සොයුරන්ගෙන් ගැලවී මුහම්මද් නබිතුමා වෙතට ගොස් ඉස්ලාම් දහම වැළඳගත් බවට ප්‍රතිඥා දිය. මෙය දුටු කාලිද් දැඩි ලෙස කෝපයට පත්ව අපේ පියාගේ වටිනා වස්තුව දී නුඹව නිදහස් කරන්නට පෙර ඇයි මෙය නොකළේ යැයි ප්‍රශ්ණ කළේය. ඊට පිළිතුරු දුන් වලිද් මා කප්පම් ගෙවීමෙන් වැලකීම පිණිස ඉස්ලාම් දහම වැළඳගත් බව කවුරුත් සිතනවාට අකමැත්තෙමියි ඔහු පැවසුවේය. පසුව ඔහුගේ සොයුරන් පිළිබඳව දැඩි විශ්වාසයකින් යුතුව ඔහුගේ ඇතැම් බඩු බාහිරාදිය රැගෙන ඒම පිණිස සොයුරන් සමග මක්කාව බලා පිටත් විය. නමුත් මක්කාවට ගිය පසු ඔවුන් අයාෂ් සහ සලාමා නම් අනෙක් ඉස්ලාම් දහම වැළඳගත්තවුන් සමග ඔහුව සිරගත කළෝය.