මුහම්මද් නබිතුමාගේ ඥාති සොහොයුරකු සහ මුස්ලිම්වරුන්ගේ දැඩි සතුරකු වූ අබූ සුෆියාන් සතු විශාල වෙළෙඳ තවලමක් සිරියාවෙහි සිට මක්කාව බලා පිටත්වීමට නියමිතව තිබුණි. මෙම තවලම පිළිබඳ තොරතුරු රැගෙන ඒමට තල්හා සහ සෛද්ගේ පුත් සාඉද් මදීනාවට බටහිරින් පිහිටි හවුරා නම් වෙරළ තීරයට පිටත් කරනු ලැබීය. නමුත් මේ අතරතුර යම් කුහකයකු විසින් මුහම්මද් නබිතුමාගේ මෙම සැලැස්ම පිළිබඳව අබූ සුෆියාන්ට දන්වන ලදි. වහාම ක්‍රියාත්මක වූ අබූ සුෆියාන් ගිෆාරි වංශයට අයත් දම් දම් නම් පුද්ගලයකුට හැකි ඉක්මණින් මක්කාවට ගොස් මෙම තොරතුර කුරෙයිෂින්ට දන්වා තවලම ආරක්ෂා කිරීමට වහාම විශාල භට පිරිසක් යවන ලෙසට ඉල්ලා සිටියේය.
මුහම්මද් නබිතුමා තොරතුරු රැගෙන එන ලෙසට යවන ලද පුද්ගලයින් දෙදෙනා තවමත් පැමිණ නැත. මේ අතරතුර මුහම්මද් නබිතුමාගේ ආදරණීය දුව රුකෛයාට ඉතාමත්ම අසනීප විය. නමුත් පුද්ගලික කාරණා මෙහිදී සැලකිය නොහැක. තවත් ප්‍රමාද නොවීමට තීරණය කළ මුහම්මද් නබිතුමා තල්හා සහ සාඉද් පැමිණෙන්නටත් පෙර මක්කා මුහාජිරීන්වරු සහ මදීනා අන්සාරිවරු අතුළු තුන්සිය පහක ක සේනාවක් ද සමග මදීනාවෙන් පිටත් විය. මේ වන විට මදීනාවෙහි මුහාජිරීන්වරු හැත්තෑ හත්දෙනෙකු ජීවත් වූ අතර ඔවුන් අතරින් තිදෙනෙකු හැර අන් සියලු දෙනා මෙම අවස්ථාවට සහභාගී විය. මුහම්මද් නබිතුමාගේ දුව රුකෛයා අසනීප වී සිටි හෙයින් මුහම්මද් නබිතුමා ඔහුගේ බෑනා උත්මාන් හට ඇයව රැක බලා ගන්නට උපදෙස් දී තිබුණු අතර අනෙක් දෙදෙනා හවුරා වෙරළ සිට පැමිණි තල්හා සහ සාඉදි විය. මොවුන් සමග ඔටුවන් හැත්තෑ දෙනෙකු ගමන් කළෝය.
මේ අතර දම් දම් මක්කාවට පිවිස කුරෙයිෂි වරුණි! අබූ සුෆියාන් සතුව ඇති නුඹලාගේ වෙළෙඳ භාණ්ඩ අණතුරේ! මුහම්මද් සහ ඔහුගේ පිරිස තවලම ආක්‍රමණය කරන්නට සැරසෙයි. උදව් කරනු! උදවු කරනු! යන්නෙන් කෑ ගැසුවේය. මෙම පුවතින් නගරය සහමුලින්ම කැළඹිණි. මෙම අණතුරට පත්ව ඇති තවලම වාර්ෂිකව පැමිණෙන විශාලතම තවලම් වලින් එකකි. වහාම සියලු වංශ වලි කුරෙයිෂින් දහසක පමණ සේනාවක් එකතු විය. මුහම්මද් කුමක් සිතන්නේද? මෙයත් ඉබ්නූල් හාද්‍රාමිගේ තවලම මෙන් යැයි සිතුවේද? අබූ ලහබ් හැරුණුකොට අනෙක් සියලුම වංශ වල නායකයින් බලඇණියක් බැගින් මෙහෙයවූවෝය. මොවුනතර මුහම්මද් නබිතුමාට බෙහෙවින් සමීප මාමා කෙනෙකු වූ අබ්බාස් මෙන්ම කතීජාගේ බෑනෙකු වූ හකීම් ද ඇතුළු මුහම්මද් නබිතුමාත් සමග ගැටුම් ඇතිකිරීමට අකමැති පිරිස්ද නොසිටියා නොවේ. මොවුන් හට මුහම්මද් නබිතුමාට එරෙහි වීමට අවශ්‍ය නොවූ නමුත් අනෙක් කුරෙයිෂිවරුන් සමග ඇති එකඟත්වය හේතුවෙන් සටනට සහභාගී වීමට සිදු විය.
මේ වන විට මුහම්මද් නබිතුමා සිරියාවෙහි සිට මක්කාව දෙසට ගමන් කරන තවලම් සඳහා නැවතුම් පොළක් වූ බද්ර් දෙසට ගමන් කරන්නට විය. ඔහුගේ සැලසුම වූයේ අබූ සුෆියාන්ගේ තවලම මෙම ස්ථානයේදී මෙල්ල කිරීමටයි. බද්ර්හි ළිං අසල කන්දක් ඉහල ඔවුන් ලැගුම් ගත්හ. මෙම ප්‍රදේශය හොඳින් දන්නා පුද්ගලයින් දෙදෙනෙකු තවලම පිළිබඳ තොරතුරු රැගෙන ඒමට යවන ලදි. තවලම දින දෙකකින් පමණ පැමිණෙන බවට තොරතුරු ලැබැණි. මේ අතරතුර අබූ සුෆියාන් තනිවම අසු පිටින් මෙම ළිං අසලට පැමිණ ප්‍රදේශ වාසියකුගෙන් අමුත්තන් කිසිවකු මෙහි ගැවසෙනු දැක්කේ දැයි විමසුවේය. ඊට පිළිතුරු දුන් එම ප්‍රදේශ වාසියා අශ්වාරෝහකයින් දෙදෙනෙකු මෙහි පැමිණ ජලය රැගෙන කන්ද උඩ දිහාවට යනු දුටු බව පැවසුවේය. මේ මදීනාවාසීන් බවට වටහාගත් ඔහු වහාම තම තවලම මෙම මාර්ගයෙන් ඉවත් කිරීමට පියවර ගත්තේය.පසුව තවලම රැකගැනීමට කුරෙයිෂිවරු විශාල සේනාවක් දියත් කළ බවට තොරතුර මුස්ලිම්වරුන්ට ආරංචි විය. මේ හේතුවෙන් මුහම්මද් නබි තුමා ඔහුගේ පිරිස වෙතට ගොස් තත්ත්වය පහදා සටනට පිවිසෙන්නට සූදානම් ද නැතිනම් පසු බසින්නට අවශ්‍ය දැයි ප්‍රශ්ණ කළේය. මුහාජිරීන්වරු වෙනුවෙන් කථා කළ අබූ බක්කර් සහ උමර් ඔවුන් සටනට පිවිසෙන්නට සූදානම් බවට ප්‍රකාශ කළෝය. මේ බව තහවුරු කිරීම පිණිස මික්දාද් නම් එක් මුහාජිරීන්වරයකු නැගිට නුඹට අල්ලාහ් අණ කළ අයුරින්ම කරවු. ඊස්‍රායිල්ගේ දරුවන් මූසා (මෝසස්) හට පැවසුවාක් මෙන් නුඹ සහ නුඹේ අල්ලාහ්ත් සමග ගොස් සටන් කරවු, අප මෙහි සිටින්නෙමු යැයි අප නොපවසමු. නුඹ සහ නුඹේ අල්ලාහ් ගොස් සටන් කරවු, නුඹත් සමග අප ද සටන් කරන්නෙමු. නුඹේ දකුණින් සහ වමින්. නුඹේ ඉදිරියෙන් සහ පසුපසින් අප සටන් කරන්නෙමු. මෙම වචන මුහම්මද් නබිතුමා හට ඉමහත් සතුටක් ගෙන දිය. කෙසේ වෙතත් මුහාජිරීන්වරුන්ගේ විශ්වාසවන්තභාවය ගැන කිසිදු සැකයක් නොවූයෙන් මෙය මවිතයට කාරණයක් නොවීය. නමුත් මුහම්මද් නබිතුමා නිසා අනවශ්‍ය ලෙස යුද්ධයකට තල්ලු වූ මදීනාවේ අන්සාරිවරුන්ගේ තත්ත්වය එසේ නොවීය. තවලමක් ආක්‍රමණය කිරීමේ අරමුණින් පැමිණි ඔවුන් දැන් ඔවුනගේ ජීවිත පරදුවට තබා ඔවුනට වඩා බෙහෙවින් විශාල බලඇණියක් සමග සටන් වැදීමට සිදුව ඇත. මුහම්මද් නබිතුමා මදීනාවෙහි සිටිනා තාක් ඔහුව ආරක්ෂා කිරීමට ඔවුන් දිවුරා තිබුණ ද මදීනාවෙන් පිට ඔහුව ආරක්ෂා කිරීමට ඔවුන් බැඳී නොසිටියහ. මේ හේතුවෙන් ජනයිනි මේ සම්බන්ධයෙන් නුඹලා කුමක් කියන්නේ දැයි මුහම්මද් නබිතුමා නැවතත් පොදුවේ මෙන් ප්‍රශ්ණ කළේය. සාද් බින් මුආද් නැගිට අල්ලාහ්ගේ දූතයානෙණි! නුඹ ආමන්ත්‍රණය කළේ අපට බව මට වැටහුණි. අප නුඹව ද නුඹ පැවසූ සියලු දෑ විශ්වාස කරන්නෙමු. නුඹ අපට රැගෙන පැමිණි දෑ සත්‍ය බවට අප සාක්ෂි දරමු. නුඹට අවනත වන්නට අප පොරොන්දු වී සිටිමු. නුඹ ඕනෑම දෙයක් කරවු. අප නුඹ සමගයි. නුඹ අපට සාගරය තරණය කරන්නට අපට අණ කර නුඹ සාගරය තුළට පැන්නේ නම් අපද නුඹත් සමග සාගරයට පනිමු. අපෙන් කිසිවෙකු පසුබසින්නේ නැත. අප අපගේ සතුරන් හමුවන්නට බිය නොවන්නෙමු. අපට සටන් බෙහෙවින් පුරුදුය. මේ නිසා අල්ලාහ් නුඹට අපගේ ශූරත්වය පෙන්වා සටනෙහි නුඹේ දෑසට සිසිලස ගෙන දෙනු ඇත. මෙනිසා අපට අල්ලාහ්ගේ ආශිර්වාදයත් සමග මග පෙන්වන්න යැයි පැවසුවේය.
මුහම්මද් නබිතුමා මෙම ප්‍රකාශයෙන් බෙහෙවින් සතුටට පත්වූවේය. නුඹලාට සුභාරංචියක් ඇත. අල්ලාහ් මා හට තවලම හෝ සේනාව අතුරින් එක් පාර්ශවයක් මත ජයග්‍රහණය නිශ්චය කර ඇත. දැනටමත් සතුරා දණ ගසනු මා දකින්නෙමි යැයි පැවසුවේය.
කුරෙයිෂිවරුන් දහසකින් පමණ සැදුම් ලත් විශාල සේනාව මුස්ලිම්වරු සහ තවලම අතර පෙදෙසකට පැමිණි විට අබූ සුෆියාන් විසින් සේනාවට පණිවිඩයක් යවා ඔහුගේ තවලම ආරක්ෂිත බවට තහවුරු කර ඔවුනට නැවතත් මක්කාවට පිටත් වන ලෙසට අවවාද කළේය. මේ අතර රාත්‍රියේදී කුරෙයිෂිවරුන් අතුරින් ඇතැමුන් හට ඔවුන් විශාල අණතුරකට ලක්වන අයුරු සිහින දුටුවෝය. මේ බව ආරංචි වූ අබූ ජහ්ල් අප බද්ර් වෙත ළඟා වී දින තුනක් තිස්සේ ඔටු මස් අනුභව කරමින් මත් පැන් බොමින් ගායිකාවන් අප හට නටමින් ගීත ගායනා කරමින් ගමන් කරන අයුරු පෙන්වමින් සියලු අරාබි වරුන් හට අපගේ බලය මෙලෙස පෙන්වන තුරු අප පිට නොවෙමු. බද්ර් වෙතට යනු! යන්නෙන් හඬ නගා පැවසුවේය.
අබූ ජහ්ල් සමග එකඟ නොවූ ඇතැම් වංශ නායකයින් තම සාමාජිකයින් සමග මක්කාව බලා පිටත් විය. හාෂිම් වංශයට අයත් සාමාජිකයින් කුරෙයිෂින් සමග සටනට ගියද ඔවුනගේ සිත් මුහම්මද් සමග විය. එනමුත් අබ්බාස් ඔහුගේ බෑනන් තිදෙනා ද රැගෙන බද්ර් වෙතට යන්නට තීරණය කළේය.
මුහම්මද් නබිතුමා සහ ඔහුගේ අනුගාමිකයින් බද්ර් හි ළිං වෙතට ගමන් කරන්නට විය. මෙම අවස්ථාවේදී වර්ෂාව ඇද හැලුණි. මෙමගින් ඔවුන් ප්‍රබෝධමත් විය. පළමු ළිඳ අසලට පැමිණි විගස මුහම්මද් නබිතුමා එතැනින් නතර විය. හුබාබ් ඉබ්නූ මුන්දිර් නම් පුද්ගලයා පැමිණ අල්ලාහ්ගේ දූතයාණෙනි. අප සිටිනා මෙම ප්‍රදේශයෙහි නතර වීමට නුඹට අල්ලාහ්ගෙන් කිසියම් නියෝගයක් ලැබුණේද? නැතිනම් මෙය හුදෙක් නුඹගේ අදහස ද? යන්නෙන් ප්‍රශ්ණ කළේය. මෙය මාගේ අදහස යැයි ඔහු පිළිතුරු දුන්නේය. මෙය නැවතීමට සුදුසු ස්ථානයක් නොවෙයි අල්ලාහ්ගේ දූතයාණෙනි. සතුරාට සමීපයේ ඇති විශාල ළිං වෙත අපව රැගෙන යනු. එවිට සියලු ළිං අපට හිමි වන නිසා එහි ගොස් අප සටන් කරමු යැයි පැවසුවේය. මුහම්මද් නබිතුමා ඊට එකඟ විය. මෙම රාත්‍රියේ අල්ලාහ් ඔවුන්ට හට ඉතාමත් සාමකාමී නින්දක් ලබා දිය. ඊළඟ දිනයේ ඔවුන් ප්‍රබෝධමත්ව අවදි විය. දිනය ක්‍රි.ව. 623 මාර්තු 17 සිකුරාදා දිනයක් විය. හිරු උදාවත්ම කුරෙයිෂිවරු අකන්කල් කන්ද නැග ගත්තෝය. දැන් මුහම්මද් නබිතුමාට කුරෙයිෂිවරුන් ඔවුනගේ අනර්ඝ ඝනයේ අසුන් සහ ඔටුවන් සමග කන්දෙන් බැස යල්යාල් නම් මිටියාවත ඔස්සේ බද්ර් දෙසට පැමිණෙන අයුරු පෙණෙන්නට විය. ඔහු අල්ලාහ්ට ආමන්ත්‍රණය කරමින් කුරෙයිෂිවරු ඔවුනගේ අහංකාරකම හේතුවෙන් නුඹව සහ නුඹේ දූතයාට එරෙහිව පැමිණ ඇත. නුඹ පොරොන්දු වූ එම උපකාරය අප හට ලබා දෙනු මැනව! ඔවුන්ව විනාශ කරනු මැනව! යන්නෙන් අල්ලාහ් වෙත අයදින්නට විය.
කුරෙයිෂිවරු කන්දෙන් පහළ ඔවුනගේ කූඩාරම් ගසන්නට විය. මුස්ලිම්වරුන්ගේ සංඛ්‍යාව ඔවුන් බලාපොරොත්තු වූවාට වඩා අඩු බව පෙණෙන්නට වූ හෙයින් උමෛර් නම් ජුමා වංශයට අයත් පුද්ගලයකු යවා මුහම්මද්ගේ වෙනත් කිසිදු රහස්‍ය සේනාවක් වට පිට නොමැති බවට තහවුරු කර එන ලෙසට යවන ලදි. ඔහු සියල්ල නිරීක්ෂණය කර පැමිණ වෙනත් කිසිදු සේනාවක් නොමැති බවට තහවුරු කළේය. මේ අතර කුරෙයිෂි හමුදාවේ සිටි කතීජාගේ බෑනා හකීම් ඇතුළු පිරිසක් මුස්ලිම්වරු අතර තම සමීප ඥාතීන් සිටීම හේතුවෙන් මෙම සටනට පිවිසීමට අකමැති බව සාකාච්ඡා කරන්නට විය. මේ අතරතුර මෙම කුරෙයිෂිවරුන් අතර සිටි ඉස්ලාම් ආගම වැළඳගෙන සිටි කිහිප දෙනෙකු මුස්ලිම්වරුන්ගේ කඳවුරට පැන ගියහ. කුරෙයිෂින් ඉදිරියට එන්නට විය. එවිට කුරෙයිෂිවරුන්ගේ සංඛ්‍යාව කුඩා ලෙස මුස්ලිම්වරුනට පෙණෙන්නට විය. නමුත් ඔවුනගේ සත්‍ය සංඛ්‍යාව මුස්ලිම්වරුන්ගේ සංඛ්‍යාවමෙන් කිහිප ගුණයක් විශාල බව මුහම්මද් නබිතුමා දැන සිටියේය. ඔහු නැවතත් අබූ බක්කර් සමග අල්ලාහ් අයැද ප්‍රාර්ථනා කරන්නට විය. අබූ බක්කර් සතුටු වනු. ජිබ්‍රායිල් සටනට ලැහැස්ති වී පැමිණ ඇත. කුරෙයිෂිවරු දැන් ප්‍රහාරයට සූදානම් වී ඉදිරියට ඇදෙන්නට විය. ඔවුන් මුස්ලිම්වරු සතුව ඇති ජලය ආක්‍රමණය කිරීමට පැමිණෙන බව වැටහින. ඉදිරියෙන්ම පැමිණෙමින් සිටියේ මක්සූම් වංශයේ අස්වද් නම් අයයි. ඔහු ළංවූ වහාම හම්සා ඔහු වෙත ගොස් ඔහුව මරා දැමුවේය. අල්ලාහ් විසින් මුස්ලිම් වරුන් සමග සටන් කිරීමට මලායිකාවරු දහස් ගණනින් යවන ලදි. ඔවුන් මුස්ලිම්වරුන්ගේ සිත් ශක්තිමත් කළ අතර අවිශ්වාස කරන්නන්ගේ සිත් තුළට ත්‍රාසය අතුළු කරන ලදි. මුස්ලිම්වරු බොහෝ දෙනෙකුට මලායිකාවරුන්ගේ ක්‍රියාකාරිත්වය දැනෙන්නට විය. මෙම මලායිකාවරු මුස්ලිම්වරුනට නොපෙණුන ද සතුරන් හට ඔවුන් ඉතාමත් බියකරු ලෙස පුල්ලි සහිත අසුන් මත නැගගත් සුදු ඇඳගත් පිරිසක් මෙන් පෙණෙන්නට විය. බොහෝමයක් කුරෙයිෂින් පසු බැස පලා ගියහ. අබූ ජහ්ල් ඇතුළු කුරෙයිෂිවරු පනස් දෙනෙකු පමණ මරුමුවට පත් වූ අතර තවත් පනස් දෙනෙකු පමණ සිරබාරයට ගනු ලැබිණ. මුස්ලිම් වරු දහ හතර දෙනෙකු පමණක් මරණයට පත් විය. එනමුත් කුරෙයිෂිවරුන්ගේ සංඛ්‍යාවේ විශාලත්වය නිසා නැවතත් ඔවුන් එකතු වී සටනට ප්‍රවිශ්ඨ වීමේ හැකියාව තිබේ. මේ හේතුවෙන් මුහම්මද් නබිතුමාට ඔහුගේ කූඩාරම වෙත ගොස් ආරක්ෂිතව සිටීමට සිදු වූ අතර ඇතැමුන් ආරක්ෂා කරමින් බලා සිටින්නට විය.
මේ අතර සාද් ඉබ්නු මුආද් නම් අන්සාරිවරයා කඳවුර ඉදිරියේ මුස්ලිම්වරු රැගෙන එන ලද සිරකරුවන් සියල්ල මරන්නට මෙන් කඩුව අමෝරාගෙන සිටියේය. මෙය දුටු මුහම්මද් නබිතුමා දැඩි ලෙස එයට විරුද්ධ විය. එවිට සාද් මෙය අල්ලාහ් පිළිම වන්දනාකරුවන්ට දුන් පළමු පරාජයයි. මොවුන් ජීවතුන් අතර සිටිනවාට වඩා මැරෙනු දක්නට මා කැමත්තෙමි යන්නෙන් පැවසුවේය. උමර් ඔහු පැවසූ දෙයට එකඟ විය. නමුත් අබූ බක්කර් මොවුන් නොමැරීමට කැමැත්ත පළ කළේය. ඇතැම් විට මොවුන් පසු කළෙක ඉස්ලාම් ආගම වැළඳගන්නට ඉඩ ඇති බව ඔහුගේ විශ්වාසය විය. නමුත් ටික වේලාවකට පසුව උමර් කූඩාරමට පැමිණි විට මුහම්මද් නබිතුමා සහ අබූ බක්කර් ඉතාමත් ශෝකයෙන් යුතුව කඳුලු සලමින් සිටිනු දුටුවේය. කාරණය විමසීමේදී අල්ලාහ් විසින් පහළ කරන ලද පහත කුරාණ වාක්‍යයන් සැල විය.
මිහිතලය මත (අපරාධකාර සතුරන්) මර්දනය කරන තෙක් තමන්ට යුද සිරකරුවන් අත්කර ගැනීමට කිසිදු නබිවරයෙකුට බලය නොමැත. නුඹලා මෙලොව වස්තූන් අපේක්ෂා කරන්නෙහුය. නමුත් අල්ලාහ් නුඹලාට මතුලොව අපේක්ෂා කරන්නේය. තව ද අල්ලාහ් අති බලසම්පන්නය. සර්ව ප්‍රඥාවන්තය. (අල් කුරාණ්ථ 8:67)
නබිවරය, සිරකරුවන් අතුරින් නුඹලාගේ යටතේ සිටින අයට පවසවු. නුඹලාගේ හදවත් තුළ යහපත ඇති බවට අල්ලාහ් දන්නේ නම් (නිදහස් කිරීමට වන්දියක් වශයෙන්) නුඹලාගෙන් ලබා ගත් දෑට වඩා යහපත් දෑ ඔහු නුඹලාට පිරිනමන්නේය. තවද නුඹලාට පාප ක්ෂමාව දෙන්නේය. තවද අල්ලාහ් අති ක්ෂමාශීලීය මහා කරුණාභරිතය. (අල් කුරාණ් 8:70)
ඉහත කුරාණ වාක්‍යයන්ට අනුව මුහම්මද් නබිතුමා හට එවක සිටි සතුරන් ප්‍රමාණයේ අධික බව හේතුවෙන් සිර කරුවන් ගැනීම තහනම් කරනලද නමුත් ඊළඟ කුරාණ වාක්‍යයට අනුව එම අවස්ථාව වන විට ගන්නා ලද සිරකරුවන් තබා ගැනීමටත් කප්පම් සඳහා නිදහස් කිරීමටත් අනුමැතිය දී තිබුණ බව පෙණී යයි.
පසුව මරණයට පත් වූ කුරෙයිෂිවරු සියලු දෙනාවම වළක් හාරා ඒ තුළ දමන්නට මුහම්මද් නබිතුමා උපදෙස් දුන්නේය. මේ අතර කඳවුරහි සිට ආරවුලක් ඇතිවිය. මුහම්මද් නබිතුමා ආරක්ෂා කිරීමෙහි නියැලුණු පසු පෙළ සේනාව ඉදිරිපෙළ සේනාව සතුරන්ගෙන් අත්පත් කරගත් වස්තූන්හි සම අයිතිවාසිකම් ඉල්ලා සිටි අතර ඉදිරි පෙළ සේනාව මෙම වස්තුව කිසිවකුට දීමට අකමැති විය. මේ අවස්ථාවේදී කුරාණ වාක්‍යයක් පහළ විය.
නබිවරය, යුද බිමේ සතුරන්ගෙන් අත්පත් වූ වස්තූන් පිළිබඳව නුඹගෙන් ඔවුහු විමසති. යුද බිමේදී සතුරන්ගෙන් අත්පත් වූ වස්තූන් අල්ලාහ්ට හා රසූල්වරයා සතු යැයි නුඹ පවසවු. (අල් කුරාණ් 8:1)
මේ අනුව අත්පත් කරගත් සියලු වස්තූන් සහ සිරකරුවන් ඒකරාශි කරන්නට විය. සිරකරුවන් අතර සිටි වඩාත්ම කැපී පෙණෙන අය වූයේ අමීර් වංශයේ නායක සහ මුහම්මද් නබිතුමාගේ බිරිඳ සවුදාගේ ඥාති සොයුරු සුහෛල්, මුහම්මද් නබිතුමාගේ මාමා අබ්බාස්, මුහම්මද් නබිතුමාගේ බෑනා එනම් සෛනබ් ගේ ස්වාමි පුරුෂයා අබුල් ආස් සහ ඔහුගේ සොයුරන් අකිල් සහ නවුෆල් ද විය. සියලු සිරකරුවන් හොඳින් බලා ගැනීමට මුහම්මද් නබිතුමා අණ කළේය. මුහම්මද් නබිතුමාගේ මාමා වන අබ්බාස් ගේ තත්ත්වය දාරාගත නොහැකිව මුහම්මද් නබිතුමා හට නිදා ගැනීම පවා අපහසු විය. මේ හේතුවෙන් ඔහුගේ බැඳුම් තරමක් ලිහිල් කරන ලෙසට ඔහු උපදෙස් දුන්නේය.
පලා ගිය අටසියයකට අධික කුරෙයිෂි සේනාව නැවත නොපැමිණෙන බවට සනාථ වීමත් සමග මුහම්මද් නබිතුමා විසින් දෙදෙනෙකුව මෙම සතුටු දායක ආරංචිය රැගෙන යාම පිණිස මදීනාවට පිටත් කළේය. රාත්‍රියේදී ඔහු සතුරන්ගේ මළ සිරුරු දමන ලද වළ වෙතට ගොස් වළ තුළ සිටින මිනිසුනි! නුඹලාගේ නබිවරයාගේ ඥාතිනි! නුඹලා දක්වපු ඥාතිත්වය බොහෝ නින්දිතයි. මාව බොරු කාරයකු බව නුඹලා පැවසුවා නොවේද? වෙනත් පිරිස් මාව පිළිගෙන මා හට ජයග්‍රහණය සඳහා උදව් කරන කළ නුඹලා මා සමග සටන් කළා නොවේද? අල්ලාහ් නුඹලා හට පොරොන්දු වූ දෑ සත්‍ය බව දැන් නුඹලාට වැටහෙන්නේ ද? එම පොරොන්දුව සත්‍ය බව මට දැන් වැටහී ඇත. මුහම්මද් නබිතුමා මෙලෙස මළ සිරුරු සමග කථා කරනු දුටු ඔහුගේ පිරිස දෙස හැරී ඔවුනගේ ඇසීමේ හැකියාවට වඩා නුඹලාගේ ඇසුමෙහි කිසි වෙනසක් නැත. නමුත් ඔවුනට මා හට පිළිතුරු දිය නොහැක යන්නෙන් පැවසුවේය.
පසු දින උදෑසනම ඔවුන් මදීනාව බලා පිටත් විය. සිරකරුවන් අතර හොඳ කප්පමක් ලබා ගත හැකිව තිබෙන සිරකරුවන් දෙදෙනෙකි අබ්දද්දර් වංශයට අයත් නද්ර් සහ අබ්දුශ්ශම්ස් වංශයට අයත් උක්බා. නමුත් මොවුන් දෙදෙනා මුස්ලිම් වරුනට විරුද්ධව නැගී සිටි බරපතල සතුරන් දෙදෙනෙකි. මොවුන් දෙදෙනා නිදහස් වුවහොත් මොවුන් වහාම නැවතත් ඔවුනගේ මුස්ලිම් විරෝධී නපුරු ක්‍රියා අරඹනු ඇත. මේ හේතුවෙන් මදීනාවට යන අතරතුර මොවුන් දෙදෙනාව මරණයට පත් කරන්නට තීරණය විය. මදීනාවට ළඟා වූ විට මුහම්මද් නබිතුමාගේ දුව රුකෛයා අපවත් වුණු බව ආරංචි විය. සටනෙහිදී මරණයට පත්වූවන්ගේ පවුල් වල උදවිය බෙහෙවින් ශෝකයට පත් විය. මුහම්මද් නබිතුමා මින් පෙර මරණයට පත්වූ මිනිසුන් ඉදිරියේ ශබ්ද නගා ඇඬීම ඔවුනට අයහපත් වීම හේතුවෙන් තහනම් කර තිබුණු හෙයින් ඔවුන් සියළු දෙනා ශබ්ද නොනගා කඳුලු සැලුවෝය. සටනින් මරණයට පත් වූ සියලු දෙනාටම ෆිරුදවුස් නම් ස්වර්ගය හිමි වන බව පවසා මුහම්මද් නබිතුමා ඔවුන් සැනසුවේය.