යුදෙව්වන් මුහම්මද් නබිතුමා සමග ඇතිකරගත් ගිවිසුම ගණන් නොගත් බව ප්‍රසිද්ධ රහසකි. මොවුන් බොහෝ දෙනා මුස්ලිම් වරුනට වඩා බහු දේවවාදීන් ප්‍රිය කළහ. කුරාණය යුදෙව්වන් අතුරින් කිහිප දෙනෙකුගේ විශ්වාසවන්තභාවය තහවුරු කළද බහුතරය පිළිබඳව බෙහෙවින් අවවාද කරන්නට විය. යුදෙව්වන් මදීනාව නැවතත් පෙර පරදි ගෙන ඒමට නොකළ දෙයක් නොවීය. මේ සඳහා ඔවුන් කුරෙයිෂිවරු මත දැඩි විශ්වාසයක් තැබුවෝය. මේ හේතුවෙන් මුහම්මද් නබිතුමාගේ ක්‍රියාවන් පිළිබඳ නිතරම මක්කාවට ඔත්තු සැපයීමෙහි ඔවුන් නිරතව සිටියෝය. කුරෙයිෂිවරු දකුණු මදීනාවෙහි පිහිටි යුදෙව්වන්ගේ ප්‍රදේශයට පැමිණි විගස එහි සිට පහසුවෙන් යුදෙව්වන්ගේ සහය ඇතුව දින භාගයක දුරකින් පිහිටි මුහම්මද් නබිතුමාගේ පල්ලිය ආක්‍රමණය කළ හැකි විය.
නුඹට යහපතක් සිදු වූ විට එය ඔවුනට විපතකි. නුඹට අයහපතක් සිදු වූ විට එයින් ඔවුන් බෙහෙවින් සතුටට පත් වෙති යන්නෙන් කුරාණය මුහම්මද් නබිතුමා හට අවවාද කළහ. බද්ර් සටනින් මුස්ලිම්වරු ලද ජයෙන් මේ බව මනාව තහවුරු විය. මෙම ප්‍රවෘත්තිය සැලවීමත් සමග කයිනුකා, නාදිර් සහ කුරෛසා යන යුදෙව් වංශ ඔවුනගේ සිත් වල කැළඹීම සඟවාගත නොහැකි විය. නාදීර් වංශයට අයත් බලවත් පුද්ගලයකු වූ කාබ්, බද්ර් සටනින් මුස්ලිම්වරු කුරෙයිෂි නායකයින් විශාල පිරිසක් මරණයට පත්කිරීමෙන් ලද ජය සැලවීමෙන් ඔහු අල්ලාහ්ගේ නාමයෙන් දිවුරා මුහම්මද් මේ පුද්ගලයින් සියල්ල මරණයට පත්කළේ නම් ලෝකයේ ඇතුළතාන්තය පිටතට වඩා යහපත් යැයි පැවසුවේය. මෙම ප්‍රවෘත්තියේ සත්‍යතාවය තහවුරු වීමත් සමග මුහම්මද් නබිතුමාගේ පැමිණීමට පෙරාතුවම මදීනාවෙන් පිටත්වී මක්කාවට ගොස් කුරෙයිෂි වරුන් හට ඔවුනගේ පලිය ගැනීමට විශාල සේනාවක් රැස් කර මදීනාවට පිටත්ව ගොස් ආක්‍රමණය කරන ලෙසට ඔවුනට අවවාද කළේය. නමුත් කයිනුකා වංශයේ යුදෙව්වන්ගේ මුස්ලිම් විරෝධී ක්‍රියා වඩාත් හොඳින් දැනෙන්නට විය. මොවුන් හට කුහකයකු වූ අබ්දුල්ලා ඉබ්නු උබයි නම් කස්රජ් වංශ නායකයා සමග සමීප සම්බන්ධකම් ඇති අතර මුස්ලිම්වරුන් පදිංචිවි සිටි සථානයට බොහෝ සමීපයෙන් පදිංචිවී සිටියහ. මේ අතරතුර මේ සම්බන්ධයෙන් කුරාණ වාක්‍යයක්ද පහළ විය.
“යම් පිරිසක් නුඹට වංචාවක් කරතියි නුඹ බිය වන්නෙහි නම් නුඹ ද සමානව ඔවුන් වෙත ගිවිසුම අත් හැර දමනු. සැබැවින්ම අල්ලාහ් වංචනිකයින් ප්‍රිය නොකරයි.” (අල් කුරාණ් 8:58)
“ඔවුන් සමාදානය වෙත නැඹුරු වන්නේ නම්, නුඹ ද ඒ වෙත නැඹුරු වනු. තවද අල්ලාහ් වෙත විශ්වාසය තබනු. සැබැවින්ම ඔහු සර්ව ශ්‍රාවකය සර්වඥය. ” (අල් කුරාණ් 8:61)
මේ හේතුවෙන් මුහම්මද් නබිතුමා බද්ර් සටනින් පැමිණි පසු දිනම දකුණු මදීනාවෙහි කයිනුකා වංශිකයින්ව ඔවුන්ගේ පොළෙහිදී හමුවන්නට ගොස් කුරෙයිෂිවරුන් මතට පහත් වුණාක් මෙන් නුඹලා මතට අල්ලාහ්ගේ කෝපය නොකැඳවනු යන්නෙන් අවවාද කළේය. ඊට පිළිතුරු දුන් ඔවුහු එම්බල මුහම්මද්! එම සිදුවීමෙන් නුඹ මුළා නොවනු. නුඹ සටන් කළේ සටන් ගැන කිසිදු දැනුමක් නොතිබූ පිරිසක් සමගය. අල්ලාහ් මත දිවුරා පවසමු අප නුඹත් සමග සටන් කළ විට බිය විය යුතු පිරිස අප බව නුඹට වැටහේවි. මුහම්මද් නබිතුමා කිසිදු කථාවක් නොමැතිව එතැනින් පිට විය. ඔවුන් ජයගත් ලීලාවෙන් සතුටට පත් විය.
ටික දිනකට පසුව මෙම වෙළෙඳපොළෙහි සිදුවීමක් විය. මුස්ලිම් කාන්තාවක් භාණ්ඩ මිළට ගැනීමට එම පොළට ගිය අවස්ථාවේ රන් කරුවෙක් ඇයට දැඩි ලෙස අපවාද කළේය. ඒ අතර සිටි අන්සාරිවරයකු ඊට සම්බන්ධ වී එම රන්කරුවා සමග ආරවුලේ නියැලීමෙන් ඔහුට මරණය අත් විය. පසුව යුදෙව්වන් සියලු දෙනා එම අන්සාරිවරයාටද තඩි බා ඔහුව ඝාතනය කළෝය. දැන් දෙපාර්ෂවයේම පුද්ගලයකු බැගින් මරණයටපත්ව තිබූ හෙයින් ගිවිසුමට අනුව මෙම තත්ත්වය පහසුවෙන් සමථයකට පත් කරන්නට තිබුණි. නමුත් යුදෙව් අවස්ථාවාදීන් මෙම මුස්ලිම්වරුන්ට පාඩමක් උගන්වා ඔවුන්ව මදීනාවෙන් නෙරපීමට මෙය හොඳ අවස්ථාවක් බවට පත් කර ගැනීමේ අරමුණින් කස්රජ් කුළයේ කළින් සිටි යුදෙව්වන්ගේ මිත්‍ර පාර්ෂවයන් වන ඉබ්නු උබයි සහ උබාදා ඉබ්නු සමිත් යන වාංශ නායකයින්ගෙන් මුස්ලිම් වරුනට එරෙහිව උපකාර පැතීය. මෙම උපකාරයන් ලද හොත් ඉබ්නු උබයිගේ වංශයෙන් පමණක් පහසුවෙන් හත්සියයක පමණ පිරිසක් එක් රැස් කිරීමට හැකි වන්නට තිබුණි. නමුත් සිදු වූයේ වෙනත් දෙයකි. පැය කිහිපයකින් විශාල මුස්ලිම් සේනාවක් පැමිණ සමස්ථ කයිනුකා වංශයම වටලා කොන්දේසි විරහිතව යටත් වන ලෙස අණ කරනු ලැබීය.
ඉබ්නූ උබයි මේ සම්බන්ධයෙන් උබාදා සමග සාකච්ඡා කිරීමේදී පැරණි සන්ධානයන් හට මුහම්මද් නබිතුමාගේ නව ගිවිසුම හමුවේ කිසිදු බලයක් නොමැති බව පවසා උබාදා, කයිනුකා වංශයත් සමග සියලු සම්බන්ධතා බිඳ හෙලීය. ඉබ්නූ උබයි වසර ගණනාවක් තිස්සේ ගොඩ නගාගත් සම්බන්ධකම් අත් හැරීමට කිසිදු කැමැත්තක් නොවූ නමුත් මුහම්මද් නබිතුමා ගත් ක්‍රියාවකට විරුද්ධව කිසිවක් කිරීමට ඔහුට හැකියාවක් නොවීය. සති දෙකක් පමණ උපකාර බලා පොරොත්තුවෙන් ආරක්ෂක පවුරු තුළ සිරවී සිටි කන්යුකා වාංශිකයින් අවසානයේදී අසරණවී කොන්දේසි විරහිතව යටත් වන ලදි.
ඉබ්නූ උබයි මුහම්මද් නබිතුමාව හමු වී එම්බල මුහම්මද්! මාගේ මිත්‍ර පාර්ෂවයන්ට හොඳින් සලකනු. මුහම්මද් නබිතුමා ඔහුව ගණන් නොගෙන සිටිනු දුටු ඔහු නැවතත් ඔහුගේ ඉදිරියට පැමිණ එලෙස ප්‍රකාශ කළේය. මුහම්මද් නබිතුමා අනෙක් දිසාවට හැරුනි. උබයි ඔහුගේ සන්නාහයේ කරපටියෙන් අල්ලාගත්තේය. මුහම්මද් නබිතුමා දැඩි ලෙස කෝපයට පත් විය. මාව අත් හරිනු. ඊට පිළිතුරු දුන් උබයි නුඹ ඔවුන්ව හොඳින් සැලකීමට පොරොන්දු වන තාක් මා නුඹව අත් නොහරිමි. ඔවුන් හත්සිය දෙනෙකු මාව සියලු ප්‍රහාර වලින් මුදවා ගත්තෝය. නුඹ ඔවුන් සියලු දෙනාවම එක් උදෑසනකින් සමූළ ඝාතනය කරන්නේ ද? යැයි ප්‍රශ්ණ කළේය. ඔවුන්ගේ ජීවිත මා නුඹට පරිත්‍යාග කරන්නෙමි යන්නෙන් මුහම්මද් නබිතුමා පිළිතුරු දුන්නේය. කෙසේ වෙතත් පහළවූ කුරාණ වාක්‍යයකින් මුහම්මද් නබිතුමාට ලද අණකට අනුව කයිනුකා වාංශිකයින් සියලු දෙනා ඔවුන්ගේ සියලු වත්කම් අත් හැර මදීනාවෙන් පිටුවහල් කරනු ලැබිණි. පසුව ඔවුන් වාදි අල් කුරා නම් යුදෙව් ප්‍රදේශයක පදිංචි වූ අතර පසුව ඇතැමුන් කයිබර්හිත් සිරියාවෙහිත් පදිංචියට ගියෝය.