මුහම්මද් නබිතුමාගේ අවසාන දුව ෆාතිමා විවාහ වන වයසට පැමිණි විට ඔහු ඇයට වඩාත් සුදුසු පුද්ගලයා අලි යැයි තීරණය කළේය. මෙතෙක් කල් කිසිදු වත්කමක් නොවූ හෙයින් විවාහ නොවූ අලි මුහම්මද් නබිතුමාගේ ඉල්ලීම හේතුවෙන් එයට එකඟ විය. ටික කාලයකින් උමර්ගේ බෑනා එනම් උමර්ගේ දුව හෆ්සා ගේ සැමියා කුනයිස් අපවත් විය. මේ හේතුවෙන් උමර් ඇයව සරණ පාවා ගන්නා ලෙසට උත්මාන් ගෙන් ඉල්ලා සිටියේය. උත්මාන් ඊට එකඟ නොවීය. එම ප්‍රතිචාරයෙන් තරමක් සිත් තැවුලට පත් උමර් අබූ බක්කර් වෙත ගොස් ඇයව සරණ පාවා ගන්නා ලෙසට ඉල්ලා සිටියේය. නමුත් අබූ බක්කර් ද ඇයව මග හරින්නට විය. ටික කාලයකට පසු මේ බව ආරංචි වූ මුහම්මද් නබිතුමා උමර් හට මා නුඹට උත්මාන්ට වඩා හොඳ බෑනෙකු ද උත්මාන් හට උමර්ට වඩා හොඳ මාමන්ඩියෙකු ද ලබා දෙන්නෙමියි පවසා මුහම්මද් නබිතුමාගේ සැලසුම හෙළි කළේය. එනම් මුහම්මද් නබිතුමා හෆ්සාව විවාහ කරගැනීමට කැමැත්ත පළ කළ අතර ඔහුගේ දුව රුකෛයාගේ සොයුරිය උම්මු කුල්දුම් උත්මාන් ට විවාහ කර දෙන්නට යෝජනා කළේය. පසු කළෙක අබූ බක්කර් විසින් හෆ්සාව විවාහ කිරීමේ යෝජනාව සම්බන්ධයෙන් උමර්ව මග හැරීමට හේතුව මෙම කාරණය දැන සිටි නිසා බව පවසන ලදි.
බද්ර් සටනින් පසුව මුස්ලිම්වරුන්ගේ ශක්තිය තේරුම්ගත් රතු මුහුද ආශ්‍රිතව ජීවත් වූ ජුහයිනා සහ අනෙක් වාංශිකයින් මදීනාවත් සමග එකතු විය. එනම් සිරියාවට ගමන් කරන වෙරළාශ්‍රිත මාර්ගය මක්කා තවලම් වලට අහිමි විය. මේ හේතුවෙන් මක්කාව ද මදීනාව ආශ්‍රිත ගතෆාන් සහ සුලයිම් නම් වංශ කිහිපයක් සමග මිත්‍රත්වය වර්ධනය කිරීමට පියවර ගත්හ. මෙම වාංශිකයින් ඇතැම් විට මදීනාවට ප්‍රහාර එල්ල කිරීමට සැලසුම් කළෝය. මෙම සැලසුම් පිළිබඳව ආරංචි වීමත් සමග මුහම්මද් නබිතුමා ඔහුගේ සේනාවත් රැගෙන ප්‍රතිප්‍රහාර එල්ල කිරීමට යෑමේදී මුහම්මද් නබිතුමාගේ පැමිණීම පිළිබඳව සැලවූ වහාම ඔවුන් පලා ගියෝය.
එක් අවස්ථාවකදී මුහම්මද් නබිතුමා මෙලෙස ප්‍රහාර සැලසුම් කළ ගතෆාන් වාංශයේ එක් කුළයක් මුහම්මද් නබිතුමාගේ සේනාවේ පැමිණීමත් සමග පලා ගිය පසු ද උතුරු නජ්ද් හි කඳුවැටිය තුළ ඔවුන් ලුහු බැඳ යාමට මුහම්මද් නබිතුමා තීරණය කළේය. මුහාරිබ් නම් ප්‍රදේශයට ඔවුන් ඇතුළු වූ විගස වර්ෂාවක් ඇද හැලුනු හෙයින් මුහම්මද් නබිතුමා ඇතුළු පිරිස තෙත් විය. එවිට මුහම්මද් නබිතුමා ඔහුගේ තෙමුණු වස්ත්‍රයන් ගසක් මත වේලෙන්නට දමා ගසෙහි සෙවණෙහි නිදා ගත්තේය. මෙම අවස්ථාවේදී සතුරන් මුහම්මද් නබිතුමා ඇතුළු පිරිස නිරීක්ෂණය කරමින් සිට ඇත. මුහම්මද් නබිතුමා අවදි වූ විට ඔහුගේ ඉදිරියෙන් පුද්ගලයකු කඩුවක් දික් කර සිටියේය. මොහු මුහම්මද් නබිතුමාට එරෙහිව ප්‍රහාර සැලසුම් කළ මුහාරිබ් ප්‍රදේශයේ නායකයා දුතුර් විය. එම්බල මුහම්මද්! අද දින මාගෙන් නුඹව ආරක්ෂා කරන්නේ කවුරුන් දැයි ඔහු ප්‍රශ්ණ කළේය. ඊට මුහම්මද් නබිතුමා අල්ලාහ් යැයි පැවසුවේය. එවිට සුදු වස්ත්‍රයක් ඇඳ ගත් පුද්ගලයෙකුගේ වෙස් ගත් ජිබ්‍රායිල් ඔවුන් දෙදෙනා අතරට පැමිණ දුතුර්ව තල්ලු කර දමූ අතර ඔහු සතු කඩුව බිමට වැටුණි. මුහම්මද් නබිතුමා කඩුව අතට ගත් විගස ජිබ්‍රායිල් අතුරුදහන් විය. දැන් නුඹව මාගෙන් ආරක්ෂා කරන්නේ කවුරුන් දැයි මුහම්මද් නබිතුමා ප්‍රශ්න කළේය. කිසිවකු නොමැත යන්නෙන් දුතුර් පැවසුවේය. මලායිකාවරයකුව තම ඇස් වලින් දුටු ඔහු ඉස්ලාම් දහම වැළඳගත්තේය. එවිට මුහම්මද් නබිතුමා ඔහුගේ කඩුව ඔහුට ලබා දිය. පසුව දූතුර් ඔහුගේ වංශයේ සියලු සාමාජිකයින් ඉස්ලාම් දහමට ආරාධනා කළේය.