මේ වන විට මුහම්මද් නබි තුමා අබූබක්කර්ගේ නිවසට ගොස් වතුයාය පිටුපස ලැහැස්ති කර තැබූ ඔටුවන් දෙදෙනා පිට නැග පිටත් වුණේය. එක් ඔටුවකු පිට මුහම්මද් නබිතුමා නැග ගත් අතර අනෙක් ඔටු පිට අබූ බක්කර් සහ ඔහුගේ පුත් අබ්දල්ලා විය. මුහම්මද් නබිතුමා බේරුණු බව දැනගත් වහාම ඔහුව සොයමින් සෑම දිශාවකටම සෙවුම් කණ්ඩායම් යොමුකරනු ඇති බව දන්නා හෙයින් ඔවුන් සැලසුම් කළ පරිදි තූර් කන්ද වෙතට ගමන් කළෝය. මක්කා නගරය පසු කර ටික දුරක් ගමන් කරත්ම පසු පස හැරී බලා “අල්ලාහ්ට අයත් සියලුම භූමියන්ගෙන් මා වඩාත්ම ආදරය කරන ප්‍රදේශය සහ අල්ලාහ් ද වැඩියෙන්ම කැමති ප්‍රදේශය නුඹය. මාගේ මිනිසුන් මාව පිටුවහල් නොකරන්නට මා නුඹ අත් හැර නොයන්නෙමි” යන්නෙන් පවසා නික්මුණේය.
ඔවුන් පිටු පසින් අමීර් ඉබ්නූ ෆුහෛරා නම් අබූබක්කර් මිළට ගෙන නිදහස් කරන ලද වහලකු ඔහුගේ බැටළුවන් දක්කමින් ඔවුන් ලුහුබන්දේය. මෙමගින් අබූබක්කර් සහ මුහම්මද් නබිතුමාගේ අඩිපාරවල් මකෙන්නට විය. තූර් කන්දෙහි ගුහාව වෙතට ළංවූ පසු ඔවුන් අබ්දල්ලාහ්ව ඔටුවන් සමග නැවත මක්කාවට පිටත් කළහ. සෑම දිනකම රාත්‍රියේ අබ්දල්ලාහ් සහ ඔහුගේ පසුපසින් අමීර් බැටළුවන් සමග ලුහුබඳිමින් අහාර පාන සහ මක්කාව පිළිබඳ පුවත් ද රැගෙන ගුහාවට පිවිසියහ. මේ අනුව මෙදින මුහම්මද් නබිතුමාව සොයා නැවත මක්කාවට භාර දෙන පුද්ගලයකුට ඔටුවන් සිය දෙනෙකු තිළිණයක් ලෙස ලබා දීමට කුරෙයිෂිවරු ප්‍රචාරය කරමින් සිටි බවට ප්‍රවෘත්ති රැගෙන මොවුන් පැමිණියෝය.
එවක අරාබි ජාතිකයින් දක්ෂ ලුහුබඳින්නන් විය. මක්කාව සහ අවට සියලු පෙදෙස් සෝදිසි කළ මොවුන් තුන්වන දිනය වන විට තූර් කන්ද ආශ්‍රිතව ද සෝදිසි මෙහෙයුමක් දියත් කළහ. ගුහාව තුළ සැඟවී සිටි මුහම්මද් නබිතුමා සහ අබූබක්කර් හට දැන් කෙමෙන් මිනිසුන් කණ්ඩායමකගේ ශබ්ද ඇසෙන්නට විය. මෙම ශබ්දයන් ක්‍රමක්‍රමයෙන් වැඩි විය. ඔවුනු ගුහාවට ලඟාවෙත්ම මුහම්මද් නබිතුමා අබූබක්කර් දෙස බලා භය නොවනු. ඇත්තෙන්ම අල්ලාහ් ද අප සමගයි. අල්ලාහ් අපගේ තෙවැන්නාව සිටියදී අප දෙදෙනා ගැන නුඹ කළකිරෙන්නේ කුමකට ද? දැන් මොවුනට පිරිසක් ගුහාවේ මුඛය වෙතට පිය නගන ශබ්දයන් ඇසෙන්නට විය. එක් වරම ශබ්දය නැවතුනි. මෙම ගුහාව තුළ කිසිවකු සිටින්නට හැකියාවක් නැත යන්නෙන් යමකු පවසනු ඇසුණි. පසුව ඔවුන් නැවතත් ආ දිසාවට නික්ම ගියහ. මුහම්මද් නබිතුමා සහ අබූබක්කර් යම් වේලාවකට පසුව ගුහාවේ මුඛයට දෙසට ගිය විට එහි මුඛය පෙරදින නොතිබුණු මිනිසකුගේ තරමක උසැති ඇකේෂියා ගසකින් තරමක් ආවරණය වී තිබුණි. මෙම ගස සහ ගුහාව අතර පෙදෙස මකුළු දැලකින් වැසී තිබුණි. තවද එම ගුහාව ඉදිරිපිට කොබෙය්යකු කැදැල්ලක් තනා බිත්තර ආරක්ෂාකරන්නාක් මෙන් සිටිනු දැක්කෝය. අබ්දල්ලාහ් සහ ඔහුගේ සොයුරිය අස්මා යථා පරිද පැමිණි කල්හි ඔවුන් පරෙස්සමින් මකුළු දැල අහක් කොට කුරුල්ලාට කරදර නොවන අයුරින් පිටතට පැමිණ ඔවුන් හමුවූවෝය. මෙවර ඔවුන් සමග අබූබක්කර්ගේ ඔටුවන් රැකබලාගත් කාන්තාරවාසී පුදගලයකුද පැමිණ සිටියේය. මොහු ඉස්ලාම් ආගම වැළඳගෙන නොසිටි නමුත් විශ්වාසවන්ත පුද්ගලයකු වීම හේතුවෙන් මුහම්මද් නබිතුමා සහ අබූබක්කර් යත්‍රිබ් නුවරට යාමට මග පෙන්වීම පිණිස ඔහුව කැටුව එන ලදි.
අබූබක්කර්ගේ ඔටුවන් දෙදෙනා අතුරින් කඩිසරම ඔටුවා ඔහු මුහම්මද් නබිතුමාට දුන්නේය. එවිට ඔහු මාගේ නොවන ඔටුවකු පදින්නට අකමැත්තෙමි. මොහුගේ මිළ කොපමණදැයි ප්‍රශ්න කළේය. මෙය නුඹට මා ත්‍යාගයක් වශයෙන් පිරිනමමි ඔහු පැවසුවේය. මුහම්මද් නබිතුමා සාමාන්‍යයෙන් ලද ත්‍යාග පිළිගත්ත ද අල්ලාහ් වෙනුවෙන් සියල්ල අත්හැර දේශාන්තරණය කරන මෙම පුණ්‍ය කටයුත්ත සඳහා ඔහු කිසිදු ත්‍යාගයක් ලබාගැනීමට කැමති වූයේ නැත. මේ හේතුවෙන් අබූබක්කර්ගෙන් ඔහු ඔටුවා මිළට ගත්තේය. කස්වා නම් වූ මෙම ඔටුවා ඔහුගේ ප්‍රියතම ඔටුවා විය.
ඔවුන් දින කිහිපයක් මෙසේ ගමන් කරමින් සිටියදී දිනක් විරුද්ධ දෙසින් පැමිණෙමින් තිබුණු රථයක් දුටුවෝය. මෙයින් තරමක් සිතෙහි කැළඹීමක් හටගත් නමුත් පසුව එය අබූබක්කර්ගේ ඥාති සොයුරු තල්හා බව වටහාගත්තෙන් බෙහෙවින් සතුටට පත් විය. සිරියාවෙහි සිට යත්‍රිබ් නුවර පසු කරමින් මක්කාවට ගමන් කරමින් සිටි ඔහු යත්‍රිබ් නුවර වැසියෝ මුහම්මද් නබිතුමාගේ පැමිණීම ඉතාමත්ම උත්සුකව බලා සිටින බව ඔහු අනාවරණය කළේය. දින දොළහක ගමනකින් පසුව අවසානයේදී ඔවුන්ගේ ගමනාන්නතය වූ සාරවත් යත්‍රිබ් ක්ෂේමභූමිය පෙණෙන්නට විය.
දින කිහිපයකට පෙර මුහම්මද් නබිතුමා මක්කාවේ අතුරුදහන් වූ පුවත සහ ඔහුව සොයා දෙන පුද්ගලයින්ට ඔටුවන් සිය දෙනෙකුගෙන් යතු ත්‍යාගය පිළිබඳව යත්‍රිබ් නුවරටද ආරංචි වී තිබුණි. එම දිනයේ සිට යත්‍රිබ් නුවර වැසියන් සෑම දිනකම ඔහුව අපේක්ෂා කරමින් සිටියෝය. මේ හේතුවෙන් එහි වැසියන් කිහිප දෙනෙකු උදෑසනින්ම එම ක්ෂේම භූමියේ කෙළවරටම ගොස් හිරු රශ්මිය දැඩි වන තෙක් මුහම්මද් නබිතුමා එන තෙක් බලා සිටීමට පුරුදුවී සිටියෝය. මෙදින ද මෙලෙස ඔවුන් බලා සිටි නමුත් මේ වන විට හිරු රශ්මිය දැඩි වූ හෙයින් ඔවුන් නැවතත් නගරය තුළට පිවිසියහ. නිවසක වහල මත සිටි එක් යුදෙව්වකු ඔවුන් ඈතික සිට එනු දුටුවේය. ඔහු පැමිණ ඇත. ඔහු පැමිණ ඇත යන්නෙන් මහා හඬින් ඔහු කෑ ගැසුවේය. ප්‍රීතිමත් වූ එහි සිටි යත්‍රීබ් වැසියෝ සියල්ලෝම ඔවුන්ව පිළිගැනීමට දුවගෙන ගියෝය. මෙය ඉතාමත්ම ප්‍රීතිමත් දහවලක් විය.
ඔහු යත්‍රිබ් නුවරට තරමක් දකුණින්වූ කුබා නම් ප්‍රදේශයක දින තුනක් ගත කළේය. එහි පල්ලියක් ගොඩ නැගීමට ඔහු නියෝග කොට වැඩ පටන් ගත්තේය. පසුව ඔහු යත්‍රිබ් නුවරට පිවිසෙන්නට විය. අවුස් සහ කස්රජ් වාංශිකයින් යුද ඇඳුමින් සැරසී කඩු සංදර්ශනයක් සමග මුහම්මද් නබිතුමාව යත්‍රිබ් නුවරට ඉතාමත් ගාම්භීර ලෙස පිළිගත්තෝය. කුඩා ළමුන් සහ කාන්තාවන් තආල අල් බද්රු අලෛ නා හෙවත් අල්ලාහ්ගේ වක්තෘ තුමණි! වඩින්න! අප වෙතට යන්නෙන් ගීත ගැයූහ.
කිහිප වතාවක්ම ඇතැමුන් මුහම්මද් නබිතුමාගේ කස්වා නම් ඔටුවා නැවැත්වීමට උත්සාහ කළෝය. එම සියලු අවස්ථාවන් වලදී මුහම්මද් නබිතුමා ඔවුන්ට ආශිර්වාද කොට ඔටුවා අත්හරින්න. ඔටුවා අල්ලාහ්ගේ අණට අවනතයි යන්නෙන් පැවසුවේය. එම ඔටුවා මෙලෙස යත්‍රිබ් නුවර තුළට බොහෝ වේලාවක් ගමන් කර එක් ස්ථානයක නතර වී දණහිසින් වැටුණි. පසුව මුහම්මද් නබිතුමා එම සත්ත්වයාව අත්හැරියේය. ඌ තරමක් දුර ගොස් නැවත ආපසු හැරී නැවතත් එම සථානයටම පැමිණ නැවතත් දණින් වැටුණි. පසුව එම ස්ථානයේම සම්පූර්ණයෙන්ම වැතිරුණි. එවිට මුහම්මද් නබිතුමා අල්ලාහ්ගේ අභිමතය පරිදි මෙයයි මා පදිංචි වන ස්ථානය. මෙම ඉඩම අයිති කා හටදැයි ප්‍රශ්ණ කළේය. මෙය සහ්ල් සහ සුහෛල් නම් අනාථ දරුවන් දෙදෙනෙකුට හිමි ඉඩමකි යන්නෙන් එහි වැසියකු පිළිතුරු දුන්නේය. ඔවුන් දෙදෙනා මා වෙත රැගෙන එනු යන්නෙන් මුහම්මද් නබිතුමා අණ කළේය. එම දරුවන් දෙදෙනා ඉදිරියට පැමිණියෝය. මෙම ඉඩම නුඹලා මට විකුණන්නේ ද? විකුණන්නේ නම් එහි මිළ පවසවු යන්නෙන් මුහම්මද් නබිතුමා ප්‍රකාශ කළේය. නැත. අල්ලාහ්ගේ දූතයාණෙනි! අප එය නුඹට ත්‍යාගයක් වශයෙන් පිරිනමන්නෙමු යන්නෙන් ඔවුහු පැවසුවෝය. නමුත් මුහම්මද් නබිතුමා එය ප්‍රතික්ෂේප කළ හෙයින් අසාද් ගේ මැදිහත්වීමෙන් මිළ නියම කර මුහම්මද් නබිතුමා එය මිළට ගත්තේය.
මුහම්මද් නබිතුමාගේ නියෝගය මත මෙම ඉඩමෙහි පල්ලියක් ගොඩනැගීමේ කටයුතු ආරම්භ විය. මුහම්මද් නබිතුමා ද මෙම ගොඩනැගීමේ කටයුත්ත සඳහා ඍජුවම දායක විය.
මුහම්මද් නබිතුමාගේ පැමිණීමත් සමග යත්‍රිබ් නුවරෙහි නම මදීනතුන් නබි හෙවත් නබිතුමාගේ නගරය ලෙසට වෙනස් විය. පසුව එය මදීනා ලෙසට කෙටියෙන් හඳුන්වනු ලැබිණි. මදීනාහි මුස්ලිම්වරු අන්සාර්වරු හෙවත් උපකාර කරන්නන් ලෙස හඳුන්වනු ලැබිණි. මදීනාවට පැමිණි සරණාගතයින් එහි ආරාබි අරුත වන මුහාජිරීන් හෙවත් සරණාගතයින් ලෙස හඳුන්වනු ලැබිණි. මේ අතර මෙහි යුදෙව්වන්ද ජීවත් වූහ. මුහම්මද් නබිතුමා මෙම යුදෙව් වංශ සියල්ල සමග ගිවිසුම් වලට එළඹෙන ලදි. මෙම ගිවිසුම් වලට අනුව මුස්ලිම්වරු සහ යුදෙව්වන්ට සම අයිතීන් තිබූ අතර ඔවුනොවුනගේ ආගම ඇදහීමට නිදහස දී තිබුණි. මෙම ගිවිසුමට අනුව යම් යුදෙව්වෙකුට කිසියම් අසාධාරණයක් සිදුවූවේ නම් එම යුදෙව්වාට සාධාරණය ඉෂ්ඨ කිරීම යුදෙව්වන් මෙන්ම මුස්ලිම්වරුන්ගේද වගකීම විය. වෙනත් පාර්ෂවයක් සමග යුද්ධයක් ඇති වූ විට මුස්ලිම්වරු සහ යුදෙව්වන් එක් කාණ්ඩයක් සේ එකිනෙකා ආරක්ෂා කළ යුතු විය. මොවුනතර යම් ආරවුලක් ඇති වුවහොත් අල්ලාහ්ගේ දූතයා වන මුහම්මද් නබිතුමාගේ මාර්ගයෙන් අල්ලාහ් වෙතට යොමු කොට එම ආරවුල නිරවුල් කර ගත යුතු විය. මෙම ගිවිසුම් පුරාවටම මුහම්මද් නබිතුමාව අල්ලාහ්ගේ දූතයා ලෙස හඳුන්වනු ලැබුවද යුදෙව්වන් ඔහුව එලෙස පිළිගත යුතු බවට කිසිදු කොන්දේසියක් එහි නොවීය.
කෙසේ වෙතත් දේශපාලනමය හේතු මත යුදෙව්වන් මෙම ගිවිසුමට එකඟ විය. මේ වන විට මුහම්මද් නබිතුමා මදීනාවෙහි බලවත්ම පුද්ගලයා විය. මෙම බලය සෑම දිනක් පාසාම වැඩි වන්නට විය. මේ හේතුවෙන් ඔවුන් හට මුහම්මද් නබිතුමාට අවනත වීම හැර වෙනත් විකල්පයක් නොවීය. නමුත් අල්ලාහ් විසින් යුදෙව්වෙක් නොවන පුද්ගලයකුව ඔහුගේ දූතයා ලෙසට තෝරා පත් කිරීම යුදෙව්වන් බහුතරයකට පිළිගැනීමට නොහැකි කාරණයක් විය. කෙසේ වෙතත් මේ බව ඔවුන් ප්‍රසිද්ධියේ ඉස්මතු නෙකළ නමුත් ඉස්ලාම් දහමේ දිව්‍යත්වය පිලිබඳව සැක ඉස්මතු කළ වෙනත් පාර්ෂවයන් අතර ඔවුනගේ සැකය බෙදාගැනීමට මැළි වූයේ ද නැත.
අවුස් සහ කස්රජ් වාංශිකයින් අතර ඉස්ලාම් දහම ශ්‍රීඝ්‍ර ලෙස ව්‍යාප්ත වීමත් සමග ඔවුන්ට ඉස්ලාම් දහමේ පැමිණීමට පෙර තිබූ සියලු ආරවුල් අතුරු දහන් වූ බව හැඟුනි. දැන් අවුස්, කස්රජ් මෙන්ම යුදෙව්වන්ද එකම සමූහයක් ලෙස ජීවත් විය. මේ හේතුවෙන් සියල්ලෝම මෙම නව තත්ත්වය පිළිබඳව බෙහෙවින් ප්‍රීතිමත් විය. නමුත් මෑතකදී අළුතෙන් පහළ වූ කුරාණ වාක්‍යයන් වල මෙම ප්‍රීතිමත් සමූහය තුළ ඇතැම් බෙදීම් ඇති කරවන අදෘෂ්‍යමාන බලවේගයන් පිළිබඳව අවවාද කරන්නට විය. මෙම නව සමූහය තුළ ජීවත්වන විශ්වාස කරන්නවුන් සහ අවිශ්වාස කරන්නවුන් අතර තෙවන පාර්ෂවයක් පිළිබඳව ද කුරාණය අනාවරණයෙන් විය. ඒ කවරකු ද යත් කුහකයින් ය. ඔවුන් අප අල්ලාහ් පිළිබඳව විශ්වාස කරන්නෙමු යන්නෙන් මුස්ලිම්වරු අතර සිටින විට පවසන නමුත් ඔවුන් අත්තෙන්ම සිත් තුළ අවිශ්වාස කරන්නෝය. ඔවුන් ඔවුන්ගේ පිරිස් අතර සිටින විට අප නුඹ සමගය. අප හුදෙක් ඔවුන්ව සමච්චල් කළෙමු යන්නෙන් පවසන්නෝය. ඉස්ලාම් දහම පිළිබඳව සැකය ව්‍යාප්ත කිරීමට මොවුන් හැකි සෑම වෑයමක්ම දරන්නෝය. මෙම තත්ත්වය මුහම්මද් නබිතුමාට නව අභියෝගයක් විය. මක්කාවේ ඉස්ලාම් බැතිමතුන් සංඛ්‍යාව අතින් සුළු වුව ද, ඔවුන්ගේ විශ්වාසවන්තභාවය පිළිබඳව කිසිදු සැකයක් නොවීය. නමුත් මදීනාවෙහි ඉස්ලාම් දහම වැළඳ ගැනීමට ලෞකික කාරණා ද මුසුවී තිබුණු නිසා මෙම ඉස්ලාම් දහම වැළඳගන්නවුන් අතර කුහකයින් ද සිටියහ.
තවද මුහම්මද් නබිතුමාගේ පැමිණීමට පෙර අවුස් සහ කස්රජ් වංශ අතර ආරවුල් හේතු කොට ගෙන සුළුතරයක් ව සිටි යුදෙව්වන් බොහෝ බලවත් විය. නමුත් නව ගිවිසුම අනුව ඔවුනට සම අයිතිවාසිකම් හිමි වුවද අවුස් සහ කස්රජ් වංශ වල එකමුතුව හේතුවෙන් ඔවුනගේ බලය හීන විය. මේ හේතුවෙන් ඇතැම් යුදෙව්වන් ඇතැම් අවස්ථාවන් වලදී අවුස් සහ කස්රජ් වාංශිකයින්ගේ පැරණි අවේග අවුස්සා ආරවුල් ඇතිකිරීමට උත්සාහ කළෝය. නමුත් මුහම්මද් නබිතුමාගේ මැදිහත්වීමෙන් එම ආරවුල් එසැනින්ම සමථයකට පත් විය.
අවුස් සහ කස්රජ් වංශ වල ද මුහම්මද් නබිතුමාට වෛර කළ කිහිප දෙනෙකු විය. ඔවුන්ගෙන් බෙහෙවින්ම කුප්‍රකට පුද්ගලයා අබ්දල්ලා ඉබ්නූ උබෛ නම් විය. ඔහු කස්රජ් වංශයේ ප්‍රධානියකු වූ අතර මුහම්මද් නබිතුමාගේ පැමිණීමට පෙර සමස්ථ යත්‍රිබ් නුවරහිම පාලනය නතු කර ගැනීමට සිහින දුටුවෙකි. බොහෝ කාළයක් ඔහු ඉස්ලාම් ආගම වැළඳ නොගැනීම හේතුවෙන් ඔහුට තිබූ පිළිගැනීම පිරිහෙන්නට විය. මේ හේතුවෙන් ඔහු ඉස්ලාම් දහම වැළඳගෙන නිතර නැමදීම පිණිස පල්ලියට ද යනු දක්නට ලැබිණ. කෙසේ වෙතත් ඔහුගේ ඉස්ලාම් දහම පිළිබඳව බොහෝ දෙනා සැක කරන්නට විය.
මදීනාවෙහි ඉස්ලාම් බැතිමතුන් වර්ධනයවත්ම දන් දීම, උපවාසය ඇතුළු නව නීති රීති බොහෝමයක් පහළ විය. පස් වතාවක නැමදීම සාමූහිකව සිදු විය. මේ හේතුවෙන් ඔවුන් නැමදීමට පිරිස් කැඳවීමට උපක්‍රම යෝජනා කරන්නට විය. පළමුව ඔවුන් යුදෙව්වන් මෙන් නලාවක් පුම්බා පිරිස් කැඳවීමට යෝජනා කළෝය. පසුව ඔවුන් එවක කිතුණු පල්ලි වල මෙන් නාකුස් නම් ලීයෙන් සැදුම් ලත් ඝන්ටාරයක් යෝජනා කළෝය. මේ අනුව මෙම කර්තව්‍යය සඳහා ලී කැබලි දෙකක් සකසල ලදි. දෙවන අකබාවෙහි මුහම්මද් නබිතුමාට ප්‍රතිඥා දුන් පුද්ගලයකු වන අබ්දල්ලාහ් ඉබ්නූ සෛද් මේ සම්බන්ධයෙන් සිහිනයක් දුටුවේය. ඔහු දුටු සිහිනය මුහම්මද් නබිතුමා වෙත හෙළි කළේය. “මා සිහිනෙන් කොළ පැහැති ඇඳුම් ඇඳගත් මනුෂ්‍යයෙක් නාකුසයක් අතැතිව සිටිනු දැක ඔහුගෙන් එම නාකුසය විකුණන්නේදැයි ඇසුවෙමි. නුඹ මෙයින් කුමක් කරන්න දැයි ඔහු ප්‍රශ්ණ කළෙන් අප නැමදීම පිණිස පිරිස කැඳවන්නට එය භාවිතා කරන්නෙමුයි පැවසුවෙමි. මා නුඹට ඊට වඩා හොඳ ක්‍රමයක් පෙන්වන්න දැයි ඔහු පැවසුවේය. ඒ කුමක් දැයි මා ප්‍රශ්ණ කළෙමි. එවිට ඔහු පවසවු!
අල්ලාහු අක්බර් (අල්ලාහ් අති විශිෂ්ඨය) සිව් වරක්,
අෂ්හදු අන් ලා ඉලාහ ඉල්ලල්ලාහ් (අල්ලාහ් හැර නැමදීමට සුදුසු වෙනත් කිසිවකු නොමැති බවට සාක්ෂි දරමි) දෙවරක්,
අෂ්හදු අන්න මුහම්මදර් රසූලුල්ලාහ් (මුහම්මද් අල්ලාහ්ගේ දූතයා බවට සාක්ෂි දරමි) දෙවරක්
හයියාලස් සලාහ් (නැමදීමට පැමිණෙනු) දෙවරක්
හයියාලල් ෆලාහ් (ජයග්‍රහණය වෙත පැමිණෙනු) දෙවරක්
අල්ලාහු අක්බර් (අල්ලාහ් අති විශිෂ්ඨය) දෙවරක්
ලා ඉලාහ ඉල්ලල්ලාහ් (අල්ලාහ් හැර නැමදුමට වෙනත් කිසිවකු නැත) 2 වරක්.
මෙය ඇසූ මුහම්මද් නබිතුමා මෙය සත්‍ය සිහිනයකි. බිලාල් වෙත ගොස් මෙම වාක්‍යයන් ඔබ සිහිනයෙන් දුටු අයුරින්ම කියා දෙන්න. ඔහුට හොඳ කටහඬක් ඇත යන්නෙන් පැවසුවේය.