කුරෙයිෂි සේනාවෙන් පසු බැස පලා ගිය පිරිස් කෙමෙන් කෙමෙන් මක්කාවට සේන්දු වන්නට විය. මෙලෙස පලා ආ පිරිස් බද්ර් හි ලද අත්දැකීමෙන් දැඩි ලෙස භීතියට පත්ව සිටියෝය. කාබාව දෙසට ගිය එක් පුද්ගලයකු අබූ ලහබ්ව ඒ සමීපයේ දුටුවේය. අබූ ලහබ් ඔහුව වාඩිකර කුමක් සිදුවීදැයි විමසුවේය. ඊට පිළිතුරු දුන් ඔහු අපට සතුරන් හමු වුණි. අප බිය වී පසු බැස පලා ආවෙමු. ඔවුන් අප අතුරින් බොහෝ දෙනෙකු කැමති පරිදි සිරබාරයට ගත්තෝය. අපගේ පිරිසෙහි වරදක් ද නොවීය. මන් ද යත් අපට සටන් කිරීමට සිදු වූයේ ඔවුන් සමග පමණක් නොව. ඔවුන් සමග පුල්ලි සහිත අසුන් පැදවූ සුදු ඇඳගත් විශාල පිරිසක් වූහ. ඔවුන්ගෙන් කිසිවකුට ගැලවීමක් නොවීය. ඔවුනට මුහුණ දීමට කිසිවකුට නොහැකි විය. මේ සියල්ල ෆද්ල් ගේ මව සහ අබ්බාස් ගේ වහලෙකු වූ අබූ රාෆි අසා සිටියෝය. මොවුන් දෙදෙනාම රහසින් ඉස්ලාම් දහම වැළඳගෙන සිටියෝය. නමුත් මෙම වදන් අසා සිටි අබූ රාෆි හට ප්‍රීතිය යටපත් කරගන්නට නොහැකිව ඒ මලායිකාවරු යැයි ශබ්ද නගා පැවසුවේය. මෙය ඇසූ අබූ ලහබ් කෝපයට පත්ව අබූ රාෆිගේ මුහුණට පහර දී බිම හෙලා නැවත නැවතත් පහර දිය. මෙම පහර කෑමෙන් ලද තුවාල හේතුවෙන් ටික දිනකින් ඔහු මරණයට පත් විය.
මෙම සටනින් බොහෝ කුරෙයිෂි නායකින මරුමුවට පත් වූ හේතුවෙන් උමයියා වංශයේ අබූ සුෆියාන් ඔවුන් බොහෝ දෙනාගේ නායකයා බවට පත් විය. ඔහුගේ පුතුන් දෙදෙනා අතුරින් හන්සලා මරණයට පත් වූ අතර අම්ර් සිරබාරයට ගැනුණි. ඔවුන් හන්සලාව මරා අම්ර් නිදහස් කරගැනීමට මා කප්පම් ගෙවන්නට සිදු වී ද? ඔවුන් කැමති කාළයක් ඔහුව තබාගත්තදෙන් යැයි පැවසුවේය. අබූ සුෆියාන්ගේ බිරිඳ හින්ද් ඉතාමත්ම සැර කාන්තාවක් විය. ඇය හන්සලා සහ අම්ර් ගේ මව නොවුව ද මෙම සටනින් ඇගේ ඥාතීන් බොහෝ දෙනෙකු අහිමි විය. ඇගේ පියා උත්බා, මාමා ශයිබා සහ සොහොයුරා වලිද් ඒ අතර විය. මේ නිසා ඇය මුස්ලිම්වරුන්ගෙන් පලිගෙන ඇගේ පියා සහ මාමාව ඝාතනය කළ හම්සාගේ අක්මාව අමු අමුවේ සපා කන්නට ඉටා ගත්තාය.
අබූ සුෆියාන් විසින් මක්කාවට ආරක්ෂිතව රැගෙන පැමිණි වටිනා තවලමෙන් ලද ආදායම් ඉතාමත් බලවත් සේනාවක් සෑදීමට යොදා ගන්නටත් එමගින් මදීනාවෙන් එන ඔනෑම විරුද්ධ බලවේගයක් විනාශ කිරීමටත් තීරණය කළෝය. මෙම නව සේනාවට පිරිමින් උද්‌‍යෝගිමත් කිරීම පිණිස කාන්තාවන් ද සහභාගි කර ගැනීමට තීරණය කළෝය. තව ද කුරෙයිෂිවරුන්ගේ මිත්‍ර රාජ්‍යයන් සියල්ලටම මෙම සතුරු රාජ්‍යය පිළිබඳ තතු දන්වා මෙම සතුරු රාජ්‍යය පැරදවීමට බලවත් කාරණා පවසා ඔවුන් ද මෙම සටනට සහභාගි කරගැනීමට තීරණය කළෝය.