මුහම්මද් නබ්තුමා අබූබක්කර් සහ අලි බින් තාලිබ් හැරුණුකොට අනෙක් මක්කාවාසී මුස්ලිම්වරුන්ට යත්‍රිබ් නුවරට දේශාන්තරණය කිරන ලෙසට ධෛර්යමත් කරමින් සිටියේය. මේ හේතුවෙන් මක්කාවේ බොහෝ නිවෙස්වල පුද්ගලයින් අතුරුදහන් වෙමින් පැවතුනහ. ඇතැම් විට දෙමවුපියන් නොදැනුවත්ව දරුවන් අතුරුදහන් විය. ඇතැම් විට සමස්ථ නිවසම හිස් විය. මේ හේතුවෙන් ඇතැම් නිවෙස් වල උදවිය තම පවුල් වල ඉස්ලාම් දහම වැළඳගත් උදවිය සිටියේ නම් නිතරම ඔවුන් පිළිබඳව විමසිල්ලෙන් සිටියෝය. අබූ ජහ්ල් සහ අබූ ලහබ් මෙලෙස දේශාන්තරණය කරන්නට උත්සාහ කළ ඇතැම් පුද්ගලයින් අල්ලා ගැට ගසා ඉස්ලාම් දහම අත්හරින තෙක් වධ හිංසා පමුණුවනු ලැබීය. පසුගිය වසරේ බෙහෙවින් කාර්‍යබහුලව පැවති මක්කා නගරය දැන් පාළුවට ගොසින්ය. මේ සියල්ලට කාරණය එක් පුද්ගලයෙකි. කුරෙයිෂින් දැන් බෙහෙවින් භීතියට පත් විය.
මේ හේතුවෙන් කුරෙයිෂි නායකයින් සියල්ලෝම කාබාව ඉදිරිපිට විශේෂ සමුළුවකට රැස් විය. බනුහාෂිම් කුලයේ නායකයාව සිටි අබූ ලහබ් පමණක් එම රැස්වීම වුවමනාවෙන් මග හැරියේය. සියලු දෙනා විවිධ අදහස් පළ කළහ. සංවාදය දීර්ඝ ලෙස ඇදුනි. අවසානයේදී අබූ ජහ්ල්ගේ සැලැස්මට සියල්ලෝම එකතු විය. කුරෙයිෂි වංශයේ සියලු කුල වල පිරිස් ඔවුනොවුන්ගේ කුල වලින් එක් හැඩි දැඩි, විශ්වාසය තැබිය හැකි සහ සමාජයේ පිළිගැනීමක් ඇති පුද්ගලයකු බැගින් නම් කළ යුතුය. මෙම පුද්ගලයින් සියලු දෙනා එකතු වී මුහම්මද් නබිතුමාට මාරාන්තික පහරක් බැගින් පහර දීමෙන් සියලු කුල වල පිරිස් මත මුහම්මද් නබිතුමාගේ රුධිරය තැවරිය යුතුය. මේ අනුව මුහම්මද් නබිතුමාගේ කුලය වූ බනූ හාෂිම් කුලය හැරුණු කොට අනෙක් සියලු කුලයන් මොහුගේ මරණයට වගකීමට සිදුවන බැවින් බනූ හාෂිම් කුලයේ සාමාජිකයින් විසින් ඔවුන්ගේ කුලයේ සාමාජිකයකුගේ ඝාතනය සම්බන්ධයෙන් සියල්ලන්ගෙන් පළිගැනීම ප්‍රායෝගික නොවනු ඇත. මෙලෙස ඔවුන්ගේ සමාජයේ කරදරකාර පුද්ගලයකුගෙන් ගැලවෙන්නට ඔවුන් තීරණය කළෝය.
මේ අතර ජිබ්‍රායිල් මුහම්මද් නබිතුමා වෙත පැමිණ විධි විධාන ලබා දෙන ලදි. මුහම්මද් නබිතුමා හණිකට අබූ බක්කර්ගේ නිවසට පිටත් විය. ආයිෂා සහ ඇගේ සොයුරිය එහි සිටියෝය. මුහම්මද් නබිතුමාගේ හදිසි පැමිණීම කුමක් සම්බන්ධවද යන වග ඔහුට වැටහුණි. අල්ලාහ් මා හට දේශාන්තරණය කරන්නට අනුමැතිය ලබා දෙන ලදි යන්නෙන් ඔහු පැවසුවේය. මාත් සමග? ඔව් නුඹත් සමග. අබූ බක්කර් සතුටු කඳුලු සැලුවේය.
පසුව අලි බින් තාලිබ් මුණගැසුනු නබිතුමා ජිබ්‍රායිල් අනාවරණය කරන ලද කුරෙයිෂින්ගේ සැලැස්ම පිළිබඳ හෙළි කළේය. මේ හේතුවෙන් ඔහු තම භාරයේ ඇති අතැමුන්ගේ වස්තුන් සියල්ල නැවත අයිතිකාරයන්ට භාරදී යත්‍රිබ් නුවරට දේශාන්තරණය කිරීමට සැරසෙන බව පැවසුවේය.
මුහම්මද් නබිතුමාව ඝාතනය කරන්නට ඉදිරිපත්වූ තරුණයින් ඔහුගේ නිවස පිටත රාත්‍රිය බොවත්ම එක්රැස් විය. සුපරික්ෂාකාරීව සිටි මොවුන් මුහම්මද් නබිතුමා නිවසට ඇතුළු වූ බවට සනාථ කරගත්හ. නමුත් නිවස තුළින් කාන්තාවන් කිහිප දෙනෙකුගේ ශබ්දයන් ඇසුණු හෙයින් ඔහුව මැරීමට වඩාත්ම සුදුසු වේලාව පැමිණෙන තෙක් ඉවසීමෙන් බලා සිටියෝය. මේ බව දැනගත් මුහම්මද් නබිතුමා ඔහුගේ කබාය රැගෙන අලිට ලබාදී මෙය ඇඳගෙන මාගේ යහනෙන් නිදා ගනු. නුඹට කිසිදු හාණියක් සිදුවන්නේ නැත යන්නෙන් පැවසුවේය. පසුව ඔහුට ජිබ්‍රායිල් දුන් උපදෙස් අනුව ඔහු “යා සීන්” යන වචන වලින් ආරම්භ වන කුරාණ් පාඨය පාරායනා කරන්නට විය. “ඔවුන්ගේ පෙණීම අප ආවරණය කරන්නෙමු” යන වාක්‍යය පාරායනා කරනවාත් සමගම ඔහු නිවසින් පිටත් විය. ඔහු එම ඝාතකයින් අතරින් ගමන් කළ නමුත් ඔවුනට ඔහුව පෙණුනේ නැත. මුහම්මද් නබිතුමා යම් දුරක් ගිය පසු ඔහුව හඳුනාගත් පුද්ගලයකු මුහම්මද් නබිතුමාගේ නිවස පිටතින් රැස්ව සිටි මෙම පිරිස දුටුවේය. නුඹලාට මුහම්මද්ව ද අවශ්‍ය කරන්නෙ? ඔහු නිවසේ නැත. ඔහු පිටත් වී බොහෝ වේලාවක් ගත වී ඇත යන්නෙන් පැවසුවේය. මෙය විශ්වාස කළ නොහැක්කකි. අප ඉතා සුපරික්ෂාකාරීව සිටියෙමු. කිසිවකු නිවසින් පිට නොවූ බවට අපට විශ්වාසයි යන්නෙන් පැවසුවෝය. කෙසේ වෙතත් කාරණය ස්ථිර කරගැනීම පිණිස එක් ඝාතකයෙක් මුහම්මද් නබිතුමාගේ කාමරය තුළින් එබී බලා අපට අවශ්‍ය පුද්ගලයා තවමත් නිවසේ සිටින බවට ප්‍රකාශ කළේය. මුහම්මද් නබිතුමාගේ කබාය ඇඳ සිටි අලි උදෑසනින් අවදි වී නිවසේ දොරටුව වෙතට ගියේය. අලිව දුටු මෙම ඝාතකයින් පිරිසට කුමක් සිතන්නේදැයි අපහැදිලි විය. තවත් ටික වේලාවක් බලා සිට තත්ත්වය තේරුම් ගත් ඔවුන් වහාම ඔවුනොවුනගේ නායකයින් හමුවී සිදුවීම විස්තර කිරීමට තීරණය කළෝය.