ඔවුන් පැය කිහිපයක් විවේක ගත් පසුව ජිබ්‍රායිල් ඉතාමත් අලංකාර ලෙස ඇඳ පැළඳ ආයුධ සන්නද්ධව මුහම්මද් නබිතුමා වෙතට පැමිණ නුඹ ආයුද අත්හැර විවේක ගන්නේ ද අල්ලාහ්ගේ දූතයාණනි? මලායිකාවරු තවමත් විවේක ගත්තේ නැත. මා දැන් මෙහි පැමිණියේ සතුරන් පලවා හැර මිස වෙන කිසිවකින් නොව. අත්තෙන්ම සර්ව බලධාරී අල්ලාහ් ඔහුගේ බල පරාක්‍රමයෙන් නුඹට කුරයිසාගේ දරුවන්ට විරුද්ධව ක්‍රියා කළ යුතු යැයි අණ කරයි. ඔවුන්ගේ සිත් සතන් තුළ ත්‍රාසය ඇතිකිරීම පිණිස මා දැන් පිටත්ව යන්නේ ඔවුන් වෙතටයි.
මුහම්මද් නබිතුමා බනී කුරයිසා භූමියට ඇතුළුවන තෙක් කිසිවකු දිවා නැමදුමෙහි නොයෙදෙන ලෙසට සියලු සේනාවන්ට දැනුම් දිය. හිරු බසින්නට පෙර තුන් දහසකින් පමණ සමන්විත සමස්ථ සේනාවම සියලු බලකොටු වටලන ලදි. මෙම වැටලීම දින විසි පහක් මුළුල්ලේ ක්‍රියාත්මක විය.
මේ අතර බනී කුරයිසා නායක කාබ් ඔහුගේ ජනයා අමතා නුඹලාගෙන් ඇතැමුන් මුහම්මද් අල්ලාහ්ගේ දූතයාණන් බව පිළිගන්නා බව මා දනිමි. එසේ පිළිගන්නවුන් ඉස්ලාම් ආගම වැළඳගෙන ඔවුන්ගේ ජීවිත සහ දේපළ ද බේරාගනිවු යැයි ප්‍රකාශ කළේය. එහි සිටි තුන් හතර දෙනෙකු හැරුණුකොට අන් සියලු දෙනා තවුරාතය සහ මෝසස්ගේ නීතිය අතහැරීමට වඩා මරණය යහපත් යැයි ප්‍රකාශ කර සිටියෝය. මුහම්මද් නබිතුමා අල්ලාහ්ගේ දූතයාණන් බවට විශ්වාස කළ පුද්ගලයින් කිහිප දෙනා එහි සිටි බහුතරයට මේ බව ඒත්තු ගැන්වීමට උත්සාහ කළ ද කිසිදු ඵලයක් නොවීය. මේ හේතුවෙන් එම කිහිප දෙනා පිටතට ගොස් ඔවුන් ඉස්ලාම් දහම වැළඳ ගත් බව භටයින්ට පවසා නගරය තුළට ගියෝය. පසුව අම්ර් ඉබ්නූ සුදා නම් මුහම්මද් නබිතුමා සමග ගිවිසුම අවලංගු කිරීම පිළිබඳව මුළ සිටම විරුද්ධ වූ පුද්ගලයකු විසින් ඔහුගේ ජනයා ඉස්ලාම් දහම වැළඳ නොගන්නේ නම් මුහම්මද් නබිතුමාට වන්දි බද්දක් ගෙවීමට එකඟ වෙමු දැයි අසා සිටියේය. මුහම්මද් නබිතුමා මෙය පිළිගනීවි දැයි ඔහු නොදන්නා නමුත් මෙය උත්සාහ කිරීමට ඔහු යෝජනා කළේය. නමුත් ඔවුන් අරාබි වරුනට බදු ගෙවීමට වඩා මරණය සැප යැයි ප්‍රකාශ කර සිටියෝය. මේ හේතුවෙන් ඔහු ද ඉස්ලාම් ආගම වැළඳගෙන එම ස්ථානයෙන් පිට විය.
ඊළඟ දිනයේදී බනී කුරයිසා සියලු දෙනාම මුස්ලිම්වරුනට යටත්වී පිටතට පැමිණියෝය. පිරිමින් සියල්ලෝම ඔවුන්ගේ දෑත් දෙපස බැඳ එක් පසක තැබූ අතර ළමුන් සහ කාන්තාවන් අබ්දල්ලා ඉබ්නු සල්ලම් නම් ඉස්ලාම් දහම වැළඳ ගත් බනී කයිනුකා වංශයට අයත් යුදෙව් ආගමික නායකයකුව සිටි පුද්ගලයකුගේ භාරයට පත් කළේය. පසුව ඔවුනගේ බලකොටු සියල්ලෙහිම ආයුධ, ඇඳුම් සහ ගෘහ උපකරණ සියල්ල ඒකරාශී කරන ලදි. ඔවුන් සතුව තිබුණු මත් පැන් ආදිය විසි කරන ලදි.
අවුස් වංශ සාමාජිකයින් කිහිප දෙනෙකු මුහම්මද් නබිතුමා වෙත ගොස් ඔවුනගේ පැරණි මිත්‍ර පාර්ෂවයක්ව සිටි බනී කුරයිසා වරුනට ද කස්රජ් වංශයේ මිත්‍ර පාර්ෂවය වූ බනී කයිනුකා වාංශිකයිනට දුන්නාක් මෙන් තරමක් ලිහිල් දඬුවමක් ලබා දෙන මෙන් ඉල්ලා සිටියෝය. ඊට පිළිතුරු දුන් මුහම්මද් නබිතුමා මොවුනට ලබා දෙන දඬුවම තීරණය කිරීම නුඹලාගේ අවුස් වංශයේ කෙනෙකුට භාර දුන්නේ නම් නුඹලා තෘප්තිමත් වන්නේ දැයි ප්‍රශ්න කළේය. ඊට ඔවුන් එකඟ විය. එවිට ඔහු අවුස් වංශ ප්‍රධානී සාද් බින් මුආද් කැටුව එන ලෙසට පණිවිඩයක් යැවීය. සාද් ඔහුට ඊතල් ප්‍රහාරයකින් ලද තුවාලය තවමත් සුව නොවීම හේතුවෙන් ප්‍රතිකාර ලබමින් සිටියේය. කිහිප දෙනෙකු ඔහුට පණිවිඩය ලබා දී බූරුවකුගේ පිටින් මුහම්මද් නබිතුමා වෙතට රැගෙන ගියෝය. මෙලෙස මුහම්මද් නබිතුමා වෙතට ගමන් කරන අතරතුර ඇතැමුන් ඔහුට ඔවුනගේ මිත්‍ර පාර්ෂවය සමග තරමක් මානුෂිකභාවයෙන් කටයුතු කරන ලෙසට උපදෙස් දිය. සාද් බද්ර් සටනෙහි ද උමර් මෙන් යුද සිරකරුවන් තබා ගැනීමට සහ නිදහස් කිරීමට විරුද්ධ වූ අයෙකි. මෙලෙස නිදහස් කරන ලද ඇතැම් සිර කරුවන් නැවතත් උහුද් සටනෙහි සහ අගල් සටනෙහිදී මුස්ලිම් වරුන් සමග සටන් කළ අයුරු ඔහු සිහිපත් කළේය. තවද මෑතකදී නිම වූ අගල් සටනෙහි මෙතරම් විශාල සතුරු සේනාවකට මුහුණ දීමට සිදු වූයේ බනී නදීර් වාංශිකයිනට දුන් ජීවිත දානය හේතුවෙන් බවටද ඔහු සිහිපත් කළේය. එම අවස්ථාවේදීම ඔවුන් ඝාතනය කර තිබුණේ නම් මෙම සටනෙහි මෙතරම් සතුරු සේනාවක් නොපැමිණෙන අතර බනී කුරයිසා වාංශිකයින් ද මුහම්මද් නබිතුමා සමග ඇතිකරගත් ගිවිසුම කඩ නොකර සිට ඇතැයි ඔහු සිහිපත් කළේය. තවද ඔහු මුස්ලිම්වරුන් අතිවිශාල තර්ජනයකට මුහුණ පා සිටි අවස්ථාවේදී මුස්ලිම්වරුන්ගේ පරාජය නියත යැයි සිතා බනී කුරයිසාවරු දැක්වූ ප්‍රතිචාරයෙහි අශෝභන බව කෙරෙහි බෙහෙවින් කළ කිරී සිටියේය. නමුත් ඔහු බනී කුරයිසාවරුන් හට දැඩි දඬුවමක් නියම කළ විට බොහෝ දෙනා ඔහුට විරුද්ධව හඬ නගන බවද ඔහු සිහිපත් කළේය.
ඔහු කඳවුරට ඇතුළුවූ වහාම සියල්ලෝම නැගී සිටියෝය. අල්ලාහ්ගේ දූතයාණන් නුඹට අපගේ මිත්‍ර පාර්ෂවය පිළිබඳව තීරණයක් ගැනීමට පත් කර ඇත යන්නෙන් පැවසුවෝය. එසේ නම් මාගේ තීරණය ඔවුනගේ ඉරණම ලෙස පිළිගන්නා බවට නුඹලා අල්ලාහ් මත දිවුරන්නේ දැයි ප්‍රශ්න කළේය. අප එකඟ වෙමු යන්නෙන් ඔවුහු පිළිතුරු දිය. එසේ නම් මාගේ තීරණය පිරිමින් සියල්ලෝම ඝාතනය කර ඔවුනගේ වත්කම් සියල්ල බෙදා හැර කාන්තාවන් සහ ළමුන් සිරකරුවන් ලෙස තබා ගැනීමටත් ය. එය අසා සිටි මුහම්මද් නබිතුමා නුඹේ තීරණය ආකාශ හතෙන් එහා සිට පැමිණි අල්ලාහ්ගේ තීරණයයි යනුවෙන් ප්‍රකාශ කළේය.
මේ අනුව බනී කුරයිසා පිරිමින් සියලු දෙනා තවුරාතය පාරායනා කරමින් එකිනෙකාව සනසමින් සිටියෝය. ඊළඟ දිනයේදී හත්සියයක් පමණ වූ ඔවුන් සියලු දෙනා ඔවුන්ට සකස් කරන ලද මිනී වලවල් වල බහා අලි, සුබයිර් සහ තවත් කිහිප දෙනෙකු විසින් කඩුවෙන් සියල්ලන්ගේම ගෙලවල් සිඳලනලදි. ඔවුන්ගේ කාන්තාවන් සහ ළමුන් ඔවුන්ගේ වත්කම් ද සමග සටනට සහභාගිවූ සියල්ලන් අතර බෙදා හරිනලදි. මෙම සිරකරුවන් බොහෝ දෙනෙකු පසුව කයිබර්හි බනී නදීර් වාංශිකයින් වෙත කප්පම් ලබා නිදහස් කරන ලදි. මුහම්මද් නබිතුමාගේ කොටස වෙනුවෙන් රයිහානා නමින් යුදෙව් කාන්තාවක් වහලකු ලෙස ලබා දෙන ලදි. මැයව මුහම්මද් නබිතුමා ඔහුගේ නැන්දා වන සල්මා ගේ භාරයේ තබන ලදි. ඇය අපවත් වන තුරු පස් වසරක් මුහම්මද් නබිතුමාගේ වහලකු ලෙස ජීවත් විය. මුළදී ඇය ඉස්ලාම් දහම පිළිකුල් කළ ද, ඉස්ලාම් දහම වැළඳගත් අනෙක් යුදෙව් බැතිමතුන්ගේ ආභාෂයෙන් අවසානයේ ඇය ඉස්ලාම් දහම වැළඳ ගත්තාය. මුහම්මද් නබිතුමාට මෙය ආරංචි වීමෙන් බෙහෙවින් සතුටට පත් ව ඇය වෙත ගොස් ඇයව වහල් බවින් නිදහස් කරන්නටත් ඇයව විවාහ කර ගැනීමට ද යෝජනා කළේය. නමුත් ඇය එම යෝජනාව ප්‍රතික්ෂේප කරමින් අල්ලාහ්ගේ දූතයාණනි! මාව නුඹේ අධිකාරිය යටතේ තබා ගැනීම නුඹට මෙන්ම මා හටද වඩාත් යහපති යන්නෙන් පැවසුවාය.