කුරෙයිෂිවරුන්ට වූ අලාභය එතරම් නොවීය. තුන්දහසක පමණ පිරිස අතුරින් මරුමුවට පත්වූයේ විසි දෙකක් පමණි. මුස්ලිම්වරුන් හැට පහක් පමණ මැරී සිටින බවට ඔවුන් ගණන් කළෝය. ඔවුනගෙන් බොහෝමයක් දෙනා නොහඳුනන පිරිස් විය. හඳුනගත් මුහාජිරීන්වරු තිදෙනෙකු පමණි. හම්සා, මුසාබ් සහ අබ්දල්ලාහ් ඉබ්නූ ජහ්ෂ්. මුහම්මද් නබිතුමාගේ සිරුර කෙතරම් සෙවුවද හමු නොවීය. මේ අතර වහ්ෂි හම්සාගේ සිරුර සමීපයට ගොස් ඔහුගේ අක්මාව ගලවා හින්ද්ට ලබා දිය. නුඹේ පියාව මැරූ පුද්ගලයා මැරූ මට නුඹ කුමක් තිළිණ කරන්නේ දැයි ඔහු විමසුවේය. සටනින් අත්පත් කරගත් වස්තුවෙන් මාගේ කොටස නුඹට දෙමියි ඇය පිළිතුරු දිය. ඇය හම්සාගේ අක්මාව අතට ගෙන එයින් කොටසක් සපා කා ගිල්ලාය. පසුය ඇය හම්සාගේ දේහය වෙතට ගොස් සිරුරෙහි හම්සාගේ නාසය, කණ සහ වෙනත් අංග කපා දේහය විකෘති කළාය. ඇය පැළඳ සිටි මාලය සහ වෙනත් වටිනා පැළඳුම් ගලවා වහ්ෂිට තිළිණ කළාය. පසුව ඔවුන් සහ අනෙක් කුරෙයිෂිවරු කිහිප දෙනෙකු විසින් ද අනෙක් මුස්ලිම් දේහයන් ද විකෘති කළෝය.
මේ වන විට කුරෙයිෂිවරුන්ගේ අශ්වයින් බොහෝමයක් ඊ පහරවලින් තුවාල ලබා සිටියහ. තවද ඉබ්නූ උබයි විසින් විශාල සේනාවක් රැගෙන මදීනාවට පලා ගිය බව ද කුරෙයිෂිවරුනට ආරංචි වී තිබිණි. ඔවුන් මදීනාව ආක්‍රමණය කරන්නට සැරසුනේ නම් එම සේනාව ඔවුනට පහර නොදෙන්නේ යැයි කිසිදු නිශ්චයක් නොවූ හෙයින් ඔවුන් නැවතත් මදීනාවට ප්‍රහාර දියත් කිරීමට නොසිතූහ. කෙසේ වෙතත් මෙය නිශ්චය කරගැනීමට මුහම්මද් නබිතුමා විසින් සාද් නම් පුද්ගලයකුට කුරෙයිෂි හමුදාව ටික දුරක් ලුහු බැඳ ගොස් ඔවුන් පිටත් වන අයුරු පිළිබඳ විස්තර රැගෙන එන ලෙසට උපදෙස් දුන්නේය. ඔවුන් ඔටු පිටින් පිටත්ව අශ්වයින් ඔවුනගේ පසු පසින් ගමන් කරන්නේ නම් ඔවුන් මක්කාව බලා පිටත් වෙති. නමුත් ඔවුන්ගේ අසුන් ඉදිරියෙන් ගමන් කරමින් ඔටුවන් ඔවුනගේ පසු පසින් ගමන් කරන්නේ නම් ඔවුන් ප්‍රහාරයක් දියත් කිරීමට මදීනාව බලා පිටත් වෙතියි ඔහු පැවසුවේය. මුහම්මද් නබිතුමාගේ උපදෙස් අනුව සාද් අසු පිට නැග මක්කා සේනාව පසු පස ටික දුරක් ලුහු බැඳ ගොස් ඔවුන් ගමන් කරන අයුරු නිරීක්ෂණය කර ඔවුන් මක්කාව බලා පිටත් වන බවට සුභාරංචිය රැගෙන පැමිණියේය.
ටික වේලාවකට පසුව මුස්ලිම්වරු කන්දෙන් පහළට පැමිණ මරණයට ලක්වූ මුස්ලිම්වරුන්ගේ දේහයන් හමුවිය. හම්සාගේ දේහය විකෘති කර ඇති අයුරු දුටු මුහම්මද් නබිතුමා මෙතරම් කෝපයක් මීට පෙර මා අත් විඳ නැත යන්නෙන් පැවසුවේය. ඊළඟ වථාවේ අල්ලාහ් මා හට ජය ලබා දෙන මොහොතේ මා ඔවුනගේ තිස් දෙනෙකුගේ දේහයන් විකෘති කරමියි පැවසුවේය. නමුත් අල්ලාහ් විසින් මෙම අවස්ථාවේදී කුරාණ වාක්‍යයක් පහළ කරමින් මුහම්මද් නබිතුමාගේ ප්‍රකාශය අවලංගු කළේය.
“නුඹලාට අපරාධ කළවුන්ට නුඹලා දඬුවම් කරන්නේ නම් නුඹලා අපරාධයට ලක් වූවාක් මෙන්ම දඬුවම් කරනු. නමුත් නුඹලා ඉවසුවෙහු නම්, එය ඉවසිලිවන්තයින්ට ඉතා යහපත් ය.” (අල් කුරාණ් 16:126)
මේ හේතුවෙන් මුහම්මද් නබිතුමා තම තර්ජනය කිසි දිනක ක්‍රියාත්මක නොකළේය. නමුත් යුද්ධයකින් පසුව දේහයන් විකෘති කිරීම තහනම් කළේය. සටනෙහි ප්‍රතිවිපාක ආරංචි වීමත් සමග මදීනාවෙහි කාන්තාවන් හණිකට උහුද් වෙතට පැමිණියෝය. ඔවුනොවුන්ගේ ඥාතීන්ගේ විකෘති කරන ලද දේහයන් දැකීමෙන් ඔවුන් දැඩි ශෝකයට පත් විය. නමුත් හඬ නගා අඬා වැලපීම මුහම්මද් නබිතුමා විසින් මීට පෙර තහනම් කළ හෙයින් ශබ්ද නොමැතිව ඔවුන් කඳුළු සැලුවෝය.
“බියෙන් ද, කුසගින්නෙන් ද, වසතූන්, ජිවිත සහ පළතුරු ආදිය අහිමි වීමෙන් ද සැබැවින්ම අප නුඹලාව පරීක්ෂාවට ලක් කරන්නෙමු, ඉවසිලිවන්තයින්ට සුභාරංචිය දෙවු. සැබැවින්ම අප අල්ලාහ්ට අයිතිය, අපගේ ගමනාන්තය ඔහු වෙතටමය.” (අල් කුරාණ් 2:155 – 156)
ඉහත කුරාණ පාඨයන් මතක් කරමින් ඔවුන් සැනසීමක් ලැබුවෝය. ඔවුන් සියලු දෙනා එකතුවී මළවුන්ගේ අවසාන කටයුතු ඉටු කළහ. ෆාතිමා ඇගේ පියා එනම් මුහම්මද් නබිතුමාගේ තුවාල වලට ප්‍රතිකාර කළාය.
ආගමික වතාවත් වලින් පසුව මරණයට ලක් වූ මුස්ලිම් වරුන් සමස්ථය වන හැත්තෑ දෙදෙනෙකු භූමදානය කිරීමට පියවර ගත්තෝය. එක් මනීවළක දේහයන් දෙකක් හෝ තුනක් භූමදානය කළහ. පසුව මදීනාව බලා පිටත් වූ ඔවුන් මදීනාවට ළඟා වීමට පෙර මුහම්මද් නබිතුමාගේ උපදෙස් අනුව සියලු දෙනා මක්කාව දෙසට හැරී අල්ලාහ්ගෙන් අයාචනා කරන්නට විය. යා අල්ලාහ් අපට නුඹේ භාග්‍යය සහ කරුණාව දෙනු මැනව! නුඹේ ප්‍රසාදය සහ නුඹේ අනුෂේධය දෙනු මැනව! අප නුඹගෙන් සදාකාලික සෞභාග්‍යය ඉල්ලා සිටින්නෙමු. බියසුළු දිනයේ සහ අසරණ දිනයේ නුඹේ ආරක්ෂාව ඉල්ලා සිටින්නෙමු.