ක්‍රි.ව 626 උදා විය. ෆාතිමා හට තවත් දරුවකු ඉපදුණි. මුහම්මද් නබිතුමා ඔහුට හුසයින් හෙවත් පොඩි හසන් යන නම තැබුවේය. ටික දිනකින් ඔහුගේ බිරිඳ සෙයිනබ් අසනීප වී අපවත් විය. මසකට පමණ පසුව මුහම්මද් නබිතුමාගේ ඥාතියකු වූ අබූ සලාමා අපවත් විය. මෙයින් මාස හතරකට පසුව මුහම්මද් නබිතුමා අබූ සලාමාගේ බිරිඳ උම් සලාමා වෙත ගොස් ඇයත් සමග විවාහ වීමට කැමැත්ත පළ කර සිටියේය. ඊට ඇය ඔහුත් සමග විවාහ වීමට සුදුසු දැයි සැක පළ කර සිටියාය. මා දැන් වයසක කාන්තාවකි. අනාථ දරුවන්ගේ මවකි. මා සතුව ඊර්ෂ්‍යාව වැඩියෙන් ඇත. නමුත් අල්ලාහ් ගේ දුතයාණනි! නුඹ හට දැනටමත් බිරින්දෑවරු කිහිප දෙනෙකු සිටියි යන්නෙන් පැවසුවාය. මෙයට පිළිතුරු දුන් මුහම්මද් නබිතුමා මා නුඹට වඩා වයසින් වැඩි. නුඹේ ඊර්ෂ්‍යාව සම්බන්ධයෙන් මා අල්ලාහ් ගෙන් එය නැති කිරීමට ආයාචනා කරන්නෙමි. නුඹේ අනාථ දරුවන් අල්ලාහ් සහ ඔහුගේ දූතයා ඔවුන් බලා ගනිති යන්නෙන් පැවසුවේය. මේ අනුව ඔවුන් විවාහවිය.
උහුද් සටන අවසානයේ අබූ සුෆියාන් උහුද් කන්ද පාමුළ තර්ජනය කරන ලද ඊළඟ බද්ර් හමුව ළං වෙමින් පැවතිණි. බද්ර් යනු එවක වෙළෙඳපොළකි. මුහම්මද් නබිතුමා ඇතුළු පිරිස මදීනාවෙහි සිට මෙම වර්ෂයේ බද්ර් වෙත වෙළෙඳ තවලමක් පිටත් කර අබූ සුෆියාන්ගේ තර්ජනයට මුහුණ දීමට සියලු කටයුතු සූදානම් කරමින් සිටියේය. නමුත් මෙම වර්ෂයේ නියඟය හේතුවෙන් බද්ර් වෙතට ගමන් කරන අතරතුර ඔටුවන් සහ අශ්වයින්ට ආහාර පිණිස කිසිදු අහාරයක් මාර්ගයේ නොතිබීම හේතුවෙන් සතුන්ට සියලු ආහාර මක්කාවේ සිට රැගෙන යාමට කුරයිෂිවරුන්ට සිදු වනු ඇත. නමුත් අබූ සුෆියාන් කරන ලද තර්ජනය ජය නොගැනීමෙන් කුරෙයිෂින්ට වන අවමානය ගැන සිතීමේදී ඔහුට දරා ගත නොහැකි විය. මුහම්මද් මෙම තර්ජනයෙන් පසු බැස්සේ නම් ඔහු බෙහෙවින් සතුටට පත් විය හැක. නමුත් මදීනාවෙහි සිට ලද තොරතුරු වලට අනුව මුහම්මද් නබිතුමා දැනටමත් බද්ර් වෙත යෑමට ලැහැස්ති වෙමින් සිටියේය. මේ හේතුවෙන් අබූ සුෆියාන් සුහයිල් සහ තවත් නායකයින් කිහිප දෙනෙකු සමග සැලසුමක් සකස් කලෝය. එවක නුඅයිම් නමින් ගතෆාන් වංශයට අයත් බනී අශ්ජා කුලයේ සාමාජිකයෙක් සුහයිල්ගේ හොඳ මිත්‍රයෙක් විය. ඔහු මදීනාවට ගොස් මුහම්මද්ව බද්ර් වෙතට ගමන් කිරීමෙන් වැලැක්වුවහොත් ඔහුට ඔටුවන් විස්සක් තිළිණ වශයෙන් ලබා දීමට ඔවුන් පොරොන්දු විය. ඔහු ඊට එකඟවී මදීනාවට පිටත් විය.
ඔහු මදීනාවේ අන්සාරිවරු, මුහාජිරීන්වරු, යුදෙව්වන් සහ කුහකයින් ඇතුළු සියළු ජන කොටස් හමුවී බද්ර් වෙතට ගමන් කිරීමට ලැහැස්ති වන අබූ සුෆියාන්ගේ අති විශාල බලවත් සේනාව පිළිබඳ හංවඩු ගැසුවේය. පසුව ඔවුනට බද්ර් වෙත නොයන ලෙසට අවවාද කළේය. නුඹලා බද්ර් වෙත ගියෙහු නම් නුඹලාගෙන් කිසිවකු ඉතුරු වෙතැයි මා නොසිතමි යන්නෙන් අසා සිටි සියලු දෙනාටම ප්‍රකාශ කරමින් සිටියේය. මෙම පුවත ආරංචිවූ යුදෙව්වන් සහ කුහකයින් බෙහෙවින් සතුටට පත්වූ අතර මෙම පුවත ප්‍රචාරය කිරීමට ඔවුන් බෙහෙවින් දායක විය. මෙම පුවත ආරංචිවූ බොහෝමයක් මුස්ලිම්වරුන්ද මෙම වර්ෂයෙහි බද්ර් වෙත යාම බුද්ධිමත් නොවන කාර්‍යයක් යැයි සිතන්නට විය. මෙම තත්ත්වය මුහම්මද් නබිතුමාට ද ආරංචි විය. අබූ බක්කර් සහ උමර් මුහම්මද් නබිතුමාට කිසිවිටකත් පසු නොබසින ලෙසට අවවාද කළේය. අල්ලාහ් ඔහුගේ ආගම බේරාගනීවි. ඔහුගේ දූතයා හට ඔහු බලය ලබා දේවි යන්නෙන් ඔවුහු පැවසුවෝය. කිසිවකු නොමැතිව තනිවම යන්නට සිදුවූවත් මා එහි යන්නෙමියි මුහම්මද් නබිතුමා පිළිතුරු දුන්නේය.
මෙම වචන කිහිපය හේතුවෙන් නුඅයිම් හට ඔටුවන් විසිදෙනා අහිමි විය. ඔහුගේ සියලු උත්සාහයන් ව්‍යර්ථ විය. මුහම්මද් නබිතුමා මිනිසුන් සහ ඔටුවන් එක්දහස් පන්සියයක් සහ අශ්වයින් දහයක් ද සමග බද්ර් වෙතට ගමන් කළේය. මේ අතර අබූ සුෆියාන් කුරෙයිෂිවරු කිහිප දෙනෙකු සමග ටික දුරක් ගොස් දවස් දෙකක් මාර්ගයේ ගත කර නැවත මක්කාවට පැමිණ මුහම්මද් නබිතුමා බද්ර් වෙත නොපැමිණි හේතුවෙන් නැවතත් මක්කාවට ආ බව පැවසීමට තීරණය කළේය. නමුත් මුහම්මද් නබිතුමා ඇතුළු පිරිස බද්ර් හි දින අටක් තිස්සේ වෙළෙඳාම් කර නැවතත් මදීනාව බලා පිටත් විය. කුරෙයිෂිවරු පසුබැස‍ීම සහ මුහම්මද් නබිතුමා ඇතුළු පිරිස කුරෙයිෂිවරුන් සමග සටනට ලැහැස්තිවී බද්ර් වෙත පැමිණි පුවත අරාබිකරයේ සතර දිගට රැව් දෙන්නට විය. මුස්ලිම්වරුනට මෙය අති විශාල මානසික ජයග්‍රහනයක්වූ අතර කුරෙයිෂි නායකයින් අබූ සුෆියාන් කළ මෙම තර්ජනය හේතුවෙන් ලද මෙම නින්දාව නිසා ඔහුට දැඩි ලෙස දෝශාරෝපණය කළහ.
මෙයින් පසු මසක පමණ කාලයක් මදීනාවේ සාමකාමී වතාවරණයක් පැවති අතර මෙම කාලය තුළ මුස්ලිම්වරු නැමදුමෙහි, වෘත්තියෙහි සහ පවුල් සම්බන්ධතා සඳහා කාලය ගෙවමින් සිටියෝය. පසුව නැවත වරක් ගතෆාන් වංශයට අයත් පිරිස් මදීනාවට ප්‍රහාර දියත් කිරීමට පිටත් වී තිබෙන බවට ආරංචි වීමත් සමග මුහම්මද් නබිතුමා හාරසියයක පමණ පිරිසක් කැටුව නාජිද් ප්‍රදේශයට ගිය අතර සතුරන් වහාම පලා ගියෝය. මදීනාව මෙවන් ප්‍රහාරාත්මක ලෙස කටයුතු කිරීම හේතුවෙන් මදීනාවෙහි බලය සහ එහි ශ්‍රීඝ්‍ර ව්‍යාප්තිය පිලිබඳව අරාබිකරයේ සියලු දිශා වලට ආරංචි වන්නට විය. මුස්ලිම්වරුන් දෙස පිටතින් බැලූ විට මෙලෙස පෙණෙන්නට තිබුණ ද අතුලතාන්තය මීට වඩා බෙහෙවින් බලවත් විය. මුස්ලිම්වරු අතර තිබුණු සමගිය සහ මුහම්මද් නබිතුමා පිළිබඳව ඔවුන් තුළ තිබුණු විශ්වාසය, ආදරය සහ අවනත භාවය අසමසමය.
දිනක් මුහම්මද් නබිතුමා සෙයිද්ව මුනගැසීමට ඔහුගේ නිවසට ගියේය. මෙම අවස්ථාවේදී සෙයිද් නොසිටි අතර ඔහුගේ දෙවන බිරිඳ සෙයිනබ් දොර විවෘත කර සෙයිද් නොමැති බව පවසා ඔහුව නිවසට ආරාධනා කළේය. මුහම්මද් නබිතුමාගේ ඥාති සොයුරියක්වූ සෙයිනබ් දැකීමෙන් ඔහුගේ සිතෙහි යම් ආලයක් හටගත් බවට ඔහුට හැඟුනු හෙයින් ඇගේ ආරාධනය ප්‍රතික්ෂේප කර මිනිසුන්ගේ සිත් වෙනස් කරන ඔහු අති උත්කර්ෂවත්ය! යන්නෙන් පවසා වහාම එතැනින් පිටත් විය. සෙයිනබ්ගෙන් මේ බව දැනගත් සෙයිද් මුහම්මද් නබිතුමා වෙත ගොස් විමසූ විට සෙයිද් විසින් මුහම්මද් නබිතුමාට ඔහු සෙයිනබ්ව දික් කසාද කිරීමට කැමති වග දැනුම් දී ඇයව විවාහ කරගන්නා ලෙසට මුහම්මද් නබිතුමාට යෝජනා කළේය. ඉස්ලාම් ආගම අනුමත කළ කාරණා අතුරින් දික්කසාදය යන්න අල්ලාහ් වඩාත්ම අප්‍රිය කාරණය වීම හේතුවෙන් සෙයිද් හට දික්කසාද නොකර අල්ලාහ්ට බිය වන්න යැයි ඔහු අවවාද කළේය. කෙසේ නමුත් ආරම්භයේ සිට සෙයිද් සහ සෙයිනබ්ගේ විවාහ දිවිය එතරම් සාර්ථක නොවීය. ඔවුන් එවක විවාහ වීමට එකඟවීමට එකම හේතුව මුහම්මද් නබිතුමාගේ ඉල්ලීම නිසා විය. මේ හේතුවෙන් ඔවුන් දෙදෙනා අවසානයේදී දික්කසාදවීමට තීරණය කළෝය.
මේ වන විට මුහම්මද් නබිතුමාහට බිරින්දෑවරු සිවුදෙනෙකු විය. මෙය ඉස්ලාම් ආගමේ අනුමත උපරිම බිරින්දෑවරු සංඛ්‍යාව විය. තවද කුරාණයේ තම දරුවන් විවාහ කරගත් බිරින්දෑවරු එම දරුවන්ගේ පියවරුනට විවාහ කරගැනීමට තහනම් වී තිබුණි. සෙයිද් මුහම්මද් නබිතුමාගේ පුතා නොවුවද ඔහු පුතකු ලෙස හදා වඩා ගත් කෙනෙකි. කෙසේ වෙතත් මාස කිහිපයකට පසුව මුහම්මද් නබිතුමාට කුරාණ වාක්‍යයක් පහළ විය. සෙයිනබ් වෙත ගොස් අල්ලාහ් ඇයව මා හට ස්වර්ගයේ සිටම විවාහ කර දී තිබෙන්නාවූ පුවත ලබා දෙන්නට ඉදිරිපත් වන්නේ කවුදැයි ඔහු විමසුවේය. එහි සිටි සල්මා නම් කාන්තාවක් ඉදිරිපත් වී සෙයිනබ් වෙත මෙම පුවත ගෙන ගියාය. මෙම පුවතින් බෙහෙවින් සතුටට පත්වූ ඇය අල්ලාහ්ට එතැනම මුහුණින් වැටී නමස්කාර කොට අතේ සහ පයේ පැළඳ සිටි රිදී ආභරණ සල්මාට තිළිණ කළාය.
සෙයිනබ් හට දැන් වයස අවුරුදු හතලිහක් පමණ විය. අල්ලාහ් විසින් ඇයව මුහම්මද් නබිතුමා වෙත දැනටමත් විවාහ කර දී තිබුණු හෙයින් මනමාලිව කිසිදු ප්‍රමාදයකින් තොරව සැමියා සමීපයට රැගෙන එන ලදි. තවද මුහම්මද් නබිතුමා කිසිදු පුරුෂයකුට පියෙකු නොවන බවට කුරාණයෙන් තහවුරු වි තිබුණි. මේ හේතුවෙන් මුහම්මද් නබිතුමා සෙයිද්ව පුතකු ලෙස හදා වඩා ගත් හේතුවෙන් ඔහු මුහම්මද් නබිතුමාගේ පුතකු නොවූ වග පැහැදිළි විය. මේ හේතුවෙන් මීට පෙර සෙයිද් ඉබනූ මුහම්මද් හෙවත් මුහම්මද්ගේ පුත් සෙයිද් නමින් හැඳින්වූ සෙයිදි මින් පසුව සෙයිද්ගේ සත්‍ය පියාගේ නමින් සෙයිද් ඉබ්නූ හාරිදා යන නමින් හඳුන්වනු ලැබීය. මෙමගින් මුහම්මද් නබිතුමා සහ සෙයිද් අතර තිබුණු සමිබන්ධයෙහි කිසිදු වෙනසක් සිදු නොවූ නමුත් සෙයිද් මුහම්මද් නබිතුමාට උපන් පුතකු නොවන බවට මතක් කිරීමක් විය. තවද කුරාණයේ ඇතැම් වාක්‍යයන් මගින් කාන්තාවන් හතරකට වඩා විවාහ කිරීමට අනුමැතිය දී ඇත්තේ මුහම්මද් නබිතුමාට පමණක් බවත් මුහම්මද් නබිතුමා විවාහ කරගත් කාන්තාවකට මුහම්මද් නබිතුමාගෙන් පසුව නැවතත් විවාහ වීමට අනුමැතිය නොමැති බවත් ප්‍රකාශ විය. මෙය අල්ලාහ්ගේ දූතයාණන්ගේ අසමසම බව රැක ගැනීම පිණිස අල්ලාහ් විසින් පනවන ලද නීති විය.