මදීනාවට සේන්දුවූ පසුව ඔවුන් රාත්‍රියේ විවේක ගත්තෝය. උදෑසන අවදි වූ වහාම මුහම්මද් නබිතුමා විසින් උහුද් සටනට සහභාගී වූ සයල්ලන්වම නැවතත් රැස් කර අප මක්කා සේනාව ලුහු බැඳ යා යුතු යැයි නිවේදනය කළේය. කිහිප දෙනෙකු හැරුණුකොට සටනට සහභාගිවූ සියලු දෙනා පාහේ තුවාල ලැබී සිටියෝය. බොහෝ දෙනා තුවාල වලට ප්‍රතිකාර ලබමින් සිටියෝය. නමුත් මුහම්මද් නබිතුමාගේ නිවෙිදනය ආරංචි වූ විගස විවේක ගනිමින් සිටි සියලු දෙනා හණිකට ලැහැස්ති වෙන්නට විය. අතිශයින්ම බරපතළ තුවාල ලද දෙතුන්දෙනෙකු හැර අනෙක් සියලු දෙනා නැවතත් රැස්වූවෝය. මුහම්මද් නබිතුමාගේ අණතුරට ලක්වූ දකුණත සෙලවීමට පවා අපහසු වුවද දැන් ඔහු ලැහැස්තිවී අසු පිට නැගගත්තේය.
මදීනාවෙහි සිට පිටත්වූ ඔවුන් මදීනාවට සැතපුම් අටක් පමණ ඈතින් ලැගුම් ගත්හ. මෙම අවස්ථාවේදී සතුරන් මෙම ප්‍රදේශයට තරමක් නුදුරින් පිහිටි රවුහා නම් ප්‍රදේශයේ ලැගුම් ගෙන සිටියෝය. මේ බව ආරංචි වීමත් සමග මුහම්මද් නබිතුමා ඔහුගේ පිරිසට විශාල ප්‍රදේශයකට විසිර ගොස් දර එකතු කර තැනින් තැන ගිනි තබන්නට උපදෙස් දුන්නේය. රාත්‍රිය වන විට දර පොකුරු පන්සියයක් පමණ ඔවුන් තැනින් තැන ගිනි තැබුවෝය. ගිනි දැල් සහ දුමාරය බොහෝ දුරකට පෙණෙන්නට විය. මෙය දුටු කුරයිෂිවරු මදීනාවේ සිට අති විශාල සේනාවක් ප්‍රහාර දියත් කිරීමට තමන් ලුහුබඳිමින් සිටින්නේ යැයි සැක කරන්නට වූයෙන් මදීනාව ආක්‍රමණය කිරීමේ සියලු අදහස් අත්හැර දමා වහාම මක්කාවට පලා යන්නට තීරණය කළෝය. මෙලෙස දින තුනක් තිස්සේ රාත්‍රියේ ඔවුන් දර පුළුස්සමින් ලැගුම් ගෙන තෙවන දිනයේදී මදීනාව බලා පිටත් විය.
අබ්දල්ලාහ් ඉබ්නූ උබයි ඇතුළු කුහකයින් සහ යුදෙව්වන් මුහම්මද් නබිතුමාට දැඩි ලෙස චෝදනා සහ අපවාද නැගුවෝය. මරණයට පත්වූවන් සටනට නොගොස් අප සමග සිටියේ නම් ඔවුන් මරණයෙන් බේරෙන්නට තිබුණි යැයි උබයි දැනුම් දිය. මුහම්මද් යනු හුදෙක් රජකම අපේක්ෂා කරන පුද්ගලයකු පමණි. මීට පෙර කිසිදු වක්තෘ වරයකු මෙවැනි විපතකට මුහුණ දී නැත. ඔහු මෙන්ම ඔහුගේ අනුගාමිකයින්ට ද විශාල අණතුරු සිදුව ඇත යැයි යුදෙව්වන් පවසන්නට විය. මේ බව ආරංචි වූ උමර් මෙලෙස පවසන සියලු දෙනාවම මරණයට පත් කරන්නට මුහම්මද් නබිතුමාගෙන් අවසර ඉල්ලා සිටියේය. මුහම්මද් නබිතුමා එය ප්‍රතික්ෂේප කොට අල්ලාහ් ඔහුගේ ආගම ආරක්ෂා කර ඔහුගේ වක්තෘවරයාව බලවත් කරයි. එම්බල උමර්! කුරෙයිෂිවරුන්ට නැවතත් එවන් ජයක් නොලැබෙයි යන්නෙන් පැවසුවේය.
කෙසේ වෙතත් ඉබ්නූ උබයි උහුද් සටනෙහිදී කළ පාවා දීම හේතුවෙන් ඔහු ලබමින් සිටි ගෞරවය තරමක් හීන විය. සිකුරාදා දේශනයේදී පල්ලියේ ඔහු සාමාන්‍යයෙන් ලද ගෞරවය වෙනුවට අන්සාරිවරුන්ගෙන් අපහාස රැසකට ඔහුට මුහුණ දීමට සිදු විය. තවත් අන්සාරිවරයකු ඔහුව පල්ලියේ දොරටුව අසල සට පිටත් වවු! අල්ලාහ් ගේ දූතයායණන් නුඹ වෙනුවෙන් කෂමාව අයදිත්වා! යන්නෙන් ප්‍රාර්ථනා කළේය. ඊට ඔහු අල්ලාහ්ගේ නාමයෙන් දිවුරා මට ඔහුගේ ක්ෂමා ආයාචනය අවශ්‍ය නොවේ යැයි පැවසුවේය.
උහුද් සටනින් පසුව මාස දෙකක් පමණ මදීනාවෙහි සාමකාමී වථාවරණයක් තිබිණි. පසුව කුරෙයිෂින්ගේ මිත්‍ර පාර්ෂවයක් වන නාජිද් වංශයට අයත් බනී අසාද් කුලයේ සාමාජිකයින් මදීනාවට ප්‍රහාරයක් දියත් කිරීමට සැරසී සිටි බවට ආරංචි විය. උහුද් සටනින් පසුව වුවද මදීනාවෙහි බලවත් බව පෙන්වීමේ වුවමනාව නිසා මුහම්මද් නබිතුමා එකසිය පනහක පිරිසක් අබූ සලාමාගේ නායකත්වය යටතේ ඔවුන්ගේ ප්‍රදේශයට පිටත් කළේය. දින එකොලහකින් පසුව මොවුන් බනී අසාද් සාමාජිකයින්ට ප්‍රහාරයක් දියත් කොට විශාල ඔටුවන් රංචුවක් සහ එඬේරන් කිහිප දෙනෙකුද අත්පත් කරගෙන රැගෙන ආවෝය. තව දින කිහිපයකින් දකුණු දෙසින් තවත් ප්‍රහාරයක් පිළිබඳ තොරතුරු අනාවරණය විය. නමුත් මෙම අවස්ථාවේදී දිව්‍ය පණිවිඩයක් ඔස්සේ මෙම ප්‍රහාරයට පිටු පසින් සිටින නායකයා හුදායිල් ප්‍රදේශයේ ලිහියානයිට් නම් වංශයේ අති දෘෂ්ඨ නායකයෙකු බවට අනාවරණය විය. මේ අනුව මුහම්මද් නබිතුමා අබ්දල්ලා ඉබ්නූ උනයිස්ව එම පුද්ගලයා මරා දැමීමට උපදෙස් දී පිටත් කළේය. යන්නට පෙර මා එම පුද්ගලයා කෙසේ අඳුරගනිමි දැයි ඔහු ප්‍රශ්න කළේය. ඊට පිළිතුරු දුන් මුහම්මද් නබිතුමා ඔහුව දකින විට සාතාන්ව දකින්නාක් මෙන් නුඹට හැ‌ඟේවි. ඔහුගේ ක්‍රියා කලාපය දකින විට නුඹේ ඇඟ වෙවුලනවාක් මෙන් නුඹට දැනේවි යන්නෙන් පැවසුවේය. අබ්දල්ලා සාර්ථක ලෙස ඔහුව මරා දමා ජීවතුන් අතර නැවතත් මදීනාවට පැමිණියේය. මෙයින් පසුව මදීනාවට එරෙහි සියලු ප්‍රහාර අඩපණ විය.
බද්ර් සටනින් මරණයට පත් වූ උබයිදා නම් අන්සාරිවරයකුගේ බිරිඳ සෙයිනබ් දැන් වර්ෂයකට වැඩි කාළයක් තවමත් වැන්දබුවක් ව සිටියාය. මැය කාන්තාර වාසී වංශයක් වන අමීර් නම් වංශයට අයත් කුසෛමාගේ දුව විය. මුහම්මද් නබිතුමා මැයව විවාහ කරගැනීමට කැමැත්ත පළකර සිටියේය. මැය කැමැත්තෙන් ඊට එකඟ විය. මේ අනුව පල්ලියට යාබදව තවත් කාමරයක් මැය වෙනුවෙන් තනන ලදි.
මෙය ආරංචි වූ සෙයිනබ්ගේ බනී අමීර් කුලයේ නායක අබූ බර්රා මුහම්මද් නබිතුමාව බැහැ දැකීය. ඔවුන් සුලෙයිම් සහ ගතෆාන් නම් කුරෙයිෂිවරුන්ගේ මිත්‍ර පාර්ෂවයන් සමීපයේ පදිංචිව සිටි පිරිසකි. ඉස්ලාම් දහම පිළිබඳව ගෙන හැර පෑමේදී අබූ බර්රා මෙම ආගම ඔවුනගේ සමාජයට උගන්වා දීමට පිරිසක් යවන ලෙසටත් ඔවුනගේ පිරිස මෙම නව ආගම පිළිගත්තේ නම් එය ස්ථාපිත කරන්නටත් එකඟ විය. නමුත් ඔවුන් සිටි ප්‍රදේශයට යෑම මුස්ලිම්වරුනට බෙහෙවින් භයානක කාරණයක් බව මුහම්මද් නබිතුමා පැවසූවිට අබූ බර්රා ඔවුනට සම්පූර්ණ ආරක්ෂාව ලබා දීමට තීරණය කළේය. මේ අනුව මුහම්මද් නබිතුමා මුස්ලිම් වරු හතලිස් දෙනෙකු ඔහුත් සමග ඔවුනගේ පිරිස වෙතට පිටත් කර යැවීය.
කෙසේ වෙතත් අබූ බර්රාගේ බෑනා අබූ බර්රා සමග තිබුණු මත භේදයක් හේතුවෙන් මුස්ලිම්වරුන්ගේ පැමිණීම පිළිබඳව සුලෙයිම් වංශයට දන්වන ලදි. මදීනාවත් සමග සතුරන්ව සිටි ඔවුන් වහාම පැමිණ මුස්ලිම්වරුන් ලැගුම් ගෙන සිටි ස්ථානයට ගොස් එම අවස්ථාවේදී එහි නොසිටි මුස්ලිම්වරු දෙදෙනෙකු හැරුණුකොට අනෙක් සියලු දෙනාවම ඝාතනය කළෝය. එහි නොසිටි මුස්ලිම් වරු දෙදෙනා හාරිත් සහ අම්ර් නම් විය. සිදුව ඇති විපත දුටු හාරිත් ඝාතකයින් ලුහු බැඳ දෙදෙනෙකු ඝාතනය කරීමෙන් අනතුරුව ඝාතනයට ලක් විය. අම්ර් සිදුවූ සිදුවීම පිළිබඳ මුහම්මද් නබිතුමාට දැන්වීම පිණිස පලා යන අතරතුර මෙය සිදු කරන ලද්දේ අම්ර් වංශයට අයත් පුද්ගලයින් යැයි සිතා අම්ර් වංශයට අයත් පුද්ගලයින් දෙදෙනෙකු ඝාතනය කර මදීනාවට පලා ගියේය.
අවසානයේ ඝාතනයට ලක්වූ දෙදෙනා අබූ බර්රාගේ පිරිස බවත් ඔවුන් නිර්දෝෂි පුද්ගලයින් බවත් සැලවීමත් සමග මුහම්මද් නබිතුමා ඔවුන් දෙදෙනාගේ ඥාතීන්ට වන්දි මුදල් ගෙවීමට තීරණය කළේය.