යුදෙව් වංශයක් වන බනී නදීර් බනී අමීර් වංශයත් සමග බොහෝ කාලයක් තිස්සේ සමීප සම්බන්ධතා පැවැත්විය. මේ හේතුවෙන් බනී අමීර් වංශයට වන්දි ගෙවීම පිණිස උපකාර ලබා ගැනීමට මුහම්මද් නබිතුමා අබූ බක්කර් සහ උමර් ද කැටුව බනී නදීර් වංශයේ නායකයින් මුණගැසුණි. මුහම්මද් නබිතුමාගේ ඉල්ලීමට එකඟ වූ ඔවුන් මුහම්මද් නබිතුමා ඇතුළු පිරිසට කෑම වේලක් පිලියෙළ කරන තෙක් රැඳී සිටින ලෙස ආරාධනා කළෝය. මුහම්මද් නබිතුමා ඔවුනගේ ආරාධනය පිලිගෙන රැඳී සිටියේය. මේ අතරතුර ඔවුනගේ නායකයකුවූ හුයෙයි ඇතුළු පිරිසක් සියල්ල සූදානම් කිරීම පිණිස එම ස්ථානයෙන් පිටත් විය. ටික වේලාවකින් ජිබ්‍රායිල් මලායිකාවරයා මුහම්මද් නබිතුමාට යුදෙව්වන් ඔහුව ඝාතනය කිරීමට සැරසෙන බවටත් වහාම මදීනාව බලා පිටත් වන ලෙසටත් අණතුරු හැඟවීය. එවෙලෙහිම මුහම්මද් නබිතුමා තම ආසනයෙන් නැගිට කිසිවකුටත් නොකියා මදීනාවට පලා ගියේය. බොහෝ වේලාවක් එහි රැඳී සිටි අබූ බක්කර් ඇතුළු අනෙක් මුස්ලිම්වරු මුහම්මද් නබිතුමාගේ නොපැමිණීම හේතුවෙන් එතැනින් පිටත් වීමට තීරණය කළෝය.
මදීනාවට සේන්දුවූ පසු මුහම්මද් නබිතුමා මුහම්මද් ඉබ්නූ මස්ලමාහ් නම් පුද්ගලයකු මාර්ගයෙන් බනී නදීර් වංශය වෙත පණිවුඩයක් යවන ලදි. ඔහු වේගයෙන් ඔවුනගේ බලකොටුවට ගොස් එහි නායකයින් මුණගැසී මුහම්මද් නබිතුමාගේ පණිවුඩය ලබා දිය. අල්ලාහ්ගේ දූතයාණන් මාව නුඹලා වෙතට මෙම පණිවුඩයත් සමග යවන ලදි. මාව ඝාතනය කිරීමට උත්සාහ කිරීමෙන් නුඹලා මාත් සමග එකඟවූ ගිවිසුම කඩ කළෙහුය. යුදෙව්වන් කරන ලද ඝාතන සැලස්ම සවිස්තරාත්මකව විස්තර කොට, මාගේ රටින් පිටුවහල් වීමට මා නුඹලාට දින දහයක් ලබා දෙන්නෙමි. මෙම දින දහයෙන් පසුව නුඹලාගෙන් කිසිවකු මෙම ප්‍රදේශයේ දක්නට ලැබුවහොත් ඔහුගේ ගෙල සිඳනු ලැබේ. මෙය ඇසූ යුදෙව්වන් එම්බල මස්ලමාගේ පුතුණි! අවුස් වංශයේ මිනිසෙකු යම් දිනක අප වෙත මෙවන් පණිවුඩයක් රැගෙන එන්නේ යැයි අප කිසි දිනක නොසිතුවෙමු යැයි පැවසූහ. ඊට ඔහු අප සිත් වෙනස් වී ඇත යන්නෙන් පිළිතුරු දුන්නේය.
මෙම පණිවුඩය ලද පසු බොහෝ දෙනා මදීනාවෙන් පිටුවහල් වීමට ලැහැස්ති විය. නමුත් ඉබ්නූ උබයි නම් කස්රජ් වංශයේ කුහක නායකයා ඔවුන් වෙත පණිවුඩයක් යවමින් ඔවුනට උදව් ලබා දෙන්නට පොරොන්දුවී පිට නොවන ලෙසට උපදෙස් දුන්නේය. මෙය විශ්වාස කළ බනී නදීර් වංශ නායක හුයෙයි ඔවුනගේ අනෙක් මිත්‍ර පාර්ෂවයන්ගේ උදවු ද අපේක්ෂාවෙන් පිරිස අස්වැසූහ. පසුව ඔහු අනෙක් යුදෙව් වාංශිකයින්ගෙන් ද උදව් ඉල්ලා සිට මුහම්මද් නබිතුමාට අප අපගේ ප්‍රදේශය සහ වත්කම් අත් හැර නොයමු. නුඹලා කළ හැකි ඕනෑම දෙයක් කරව යන්නෙන් පණිවුඩයක් යවන ලදි.
මෙය ඇසූ මුහම්මද් නබිතුමා “අලලාහු අක්බර්” එනම් අල්ලාහ් අති ශ්‍රේෂඨයි යැයි පැවසුවේය. ඔහුගේ අනුගාමිකයින්ද එලෙසම පැවසුවෝය. යුදෙව්වන් අප සමග යුද ප්‍රකාශ කර සිටී යන්නෙන් නිවේදනය කර වහාම සේනාවක් ලැහැස්ති කරන ලදි. නැමදුමෙන් පසුව මුහම්මද් නබිතුමා සේනාව කැටුව බනී නදීර් බලකොටුව වැටලුවේය. ඊ ප්‍රහාර හුවමාරු විය. මිත්‍ර පාර්ෂවයන්ගෙන් උපකාර ලැබෙතැයි බොහෝ වේලාවක් අපේක්ෂා කළ ද කිසිදු උපකාරයක් මේ වනතෙක් බනී නදීර් වාංශිකයිනට නොලැබිණි. නමුත් මුස්ලිම් සේනාව සෑම දිනක් පාසාම වැඩි වන්නට විය. රාත්‍රිය වන විට මුස්ලිම් සේනාව යුදෙව් බලකොටුව සියලු පැති වලින් වටකරලීය. පසුව මුහම්මද් නබිතුමා අලි හට සේනාව මෙහෙයවීමේ වගකීම භාර දී අනුගාමිකයින් දස දෙනෙකු කැටුව මදීනාව බලා පිටත් විය. නැවතත් උදෑසන බලකොටුවට පැමිණියේය. තවමත් බනී නදීර් වංශයට කිසිදු උපකාරයක් නොලැබුණි. බනී කුරයිසා යුදෙවු වාංශිකයින් මුහම්මද් නබිතුමා සමග අතිකරගත් ගිවිසුම කඩ කිරීමට අකමැත්ත පළ කළෝය. බනී ගතාෆාන් වාංශිකයින් නිහඬ පිලිවෙතක් අනුගමනය කළෝය. ඉබ්නූ උබයි හට කිසිවක් කළ නොහැකි තත්ත්වයක් උදා වී ඇති බව දැනුම් දුන්නේය. දින දහයක් පමණ මෙලෙස කිසිදු උපකාරයක් නොමැතිව මොවුන් බලකොටුව තුළ සිරගතව සිට සටන් කළෝය. පසුව මුහම්මද් නබිතුමා ඔවුන්ගේ බලකොටුව අවට තිබුණු ඉඳි ගස් කිහිපයක් කපා දමන්නට අණ කළේය. ඔවුනට ආදායම් ගෙන දුන් මූලික මාර්ගයක්ව පැවති මෙම ඉඳිගස් අතුරින් කිහිපයක් කැපීමෙන් ප්‍රථිඵල අත් විය. ඔවුනගේ ප්‍රදේශයෙන් පිටත් වන බවට හුයෙයි පණිවුඩයක් යවන ලදි. නමුත් මුහම්මද් නබිතුමා ඔවුන් සතු ආයුද සහ ආම්පන්න රැගෙන යාමට අවසර නුදුන් අතර ඔවුන්ගේ ඔටුවන් පිට රැගෙන යා හැකි අනෙක් වස්තු සියල්ල රැගෙන යාමට අනුමැතිය දුන්නේය. කයිබර් බලා පිටත්වූ මෙම යුදෙව්වන් සතුව කෙතරම් විශාල වත්කමක් තිබුණු බව සියල්ලෝම දැනගත්තේ මෙදිනය. සෙනඟ පිරී තිබුණු මදීනා නගරය තුළින් පිටවූ මෙම තවලමෙහි තිබූ වටිනා වස්තූන් සියල්ලන්වම මවිත කරන්නට විය. මන්ද යත් යුදෙව්වන් ජීවත් වූ ආකාරය දෙස බැලූ කිසිවකුට ඔවුන් සතුව මෙතරම් වස්තූන් තිබුණු වග නොතේරුනණු නිසාවෙනි. පසුව බනී නදීර් අත්හැර ගිය ප්‍රදේශය සහ වත්කම් මක්කාවේ සිට පැමිණි සරණාගතයින් අතර බෙදා හරින ලදි.