ජයග්‍රාහක හමුදාව සති හතක කාලයකින් පසුව මදීනාවට පැමිණ සේන්දු වූ විට ජාෆර් ඇතුළු පිරිස ඇබිසීනියාවේ සිට මදීනාවට පැමිණ සේන්දු වී සිටියහ. වයස අවුරුදු විසි හතෙහිදී ඇබිසීනියාවට සරණාගතයකු ලෙස පිටත් වූ ඔහුට දැන් වයස අවුරුදු හතලිහකි. ඔහුව අවුරුදු දහ හතකට පසුව හමු වූ මුහම්මද් නබිතුමා ඔහුව බදාගෙන ඔහුගේ නළල සිප ගත්තේය. මෙම පුවත් දෙකෙන් වඩාත්ම සතුටු දායක පුවත කුමක්දැයි මා නොදනිමි. ජාෆර්ගේ පැමිණීම ද? නැතිනම් කයිබර් හි ජයග්‍රහණය ද? යන්නෙන් ඔහු පැවසුවේය.
ඔවුන් සමග පැමිණි උම්මු හබීබාගේ කාමරයද ලැහැස්ති වී තිබිණි. සියල්ලෝම අපේක්ෂා කළ පරිදි ඇය චාම් උත්සවයකින් පසුව මුහම්මද් නබිතුමා සමග සේන්දු විය. නමුත් මුහම්මද් නබිතුමාගේ බිරින්දෑවරුන් අපේක්ෂා නොකළ නව සිදුවීම වූයේ තරුණ අලංකාර සෆියාගේ විවාහයයි. ඇයව තාවකාලිකව හාරිතා නම් කාන්තාවකගේ නිවසෙහි පදිංචි කරන ලදි. සෆියාගේ අලංකාරය පිළිබඳව ආරංචි වූ ආයිෂා මුහුණු ආවරණය කරන ලදුව අනෙක් කාන්තාවන් සමග හාරිතාගේ නිවසට රහසින් ඇතුළු වී ඇගේ අලංකාරය නිරීක්ෂණය කර එතැනින් පිටත් වූවාය. ඇයව දුටු විගස ඇයව හඳුනාගත් මුහම්මද් නබිතුමා ඇය පසු පස ගොස් ආයිෂා. ඇයව නුඹ කෙසේ දකින්නේ දැයි ප්‍රශ්ණ කළේය. ඇය අනෙක් යුදෙව් කාන්තාවන් මෙන් තවත් එක් යුදෙව් කාන්තාවකි යන්නෙන් ඇය පිළිතුරු දුන්නාය. එසේ නොපවසවු ආයිෂා. ඇය ඉස්ලාම් ආගම වැළඳගෙන සිටියි යන්නෙන් ඔහු පැවසුවේය. සෆියා සහ ආයිෂා තරමක් සමීප වයසේ වූ හේතුවෙන් මුළදී ආයිෂාට සෆියා තර්ජනයක්ව පැවතුණි. නමුත් කල් යත්ම ඔවුන් දෙදෙනා හොඳ මිතුරන් බවට පත් විය.
කෙසේ වෙතත් මුහම්මද් නබිතුමාගේ බිරින්දෑවරුන් අතර ඊර්ෂ්‍යාව නොතිබුණා නොවේ. දිනක් මුහම්මද් නබිතුමා ආයිෂා වෙත පැමණීමට තරමක් ප්‍රමාද වූ අවස්ථාවක නුඹ මෙතරම් වේලාවක් කොහි සිටියේ දැයි ඇය ප්‍රශ්න කළාය. මගේ පොඩි සුදු එකී මා උම්මු සලාමා සමග සිටියා යන්නෙන් මුහම්මද් නබිතුමා පිළිතුරු දිය. නුඹ උම්මු සලාමා සමග සිටියා මදි දැයි ඇය ප්‍රශ්න කළාය. ඔහු සිනාසී කිසිදු පිළිතුරක් නොදුන් විට ඇය අල්ලාහ්ගේ දූතයාණනි! මට පවසවු. නුඹ මිටියාවත් දෙකක් මැද සිටිනා අවස්ථාවක එක් මිටියාවතක් සම්පූර්ණයෙන් කා දමන ලද අතර අනෙක සාරවත් තණ බිමකි. නුඹ නුඹේ ගවයින් කුමණ මිටියාවතෙහි තණ කැවීමට රැගෙන යන්නේ දැයි ඇය ප්‍රශ්න කළාය. අනිවාර්යයෙන්ම සාරවත් බිමට යැයි ඔහු පිළිතුරු දුන්නේය. එසේමයි. මා නුඹේ අනෙක් භාර්යාවන් මෙන් නොව. මා හැර නුඹේ අනෙක් සියලු භාර්යාවන් නුඹට කළින් විවාහ වී සිටි අය වෙති යන්නෙන් ඇය ප්‍රකාශ කළාය. මුහම්මද් නබිතුමා නැවතත් සිනාසී කිසිවක් නොකීවේය.
පසු කළෙක ආයිෂා විසින් ඇය මුහම්මද් නබිතුමාගේ භාර්යාවන් අතුරින් වඩාත්ම ඊර්ෂ්‍යා කළ භාර්යාව වූයේ කතීජා සමග බව පාපොච්චාරණය කර ඇත. මුහම්මද් නබිතුමා සෑම අවස්ථාවකම කතීජාගේ සමීප මිත්‍රයින් සමග වැඩි හිතවත්කමක් පෙණ්නුම් කර ඇත. දිනක් කතීජාගේ සොයුරියක් වූ හලා ඇගේ පුත් අබුල් ආස්, ලේලි සෙයිනබ් සහ මිනිබිරි උමාමා දැකීමට මක්කාවේ සිට මදීනාවට පැමිණ සිටියාය. ඇය ආයිෂාගේ නිවසේ දොරටුවට තට්ටු කොට ඇතුළුවීමට අවසර ඉල්ලා සිටියාය. මුහම්මද් නබිතුමාගේ මුහුණෙහි වර්ණය වහාම වෙනස් වී තරමක් කලබල වන ස්වභාවයක් දක්නට ලැබුණි. හලාගේ කට හඬ තුළ ඔහුට ඇගේ සොයුරිය කතීජාගේ කටහඬ ඇසුණි. තවද ඇය නිවස තුළට ඇතුළු වීමට අවසර ඉල්ලා සිටි අයුරු ද කතීජාගේ මෙන් විය. ආයිෂාට සිදුවීම වහාම වැටහී ඇය තුළ තද ඊර්ෂ්‍යාවක් හට ගෙන මුහම්මද් නබිතුමාට බැන වැදුණි.
කයිබර් සටනින් පසුව හවාසින් සහ ගතාෆාන් වංශ වල විවිධ කුලයන් අතර කුඩා සටන් හයක් පමණ උමර් සහ අබූ බක්කර්ගේ නායකත්වය යටතේ මෙහෙයවන ලදි. දිනක් උමර් මුහම්මද් නබිතුමාගේ නිවසට පැමිණි අවස්ථාවක මුහම්මද් නබිතුමාගේ නිවස තුළ කාන්තාවන් බොහෝ ශබ්ද නගනු ඔහුට ඇසුණි. මෙය මුහම්මද් නබිතුමාගේ ගරුත්වයට හාණියක් යයි ඔහු සිතුවේය. මෙම අවස්ථාවේදී කාන්තාවන් මුහම්මද් නබිතුමාගෙන් ඔහුට සටන් මගින් අත්පත් කරගත් වත්කම් වලින් ඔහුට හිමි වූ කොටසෙන් ලද ඇඳුම් පැළඳුම් ආදියෙන් ශබ්ද නගමින් ඔවුනොවුනට කොටසක් ඉල්ලා සිටියෝය. උමර් නිවස තුළට ඇතුළු වීමට අවසර ඉල්ලා සිටි විගස ඔහුගේ කට හඬ ඇසුණු කාන්තාවන් වහාම නිහඬ වී නිවසේ තිරයක් පසු පසට ගොස් සැඟවුණි. මෙය දුටු මුහම්මද් නබිතුමා නිහඬව සිනාසෙමින් උමර් හමු විය. එවිට උමර් මුහම්මද් නබිතුමාට අල්ලාහ් නුඹේ ජීවිතය සිනහවෙන් පුරවත්වා අල්ලාහ්ගේ දූතයාණනි! යන්නෙන් ප්‍රාර්ථනා කළේය. නුඹේ කට හඬ ඇසුණු සැනින් මා සමග සිටි කාන්තාවන් සියලු දෙනා තිරය පසුපස සැඟවුණු අයුරු ඉතාමත් විශ්මයජනකයි යන්නෙන් මුහම්මද් නබිතුමා පැවසුවේය. මෙම ආචාරය නුඹට හිමි විය යුත්තකි. මට නොව යන්නෙන් උමර් ප්‍රකාශ කළේය. පසුව ඔහු එම කාන්තාවන් ආමන්ත්‍රණය කරමින් නුඹලාගේ සතුරනි! නුඹලා මට බිය වී අල්ලාහ්ගේ දූතයාණන්ට බිය නොවන්නෙහු දැයි ප්‍රශ්ණ කළේය. එහෙමයි. නුඹ අල්ලාහ්ගේ දූතයාණන්ට වඩා සැර පරුෂයි යන්නෙන් ඔවුන් තිරය පසුපස සිට පිළිතුරු දිය. එය සත්‍යයක් කත්තාබ්ගේ පුතාණෙනි. සාතාන් නුඹ යම් දිශාවකින් යනු දුටුවේ නම් ඔහු එම දිශාව හැරෙන්නට වෙනත් ඕනෑම දිශාවකින් ගමන් කරන්නට තීරණය කරයි යන්නෙන් මුහම්මද් නබිතුමා දිවුරා ප්‍රකාශ කළේය.
මුහම්මද් නබිතුමා කයිබර් සටනින් පසුව මාස නවයක කාලයක් මදීනාවේ විසුවේය. මෙම කාලය තුළ මදීනාවෙහි සාමකාමී වාතාවරණයක් පැවතුණි. හිජාස්හි සටන් මගින් රැස්කරගත් වත්කම් හේතුවෙන් මදීනාවෙහි සැප සම්පත් බහුලව පැවතිය ද මෙම අළුතෙන් ලැබුණු වත්කම් හේතුවෙන් වෙනත් ගැටළු බිහි විය. මෙතරම් කාලයක් දුගී ලෙස ජීවත් වූ මදීනා වැසියෝ දැන් වැඩි වැඩියෙන් මුහම්මද් නබිතුමාගෙන් වත්කම් ඉල්ලා සිටියහ. දිනක් උමර් විසින් මුහම්මද් නබිතුමා තම දෑත් මත හිස තබා විශාල කල්පනාවක නිරත වනු දුටුවේය. ප්‍රශ්නය කුමක් දැයි විමසූ විට මුහම්මද් නබිතුමා උමර්! මොවුන් මාගෙන් මට ලබා දිය නොහැකි දෑ පවා ඉල්ලා සිටියි යන්නෙන් කනගාටුවෙන් ප්‍රකාශ කළේය.
මක්කාවේ කුරෙයිෂිවරුන් අතර පිරිමින් හට කාන්තාවන් මත අධිකාරියක් පැවතුණි. දිනක් උමර් ඔහුගේ බිරිඳට යම් කාරණයකට බැන වැදුනු අවස්ථාවක ඔහුගේ බිරිඳ ද ඊට එරෙහිව ඔහුට බැන වැදුනි. තම බිරිඳගෙන් මෙවන් ප්‍රතිචාරයකට හුරු නොවී සිටි ඔහු ඔහුගේ බිරිඳගේ මෙම හැසිරීමට හේතුව ඇගෙන් විමසීමේදී මුහම්මද් නබිතුමාගේ බිරින්දෑවරු ද මුහම්මද් නබිතුමාටම මෙලෙස තදින් පිළිතුරු දීමට පුරුදු වී සිටිනා විට නුඹට මෙලෙස පිළිතුරු දීමෙහි කිසිදු වරදක් නොමැති බව ඇය පවසා සිටියාය. මෙලෙස හැසිරෙන එක් අයෙකි ඔය සිටින්නේ යන්නෙන් පවසා ඇගේ දුව හෆ්සාව පෙන්වුවාය. හෆ්සාගෙන් උමර් මේ පිළිබඳව ප්‍රශ්න කිරීමේදී ඇය මෙම කාරණය පිළිගත්තාය. නබිතුමා නුඹත් සමග කෝප වූවේ නම් අල්ලාහ් නුඹව විනාශ නොකරන්නේ යැයි නුඹට විශ්වාස දැයි ඔහු ප්‍රශ්න කළේය. පසුව ඔහු ඔහුගේ ඥාති සොයුරියක් වූ උම්මු සලාමා වෙත ගොස් මෙම කාරණය පිළිබඳව ප්‍රශ්න කළේය. ඔව් අප අපගේ සිත් සතන් තුළ තිබෙන්නා වූ දෑ ඔහුට ප්‍රකාශ කරන්නෙමු. අල්ලාහ්ගේ දූතයාණන් සහ ඔහුගේ භාර්යාවන් අතරට පැමිණීමට නුඹට තිබෙන්නා වූ අධිකාරිය කුමක් ද? අල්ලාහ්ගේ දූතයාණන් ඔහුගේ භාර්යාවන්ගෙන් යම් පීඩාවක් විඳින්නේ නම් එය ඔහු තෝරාගත් දෙයකි. එලෙස කිරීමට ඔහු අපට තහනම් කළේ නම් අප ඔහුට නුඹටත් වඩා අවනත වන්නෙමුයි ඇය පැවසුවාය.
මේ අතර මුහම්මද් නබිතුමා ඊජිප්තුවේ රජු මුකාව්කිස්ට ඉස්ලාම් දහම වැළඳගන්නා ලෙස යවන ලද ලිපියෙන් පසුව එම රජු ඉස්ලාම් දහම වැළඳ නොගත් නමුත් ඔහු මුහම්මද් නබිතුමා හට විශාල ත්‍යාගයක් පිරිනමන ලදි. මෙම ත්‍යාගය තුළ රත්‍රන් විශාල ප්‍රමාණයක්, වටිනා ඇඳුම් කට්ටල විස්සක්, කොටලුවකු, බූරුවකු සහ කිතුණු වහල් කාන්තාවන් දෙදෙනෙකු ද විය. මෙම කාන්තාවන් දෙදෙනා සොයුරියන් විය. ඔවුන් නමින් මරියා සහ සීරින් නම් විය. මොවුන් දෙදෙනාම අලංකාර කාන්තාවන් විය. නමුත් මරියා ඇගේ සොයුරියටත් වඩා අලංකාර වූ අතර මුහම්මද් නබිතුමා ඇගේ අලංකාරය වර්ණනා කළේය. ඔහු සීරින්ව ඔහුගේ නහචරයකු වූ හසන් ඉබනූ තාබිත් නම් පුද්ගලයාට ලබා දී මරියාව මීට පෙර සෆියා රැඳී සිටි නිවසේ ඔහු සන්තකයේ තබා ගත්තේය. ඉස්ලාම් දහමෙහි වහල් කාන්තාවටද බිරිඳ හා සමාන සැලකිල්ලක් ස්වාමියාගෙන් හිමි වන නමුත් ඇයට ස්වාමියාගෙන් දේපළ හිමි නොවන අතර බිරිඳකට මෙන් ස්වාමියා කෙරෙහි වහල් අයිතිවාසිකම් හිමි නොවේ.