ඉස්ලාම් දහමෙහි වාර්ෂික මහ වන්දනාව වන දුල්හජ් මාසයෙහි හජ් වන්දනාවට අමතරව වර්ෂයෙහි ඕනෑම කාලයක යෙදිය හැකි කුඩා වන්දනාව උම්රා වන්දනාවයි. හුදෙයිබියා ගිවිසුමෙන් වසරකට පසුව ගිවිසුමට අනුව උම්රා වන්දනාවෙහි යෙදීමට කාලය එළඹ ඇත. මේ අනුව දෙදහසක පමණ පිරිසක් වන්දනාව පිණිස මක්කාවට යන්නට ලැහැස්ති විය. මුස්ලිම්වරු මක්කාව ආසන්නයට පැමිණ සිටින බව ආරංචි වීමත් සමග කුරෙයිෂිවරු ගිවිසුමට අනුව පූජා භූමියෙන් පිටත් වී කඳු පෙදෙසට නික්ම ගියෝය. කුරෙයිෂි නායකයින් අබූ කුබයිස් කඳුවැටියෙහි සිට පූජනීය භූමිය නිරීක්ෂණය කළෝය. වන්දනාවෙහි පැරණි චාරිත්‍රයට අනුව මුස්ලිම්වරු ලබ්බයික් අල්ලාහුම්ම ලබ්බයික් එනම් පැමිණියෙමි අල්ලාහ් නුඹට සේවය කිරීම පිණිස පැමිණියෙමි යන්නෙන් හඬ නගමින් පූජනීය භූමියට ඇතුළු වූහ. පසුව මුහම්මද් නබිතුමා කාබාව වටා සත් වාරයක් ඇවිදිමින් පැරණි චාරිත්‍රය ඉටු කළේය. ඔහුගේ අනුගාමිකයින් ද එලෙසම කළෝය. පසුව සෆා සහ මර්වා යන කුඩා කඳු දෙක අතර සත් වාරයක් ගමන් කළේය. පසුව එම ස්ථානයේ සත්ත්වයෙකු පූජා කර ඔහුගේ හිස බූ ගෑවේය. ඔහුගේ අනුගාමිකයින් ද මෙම සියලු චාරිත්‍ර එලෙසම සිදු කළෝය. පසුව ඔහු කාබාව තුළට ඇතුළු වීමට උත්සාහ කිරීමේදී කාබාවේ දොර වසා තිබුණි. මුහම්මද් නබිතුමා මෙහි යතුර රැගෙන පැමිණීමට පුද්ගලයකු යවන ලදි. කුරෙයිෂි නායකයින් මීට විරුද්ධ වී මෙය ගිවිසුමෙහි අන්තර්ගත නොවූ බව පවසා සිටියෝය. දහවල් වරුව උදා වීමත් සමග මුහම්මද් නබිතුමා කාබාවෙහි වහලට නැග නැමදුම පිණිස අදාන් ඇමතුම කිරීමට බිලාල්ට උපදෙස් දිය. බිලාල්ගේ කටහඬට කන්ද ඉහල සිට සවන් දුන් කුරෙයිෂි නායකයින් කාපිරි වහලකු කාබාව මත නැග සිටීම පිළිබඳව දැඩි ලෙස කෝපයට පත් විය. තවද මුස්ලිම්වරු මක්කාවට පැමිණ කිසිදු කරදරයක් නොමැතිව වන්දනාව ඉටු කිරීමට සමත්වීමෙන් ඔවුන් ලද මානසික ජයග්‍රහණය හේතුවෙන් කුරෙයිෂිවරුන් තම ජයග්‍රහණයක් යැයි සිතා සිටි හුදයිබියා ගිවිසුමට එකඟ වීම පිළිබඳව දැඩි ලෙස පසුතැවිලි විය.
කුරෙයිෂිවරු නොමැති නගරයේ වන්දනාකරුවන් දින තුනක් රැඳී සිටියෝය. රාත්‍රියේදී ඉස්ලාම් ආගම වැළඳගෙන සිටි මක්කා වැසියන් කිහිප දෙනෙකු රහසිගතව නගරයට පැමිණ මුස්ලිම්වරු හමු වී සතුටින් රාත්‍රිය ගෙවූහ. අබ්බාස් විවෘතවම නිතරම මුහම්මද් නබිතුමා සමග කල් ගත කළේය. මෙම කාලයේ ඔහු ඔහුගේ බිරිඳගේ සොයුරියක් සහ වැනදබුවක් ව සිටි මයිමූනාව මුහම්මද් නබිතුමාට සරණ පාවා ගැනීමට ඇරයුම් කළේය. මුහම්මද් නබිතුමා මෙම ඇරයුම පිළිගත්තේය.
දින තුන අවසානයේදී සුහයිල් සහ හුවයිතිබ් අබූ කුබයිස් කන්දෙන් පහළට පැමිණ මුහම්මද් නබිතුමා වෙත නුඹේ කාලය අවසන්. වහාම මෙම ස්ථානයෙන් පිටත් වනු යන්නෙන් පැවසුවේය. ඊට මුහම්මද් නබිතුමා මා මෙහි තවත් ටික කාලයක් සිට මාගේ විවාහය නුඹලා සමග සමරා නුඹලාට සංග්‍රහයක් කරන්නට ඉඩ දීමෙන් නුඹලාට සිදු වන හාණිය කුමක්දැයි ප්‍රශ්න කළේය. නුඹේ සංග්‍රහය අපට අවශ්‍ය නැත. වහාම මෙම ප්‍රදෙශයෙන් පිටවවු. නුඹ අප සමග ඇතිකරගත් ගිවිසුමට ප්‍රකාරව වහාම අප රටින් පිටත් වන ලෙසට අප නුඹෙන් ඉල්ලා සිටිමු යන්නෙන් ඔවුන් පැවසූහ. මේ අනුව මුහම්මද් නබිතුමා ඔහුගේ අනුගාමිකයින්ට සියලු දෙනාම රාත්‍රියේදී පිටත් වන ලෙසට නියෝග කළේය. කුරෙයිෂි නායකයින් දෙදෙනෙකු හැර අනෙක් සියලු නායකයින් මුහම්මද් නබිතුමා ඇතුළු පිරිසගේ වන්දනාව අබූ කුබයිස් කන්දෙහි සිට නිරීක්ෂණය කළෝය. නොසිටි නායකයින් දෙදෙනා වූයේ අම්ර් සහ කාලිද්ය.
කාලිද් ඉස්ලාම් දහමට එරෙහි ප්‍රබල විරෝධියකු ලෙස මතුපිටින් දක්නට ලැබුන ද අතුළතින් කාලයක් තිස්සේ ඔහු තුළ යම් සිදුවීම් සිදුවෙමින් පැවතුණි. උහුද් සටනෙහිදී කුරෙයිෂිවරුන්ගේ ජයග්‍රහණයට මූලිකතම හේතුව වූයේ මොහුගේ නායකත්වයෙන් මෙහෙය වූ මොහුගේ අශ්වාරෝහක බලඇණියයි. නමුත් උහුද් සටනින් සහ අගල් සටනින් පසුව ද මොහු තුළ මෙම සටන් දෙකම කුරෙයිෂිවරුනට කිසිදු ඵලයක් ගෙන නුදුන් අතර අවසානයේදී මුහම්මද් නබිතුමා ජයග්‍රහණය කරන බවට ඔහුට හැඟුනි. පෙර වර්ෂයේ හුදෙයිබියා ගිවිසුමට එළඹීමට පෙර මුහම්මද් නබිතුමා සහ පිරිස ඔහුගේ අශ්වාරෝහක බල ඇණියෙන් බේරී ගිය අවස්ථාවෙහිදී මුහම්මද් නබිට යම් අසීමිත ආරක්ෂාවක් ලැබෙන බව ඔහු ප්‍රකාශ කළේය. තවද කයිබර් සටනින් මුස්ලිම්වරු ලද විශිෂ්ඨ ජයග්‍රහණය ද ඔහුට ආරංචි විය. මීට අමතරව කාලිද්ගේ මව අස්මා ඉස්ලාම් දහම වැළඳගත්තාය. දැන් ඔහුගේ නැන්දා මයිමුනා එනම් අම්මාගේ නැගනිය මුහම්මද් නබිතුමාගේ භාර්යාවකි. දිනක් කාලිද් සිහිනයකින් ඔහු සියලු දිශාවන්ගෙන් ආවරණය වූ පාළු රටක වාසය කරමින් සිට පසුව ඉතාමත් සාරවත් සියලු දිශාවන්ට විවෘතව ඇදී යන ප්‍රදේශයකට දේශාන්තරණය කරනු දුටුවේය. මෙම සිහිනයේ තේරුම තේරුම්ගත් ඔහු මදීනාවට දේශාන්තරණය කිරීමට තීරණය කළේය.
නමුත් අම්ර් පිටතින් මෙන්ම සිත තුළින් ද ඉස්ලාම් දහමට දැඩි ලෙස විරුදධව සිටි පුද්ගලයෙකි. ඇබිසීනියාවට දේශාන්තරණය කළ මුස්ලිම්වරුන්ට ගැට කැපීමට අබිසීනියාවේ රජුවෙත තෑගි බෝග රැගෙන ගියේ මොහුය. මුහම්මද් නබිතුමාගේ බලය ව්‍යාප්ත වීමත් සමග ඉස්ලාම් දහමට යටත් වීමට අකමැති වීම හේතුවෙන් මොහු තරුණයින් කිහිප දෙනෙකු ද කැටුව ඇබිසීනියාවට දේශාන්තරණය කිරීමට තීරණය කළේය. මුහම්මද් මෙම බල අරගලයෙන් ජයග්‍රහණය කළහොත් ඔවුන් මුහම්මද්ට යටත් නොවී ඇබිසීනියාවේ කල් ගත කළ හැකි අතර කුරෙයිෂිවරු අරගලයෙන් ජය ගතහොත් ඔවුනට නැවතත් මක්කාවට පැමිණිය හැකි බවත් ඔහු මෙම තරුණයින්ට පවසා ඔවුන්ව මෙම ගමනට එකතු කරගන්නා ලදි.
අම්ර් මීට පෙර නේගුස් රජු ඉදිරියේ මුස්ලිම්වරු හමුවේ ලද පරාජයෙන් අධෛර්යමත් නොවූ අතර නිතර නේගුස් වෙත ත්‍යාග පිරිනමමින් මුස්ලිම් සරණාගතයින් පිළිබඳව කිසිවක් නොපවසමින් දේශපාලනමය සම්බන්ධතාවයක් පවත්වාගෙන යාමට උත්සුක විය. දැන් මුස්ලිම් සරණාගතයින් ඇබිසීනියාව අත් හැර මදීනාවට ගොස් සිටි නිසා මෙය නේගුස් හමු වීමට හොඳ කාලයක් යැයි සිතූ අම්ර් නේගුස්ට ත්‍යාග පිරිනමා ඔහු හමු විය. මෙම ත්‍යාග පිළිගත් නේගුස් බෙහෙවින් සතුටට පත් විය. මෙය දුටු අම්ර් නේගුස් ගෙන් ඔහු සහ ඔහුගේ පිරිස හට ඇබිසීනියාවේ සරණාගතයින් ලෙස ජීවත්වීමට අවසර ඉල්ලා සිටියේය. නමුත් සරණාගතයින් ලෙස පැමිණියේ කාගෙන් බේරීමට දැයි පැහැදිළි කිරීමට මුහම්මද් නබිතුමා පිළිබඳව ඔහුට යමක් සඳහන් කිරීමට සිදු වූ හෙයින් නේගුස් රජු බෙහෙවින් කෝපයට පත් විය. අම්ර් විමතියට පත් විය. නේගුස් ප්‍රකාශ කරන ලද දෙයින් ඔහුට වැටහුනේ නේගුස් වෙත ත්‍යාග බෝග පිරිනැමීමට වඩා නේගුස්ගේ පිහිට පැතීමට පහසුම ක්‍රමය මුහම්මද් නබිතුමාගේ අනුගාමිකයකු වීම බවය. ඔහු ඉස්ලාමයෙන් දිව ගොස් පිහිට පැතූ දේශය ද ඉස්ලාම් දහම ආක්‍රමණය කර ඇත. රජතුමනි! මුහම්මද් පවසන දෑ සත්‍යයක් යැයි නුඹ පවසන්නේ දැයි අම්ර් ප්‍රශ්න කළේය. අල්ලාහ් ඉදිරියේ එය සත්‍යයක් බවට මා සාක්ෂි දරමි. මේ නිසා මා පවසන දෑ නුඹ කරවු එම්බල අම්ර්. ඔහුව අනුගමනය කරනු. මුසා (මෝසස්) ෆිර්අවුන් (පාරාවෝ) ජය ගත් සේම ඔහු ඉදිරියට පැමිණෙන සියලු අභියෝග ඔහු ජයගන්නේමය යැයි ඔහු පැවසුවේය. මෙම සිදුවීමෙන් පසුව අම්ර් ඉස්ලාම් දහම වැළඳගෙන මදීනාවට පිටත් විය.