මුහම්මද් නබිතුමා අබූ සුෆියාන්ව සමස්ථ හමුදාවේ බලය බලාගත හැකි ස්ථානයක ස්ථානගත කරන ලෙසට අබ්බාස්ට උපදෙස් දුන්නේය. පසුව ඔහුට ඔහුගේ ජනයා වෙත ගොස් මෙම හමුදාවේ බලය පිළිබඳව පවසා දැනුවත් කළ හැක යන්නෙන් ඔහු පැවසුවේය. අබ්බාස් මේ අනුව අබූ සුෆියාන් රැගෙන විවිධ වංශ වලට අයත් හමුදාවේ අංශ පසු කරමින් ගමන් කළේය. එක් අංශයක ඉදිරියෙන්ම අසු පිට සිටි පුද්ගලයා දෙස බලා ඒ කවුදැයි ඔහු විමසුවේය. වලිද්ගේ පුත් කාලිද් යන්නෙන් අබ්බාස් පිළිතුරු දිය. අබූ සුෆියාන් කාලිද් පසුකරත්ම කාලිද් අල්ලාහු අක්බර් එනම් අල්ලාහ් අති ශ්‍රේෂ්ඨයි යන්නෙන් තෙවරක් හඬ නැගුවේය. ඔහු පසුපස සරණාගතයින් පන්සියයක බලඇණියක් සිටියහ. මෙලෙස අබූ සුෆියාන් තම වංශවල ධජය ඔසවාගත් බලඇණියක් පසු බලඇණියක් පසු කරමින් යන අතරතුර අබ්බාස් ගෙන් මේ කවුදැයි විමසන විට අබ්බාස් දුන් පිළිතුරු වලින් ඔහු බෙහෙවින් විමතියට පත් විය. ඇතැම් බලඇණි කුරෙයිෂිවරුනට කිසිවිටක හමු වී නොතිබුණු අතර ඇතැම් බලඇණි මෑතක් වන තුරු මුහම්මද් නබිතුමාට ඉතාමත්ම සතුරු වී සිටි පිරිසක් විය. ඔහු බලඇණියක් දෙස බලා සියලු අරාබිවරුන්ගෙන් මොවුන් මුහම්මද්ගේ බලවත්ම සතුරන්ව සිටි පිරිසකි යන්නෙන් පැවසුවේය. එවිට අබ්බාස් අල්ලාහ් ඔවුන්ගේ සිත් තුළට ඉස්ලාමය ඇතුළු කළේය. මේ සියල්ල අල්ලාහ්ගේ උපකාරයෙන් සිදු වූ දෑ ය යන්නෙන් ඔහු පිළිතුරු දුන්නේය. අවසානයේ පැමිණි බලඇණිය මුහම්මද් නබිතුමා සිටි බලඇණියයි. තද කොළ පැහැයට හුරු කළු පැහැති ලෝහ වලින් සම්පූර්ණයෙන්ම අයුද සන්නද්ධ වී සිටි මෙම බලඇණි‌යෙහි පුද්ගලයින්ගේ දෑස් පමණක් පෙණෙන්නට තිබුණි. මුහම්මද් නබිතුමා එහි ධජය සාද් බින් උබාදා නම් පුද්ගලයා අතට දී තිබුණි. ඔහු අබූ සුෆියාන් දෙස බලා එම්බල අබූ සුෆියාන්! මෙයයි නුඹලාගේ සමූල ඝාතන දිනය.මෙයයි විනාශ නොකළ හැකි අය විනාශ වන දිනය. මෙයයි අල්ලාහ් කුරෙයිෂිවරු අවමානයට ලක් කරන දිනය යන්නෙන් හඬ නැගුවේය. අබූ සුෆියාන් මුහම්මද් නබිතුමාට ඇසෙන දුරකට පැමිණි විට අල්ලාහ්ගේ දූතයාණනි! නුඹ නුඹේ ජනයා සමූල ඝාතනය කරන්නට අණ කළේ දැයි හඬ නගා ප්‍රශ්න කළේය. ඊට මුහම්මද් නබිතුමා මෙම දිනය සමාව දීමේ දිනයයි. අල්ලාහ් කුරෙයිෂිවරුන් ගෞරවයට පත් කරන දිනයයි යන්නෙන් පිළිතුරු දුන්නේය. ඉන් පසුව මුහම්මද් නබිතුමාගේ සමීපයේ සිටි අබ්දර්රහ්මාන් සහ උත්මාන් මුහම්මද් නබිතුමා වෙත සාද් කුරෙයිෂිවරුන් වෙත ප්‍රහාර එල්ල කළ හැකි බවට සැක පළ කළෝය. කෙසේ වෙතත් සාද්ව ද අවමානයට පත් නොකළ යුතු හෙයින් මුහම්මද් නබිතුමා සාද් සතුව තිබෙන කොඩිය ඔහුගේ පුත් කයිස්ට ලබා දෙන ලෙසට නියෝග කළේය.
සමස්ථ හමුදාවම දූටු අබූ සුෆියාන් වේගයෙන් මක්කාවට ගොස් ඔහුගේ නිවස ඉදිරියේ සිටගත්තේය. ඔහු වටා වේගයෙන් රැස් වූ පිරිස වෙතට කුරෙයිෂි ජනයිනි! මුහම්මද් නුඹලාට මෙල්ල කළ නොහැකි තරම් විශාල පිරිසක් රැගෙන පැමිණෙයි. ඔහු ලෝහයෙන් සන්නද්ධ දහ දහසක පිරිසක් සමග පැමිණෙයි. ඔහු උපකාරයක් ලෙස මාගේ නිවසට ගොඩ වන්නන් ආරක්ෂිත බව ප්‍රකාශ කර ඇත. එවිට ඔහුගේ බිරිඳ හින්ද් එනම් උහුද් සටනින් පසුව හම්සාගේ අක්මාව සපා කෑ කාන්තාව දැන් ඇගේ සැමියාගේ උඩු රැවුලෙන් ඇද මෙම කිසිවකුට වැඩක් නැති මුත්‍රාශයක් බඳු මිනිසාව මරා දමනු. නුඹද අපේ කමකට නැති ආරක්ෂිතයා යන්නෙන් පැවසුවාය. එවිට අබූ සුෆියාන් සාප වේවා නුඹට. මැගේ කථාව නුඹලාගේ හෘද සාක්ෂියට එරෙහිවන්නට ඉඩ නොදෙනු. දැන් එන්නේ නුඹලාට එරෙහි විය නොහැකි තරම් විශාල එකකි. නමුත් මාගේ නිවසට ගොඩ වන්නන් ආරක්ෂිතයි යන්නෙන් ඔහු කෑ ගැසුවේය. එවිට එහි සිටි පිරිස නුඹට සාප වේවා! මේ නගරයේ සිටින සියලු දෙනාට නුඹේ නිවස ප්‍රමාණවත් වන්නේ දැයි ප්‍රශ්න කළෝය. එවිට අබූ සුෆියාන් තව ද කවුරුන් ඔහුගේ නිවසෙහි අගුලු දමා අතුළට වී සිටින්නේ ද ඔවුන් ආරක්ෂිතය. තව ද කවුරුන් පල්ලිය තුළට වී සිටින්නේ ද ඔවුන් ද ආරක්ෂිතය යන්නෙන් පැවසුවේය. එවිට එහි රැස්වී සිටි පිරිස විසිර ගොස් ඇතැමුන් තම නිවෙස් වලටත් ඇතැමුන් පල්ලියටත් ගොස් සිටියෝය.
හමුදාව මක්කා නගරයට සමීප ප්‍රදේශයක් වන දුතුවා ප්‍රදේශයේ නතර විය. එම ස්ථානයේ සිට පාළුවට ගොස් තිබුණු මක්කා නගරය දෙස බලා මුහම්මද් නබිතුමා ඔහුගේ ඔටුවාගේ පිටෙහි සිට හිස නමා අල්ලාහ්ට තුති පිදුවේය. පසුව ඔහු හමුදාව කාණ්ඩ හතරකට බෙදා හතර දිශාවකින් හමුදාව මක්කා නගරයට ඇතුළු වීමට නියෝග දුන්නේය.
මේ අතර ඉක්රිමා, සෆ්වාන් සහ සුහයිල් කුරෙයිෂිවරු පිරිසක් සහ ඔවුනගේ මිත්‍ර වාංශිකයින් වූ බක්කර් සහ හුදයිල් හි පිරිස් රැගෙන සේනාවක් සංවිධානය කර ඉදිරියෙන්ම පැමිණි කාලිද්ගේ සේනාව සමග සටන් කළෝය. කාලිද්ගේ බලඇණිය පහසුවෙන් සතුරන් පළවා හැරියහ. මෙයින් සතුරන් තිස් දෙනෙකු පමණ මරා හෝ තුවාළ සිදු කළ අතර මුස්ලිම්වරු දෙදෙනෙකු මරණයට ලක් විය. මින්පසුව ඉක්රිමා සහ සෆ්වාන් අසු පිටින් මක්කාව අත්හැර ගිය අතර සුහයිල් නිවසට ගොස් අගුලු ලා ගත්තේය. මෙම සටන අවසන්වත්ම අසිපත් අමෝරාගෙන සටන් කරන සේනාව දුටු මුහම්මද් නබිතුමා මා සටන් කිරීම තහනම් නොකළේ දැයි ප්‍රශ්න කළේය. එවිට මෙම සටනට හේතුව පැහැදිළි කිරීමෙන් පසුව යම් හොඳකට අල්ලාහ් මෙය සිදුවන්නට ඉඩ හරින්නට ඇති යන්නෙන් පැවසුවේය.
පසුව ඔහු කාබාව වෙතට ගොස් එහි අග අමුණා ඇති පූජනීය කළු ගල අල්ලා අල්ලාහු අක්බර් එනම් අල්ලාහ් අති ශ්‍රේෂඨයි යන්නෙන් තෙවරක් හඬ නැගුවේය. එහි සිටි පිරිස ද එලෙසම හඬ නැගුවෝය. පසුව ඔහු කාබාව වටා තිබුණු පිළිම තුන්සිය හැට සමීපයට ගොස් එම පිළිම එකිනෙක බිමට පෙරළුවේය. මෙලෙස පිළිම බිමට පෙරලන ගමන් සත්‍යය පැමිණ ඇත. අසත්‍යය විනාශ විය. සැබැවින්ම අසත්‍යය විනාශ වන්නක්මය යන කුරාණ පාඨය පාරායනා කළේය. පසුව ඔහු සම් සම් ළි‌ඳෙන් ජලය බී කාබාවේ යතුර රැගෙන එන ලෙස දැන්වුවේය. මෙවිට අබ්බාස් මුහම්ම්ද් නබිතුමාගෙන් මෙම යතුරේ ආරක්ෂාව තම පවුලට ලබා දෙන ලෙසට ඉල්ලා සිටියේය. එවිට මුහම්මද් නබිතුමා නුඹ නැති කරගත් දෙයක් මා නුඹට ලබා දිය හැක. නමුත් වෙනත් කෙනෙකු සතු දෙයක් නුඹට ලබා දිය නොහැක යන්නෙන් පවසා පරම්පරා ගණනාවක් තිස්සේ කාබාවේ යතුර භාරයේ තිබූ අබ්දද්දර් වංශයේ සාමාජිකයාටම එම යතුර භාර දුන්නේය. පසුව කාබාව විවෘත කිරීමෙන් අනතුරුව කාබාවේ බිත්ති වල ඉබ්‍රාහීම්, ඉස්මායිල් ඇතුළු කුරෙයිෂිවරු වැඳුම් පිදුම් කළ දෙවිවරුනගේ රූප ඇඳ තිබුණි. මෙම රූප සියල්ල මකා දමන ලෙසට මුහම්මද් නබිතුමා නියෝග කළේය.
පසුව ඔහු එම පෙරලන ලද පිළිම සියල්ල විනාශ කර දමන ලෙස නියෝග කිරීමෙන් අනතුරුව සියල්ලන්ගේ නිවෙස් වල තිබෙන පිළිමද විනාශ කර දමන ලෙසට නියෝග කළේය. පසුව සෆා කන්ද සමීපයේ කතීජාගේ නිවස තුළට ගිය ඔහු එහි රැඳී සිටියේය. ඉස්ලාම් දහම වැළඳ ගැනීමට කැමැත්ත දැක්වූ පුද්ගලයින් සිය ගණනින් මෙම නිවසට පැමිණ මුහම්මද් නබිතුමා හමුවේ ඉස්ලාම් දහම වැළඳ ගත්තෝය. මොවුන් අතර අබූ සුෆියාන්ගේ බිරිඳ හින්ද් ද විය. මුහම්මද් නබිතුමාට බිය වී සිටි ඇය මුහුණ ආවරණය කර නිවසට ගොඩ වූවාය. පසුව ඇය මුහම්මද් නබිතුමා ඉදිරියේ ඉස්ලාම් දහම වැළඳගෙන ඇගේ මුහුණු ආවරණය ගැලවුවාය. ඇය දුටු මුහම්මද් නබිතුමා උත්බාගේ දුව හින්ද්. ඉස්ලාම් දහමටට පිළිගනිමු යන්නෙන් පැවසුවේය. ඉක්රිමාගේ බිරිඳ ද මෙලෙසම ඉස්ලාම් දහම වැළඳ ගත්තාය. පසුව ඇය මුහම්මද් නබිතුමාගෙන් ඇගේ ස්වාමියාට සමාව ලබා දීමට ආයාචනා කළාය. ඉක්රිමා තවමත් මුහම්මද් නබිතුමා සමග සටනෙහි නිරත වුවද ඔහුට සමාව දීමට මුහම්මද් නබිතුමා එකඟ විය. මේ අතර ඉක්රිමා මුහම්මද් නබිතුමාගෙන් බේරීම පිණිස තිහාමා සිට බෝට්ටුවකට නැග ඇබිසීනියාවට පලා යන්නට තීරණය කළේය. බෝට්ටුවට නගින්නට පෙර එහි කපිතාන්වරයා බෝට්ටුවේ ආරක්ෂාව පිණිස සියලු මගින්ගෙන් ලා ඉලාහ ඉල්ලල්ලාහ් හෙවත් අල්ලාහ් හැර වෙනත් දෙවියෙක් නොමැත යන්නෙන් පවසා අල්ලාහ්ව මතක් කර සිටින ලෙසට උපදෙස් දුන්නේය. මෙම අවස්ථාවේ දී ලා ඉලාහ ඉල්ලල්ලාහ් යන වචනය ඉක්රිමාගේ ආත්මය තුළට කිඳා බැස්සේය. නමුත් ඔහු බෝට්ටුවට අවතීර්ණ නොවුනේය. ඔහු මක්කාවෙන් පලා යන්නට හේතුව මෙම වචන කිහිපයට තිබුණු අකමැත්ත ය. බෝට්ටුවට ගොඩ වීම පිණිස ඔහුට මෙම වචන කිහිපය ප්‍රශ්නයක් නොවන්නේ නම් මක්කාවෙන් පලා යන්නට ඔහුට හේතුවක් නොමැති බව ඔහුට සිතෙන්නට විය. බෝට්ටුව තුළ මෙම වචන කිහිපය ඔහුට පිළිගත හැකි නම් ගොඩබිම ද ඔහුට මෙම වචන කිහිපය පිළිගත හැකි විය යුතුය. බෝට්ටුවේ මෙන්ම ගොඩබිම ද අපගේ දෙවියන් එක්කෙනෙක් බව ඔහුට වැටහිණි. පසුව ඔහුගේ බිරිඳ ඔහුව හමු වී මුහම්මද් නබිතුමා ඔහුට සමාව ලබා දුන් බව ඔහුට අනාවරණය කළාය. පසුව ඔහු මුහම්මද් නබිතුමාව හමු වන්නට පිටත් විය. මුහම්මද් නබිතුමා මෙය දැන සිටියේය. සහචරයිනි! අබූ ජහ්ල්ගේ පුත් ඉක්රිමා ඉස්ලාම් භක්තිකයකු ලෙස අප වෙතට පැමිණෙමින් සිටියි. මේ නිසා ඔහුගේ පියාව මොහු ඉදිරියේ මතක් නොකරනු. මරණයට ලක්වූවන් මතක් කිරීම ජීවත් වන්නන් අගෞරවයට පත් කරන නමුත් මරණයට ලක් වූවන් වෙතට නොයති යන්නෙන් පැවසුවේය. ඔහු මුහම්මද් නබිතුමා හමු වී ඉස්ලාම් ආගම වැළඳ ගත් විට මුහම්මද් නබිතුමා බෙහෙවින් සතුටට පත් විය. නුඹ ඕනෑම දෙයක් ඉල්ලනු මා එය ඉටු කරන්නම් යන්නෙන් මුහම්මද් නබිතුමා ඔහුට පැවසුවේය. එවිට ඉක්රිමා මා නුඹට විරුද්ධව සිදු කළ සියලු දෑ ක්ෂමා කරන ලෙසට අල්ලාහ්ගෙන් ආයාචනා කරන ලෙසට ඔහු ඉල්ලා සිටියේය. මුහම්මද් නබිතුමා ඔහු වෙනුවෙන් අල්ලාහ්ගෙන් ආයාචනා කළේය.