හුදයිබියා ගිවිසුමට එළඹීමේදී සහභාගී වූ කුරෙයිෂිවරුන්ගේ මිත්‍ර පාර්ෂවය වූ බක්කර් සහ මුස්ලිම්වරුනගේ මිත්‍ර පාර්ෂවය වූ කුස්සා නම් වංශ අතර යම් ඝට්ටනයක් සිදු විය. මෙම ඝට්ටනයේදී කුරෙයිෂිවරු ඔවුනගේ මිත්‍ර පාර්ෂවයනට අවි ආයුද සහ ඇතැම් විට රාත්‍රියේදී හේවායන්ගෙන් ද උපකාර කළෝය. මේ හේතුවෙන් කුස්සා වංශයට අයත් කාබ් කුළයේ සාමාජියකයින් විසින් වහාම මේ බව මුහම්මද් නබිතුමාට දන්වා ඔහුගෙන් උපකාර පැතුවෝය. මෙයින් බෙහෙවින් කුපිත වූ මුහම්මද් නබිතුමා ඔවුනට උපකාර වන බව පවසමින් ඔවුන් සනසා ඔවුන්ව පිටත් කර හරින ලදි.
ගිවිසුම කඩ කිරීම සම්බන්ධයෙන් කුරෙයිෂිවරුන් බෙහෙවින් පසුතැවිලි විය. මෙහි ප්‍රතිවිපාක පිළිබඳව බියට පත් වූ ඔවුන් අබූ සුෆියාන්ව මුහම්මද් නබිතුමාව සැනසීම පිණිස මදීනාවට පිටත් කර යවන ලදි. මුහම්මද් නබිතුමාව හමු වූ අබූ සුෆියාන් එම්බල මුහම්මද්! මා ගිවිසුමට එළඹූ අවස්ථාවේදී එහි සිටියේ නැත. මේ නිසා අප ගිවිසුම නැවත ශක්තිමත් කර එහි කාලය දීර්ඝ කරමුයි පැවසුවේය. නැවතත් එම ගිවිසුම කඩ කිරීමට දැයි නබිතුමා ප්‍රශ්න කළේය. අල්ලාහ්ගේ නාමයෙන් නැත යැයි අබූ සුෆියාන් තරමක් කලබලයෙන් පිළිතුරු දුන්නේය. අප ද මෙම ගිවිසුම එය වලංගු කාලය ඉවරවන තෙක් එය පවත්වාගෙන යන්නෙමු. අප එය වෙනස් කරන්නේ ද නැත වෙනත් ගිවිසුමකට එළඹෙන්නේ ද නැත යන්නෙන් මුහම්මද් නබිතුමා පැවසුවේය. මුහම්මද් නබිතුමා ඔහුත් සමග තවත් සාකච්ඡා කිරීමට අකමැති බව තේරුම්ගත් හෙයින් ඔහු ඔහුගේ දුව සහ මුහම්මද් නබිතුමාගේ බිරිඳක් වූ උම්මු හබීබා හමු වී මුහම්මද් නබිතුමාව පොළඹවාගැනීමට උත්සාහ කළේය. මේ අනුව ඔහු උම්මු හබීබාගේ නිවසට ගොස් ඇය හමු වී මුහම්මද් නබිතුමාගේ පලසේ වාඩි ගන්නට උත්සාහ කරත්ම ඇය එම පලස පහළින් ඇද හැකිලුවාය. ඇයි මගේ පොඩි දුව මෙම පලස මට හොඳ වැඩි ද? නැතිනම් මා මෙම පලසට හොඳ වැඩි දැයි ඔහු ප්‍රශ්න කළේය. මෙය නබිතුමාගේ පලස. නුඹ පිලිම වන්දනාකරුවෙකි. අපිරිසිදු තැනැත්තෙකි. නුඹ කුරෙයිෂිවරුන්ගේ නායකයාය. නුඹ තවමත් ඉස්ලාම් දහම වැළඳ නොගෙන අසන්නටවත් කතාකරන්නටවත් බැරි ගල් පිලිම වන්දනා කරන්නට හේතුව කුමක් දැයි ඇය විමසුවාය. පුදුමයෙනුත් පුදුමය! නුඹ කියන්නේ මා මුහම්මද්ගේ ආගම ඇදහීම පිණිස මාගේ මුතුන්මිත්තන් ඇදහූ ආගම අත්හරින්න කියා දැයි ඔහු ප්‍රශ්න කළේය. ඇගෙන් කිසිදු උපකාරයක් නොලැබෙන බව තේරුම් ගත් ඔහු අබූ බක්කර් සහ අනෙක් අය හමු වී ගිවිසුම අළුත් කිරීමට මුහම්මද් නබිතුමා පෙළඹවීමට උත්සාහ කළේය. නමුත් මුහම්මද් නබිතුමා යම් තීරණයකට එළඹීමෙන් පසුව එය වෙනස් කිරීමට කිසිවකු කිසිදු උත්සාහයක් ගැනීමට නොසිතූහ. සියලුම උත්සාහයන් අසාර්ථක වීමෙන් ඔහු මක්කාවට පිටත් විය.
පසුව මුහම්මද් නබිතුමා විශාල සේනාවක් සංවිධානය කරමින් සිටියේය. අබූ බක්කර් විසින් ඔහුගෙන් තමන් ද මෙයට සහභාගී විය යුතු දැයි විමසූ කල්හි ඔව් යන්නෙන් මුහම්මද් නබිතුමා පිළිතුරු දිය. අප කුරෙයිෂිවරුනට විරුද්ධව යන්නෙමුයි ඔහු ප්‍රකාශ කළේය. අප ගිවිසුම ඉවර වන තෙක් නොසිටිය යුතු දැයි ඔහු ප්‍රශ්න කළේය. ඊට මුහමම්ද් නබිතුමා ඔවුන් අපව පාවා දී ගිවිසුම උල්ලංගනය කර ඇත. මේ නිසා අප ඔවුනට පහර දිය යුතුයි යන්නෙන් ඔහු පිළිතුරු දිය. නමුත් මෙය රහසක්ව තබා ගනු. මුහම්මද් සිරියාවට හෝ තායිෆ් වලට ප්‍රහාරයකට සූදානම් වෙතැයි සියල්ලෝම සිතාගත්තාවෙ යන්නෙන් ඔහු ප්‍රකාශ කළේය. පසුව ඔහු අප ඔවුනගේ භූමියට එකවර පැමිනෙණ තෙක් ඔවුනට අපගේ ක්‍රියාකලාපය පිළිබඳව කිසිදු හෝඩුවාවක් ලබා නොදෙන්නැයි අල්ලාහ්ගෙන් අයාචනා කළේය. ටික දිනකින් මුහම්මද් නබිතුමාට ජිබ්රීල් මලායිකාවරයා වෙතින් හාතිබ් නම් මුහාජිරීන්වරයකුට කෙසේ හෝ රහස ආරංචි වී කාන්තාවක් මාර්ගයෙන් කුරෙයිෂිවරුන් වෙතට මෙම ප්‍රහාරය පිළිබඳ පණිවිඩය රැගෙන යන බවට පණිවිඩයක් ලැබිණි. මුහම්මද් නබිතුමා අලි සහ සුබයිර්ව මෙම කාන්තාව රැගෙන එන්නට යවන ලදි. නමුත් මෙම කාන්තාවගෙන් මේ පිළිබඳව විමසූ කල්හි ඇය සතුව කිසිවක් නොමැති බව ප්‍රකාශ කළේය. මේ නිසා ඇය එම ලිපිය නොදුන්නේ නම් ඇයව තරයේ සෝදිසි කරන්නට සිදුවෙතැයි තර්ජනය කළ නිසා ඇගේ හිසකෙස් අතර සඟවා තිබූ ලිපිය ඔවුනට ලබා දුන්නාය. පසුව මුහම්මද් නබිතුමා හාතිබ් ගෙන්වා මේ පිළිබඳව ප්‍රශ්න කළේය. එවිට ඔහු තමා ඉස්ලාම් දහම අදහන්නෙක් බවත් මක්කාවේ සිටින ඔහුගේ පුතා සහ දුවට කිසිදු හාණියක් සිදු නොවීම පිණිස මෙලෙස සිදු කළ බවත් ඔහු ප්‍රකාශ කළේය. එවිට උමර් අල්ලාහ්ගේ දූතයාණනි! මොහුගේ ගෙල සිඳලීමට අවසර දෙන්නැයි ඉල්ලා සිටියේය. එම්බල උමර්! අල්ලාහ් බද්ර් හි සටන් කළ සියලු දෙනා බලා ඔවුන් කළ සහ කරන්නට යන සියලු පාපයන් ක්ෂමා කරා ද නැති ද යන්න නුඹට කෙසේ දැන ගත හැකිදැයි ඔහු විමසුවේය.
මුහම්මද් නබිතුමා ඔහුට විශ්වාස කළ හැකි සියලු මිත්‍ර වාංශිකයින් වෙත පොදු කැඳවීමක් කර මදීනාවට ගෙන්වන ලදි. කාන්තාර වාසී වාංශිකයින් ඊට ප්‍රතිචාර දක්වමින් මදීනාවට සේන්දු විය. මදීනාවෙහි සිට පිටත් වන දිනය එළඹෙත්ම විශාල සේනාවක් එකතු විය. එය එතෙක් මදීනාවෙහි සිට පිටත් වූ විශාලතම සේනාව විය. හැකියාව ඇති කිසිවකු මදීනාවෙහි නතර නොවීය. මුහාජිරීන්වරු හත්සිය දෙනෙකු අශ්වාරෝහකයින් තුන්සියයක් සමග, අන්සාරිවරු හාරදහසක් අශ්වාරෝහකයින් පන් සියයක් සමග සහ වෙනත් වාංශිකයින් ඇතුළු දස දහසක පමණ සේනාවක් මක්කාව බලා පිටත් විය. එනමුත් මුහම්මද් නබිතුමාගේ සමීප හිතවතුන් කිහිප දෙනෙකු හැරුණුකොට වෙනත් කිසිවකු සතුරා කවුරුන්දැයි දැන සිටියේ නැත.
මදීනාවට යන අතරතුර අබ්බාස් සහ ඔහුගේ බිරිඳ උම් අල් ෆද්ල් මදීනාවට ගමන් කරමින් සිට මුහම්මද් නබිතුමාගේ ඉල්ලීම පරිදි සේනාවට එකතු විය. සේනාව මක්කාවට දිනක හෝ දෙකක දුරකකට සමීප වූ බව ආරංචි වීමෙන් බියට පත් වී තායිෆ් වැසියන් වහාම සේනාවක් සංවිධානය කරන්නට විය. නමුත් මක්කා වැසියෝ ද කලබලයට පත් විය. ඔවුන් හුදයිබියා ගිවිසුම කඩ කළ බව දන්නා හෙයින් ඔවුනගේ භීතිය ඉතාමත්ම වැඩි විය. මුහම්මද් නබිතුමා මේ බව තේරුම්ගත්තේය. මේ නිසා මෙම භීතිය වැඩි කිරීම පිණිස ඔහු රාත්‍රියේදී සියලු දෙනාට විසිරී ගොස් වෙන වෙනම විශාල ගිනි මැලයන් දල්වන්නට උපදෙස් දුන්නේය. මේ අනුව මක්කාවට නුදුරින් ගිනිමැල දස දහසක් පමණ දැල් වී තිබුණු අතර මක්කා වැසියන්හට මෙය අති විශාල සේනාවක පැමිණීම බව හැ‌ඟෙන්නට විය.
කුරෙයිෂි නායකයින් වහාම රැස් වී අබූ සුෆියාන්ව මුහම්මද් නබිතුමා වෙතට යවා යම් එකඟතාවයකට එළඹීමට තීරණය කළෝය. මේ අනුව අබූ සුෆියාන් මුස්ලිම්වරුන් හමුවීමට පිටත් වන විට ඔවුන් අපේක්ෂා කළ අබ්බාස් පිටතට පැමිණ ඔහුව හමු වී ඔහුව මුහම්මද් නබිතුමා වෙතට රැගෙන ගියේය. මුහම්මද් නබිතුමා හමු වූ අබූ සුෆියාන් එම්බල මුහම්මද්! නුඹ විශාල සේනාවක් රැගෙන නුඹේ ඥාතීන්ට එරෙහිව පැමිණ ඇත යන්නෙන් පැවසුවේය. එවිට මුහම්මද් නබිතුමා වරද කළේ නුඹයි. කුස්සා වාංශිකයින්ට පහර දීමෙන් පූජනීය භූමියේ එකඟ වූ අල්ලාහ්ගේ ශුද්ධ වූ ගිවිසුම කඩ කරීමෙන් නුඹලා විශාල පාපයක් සිදු කර ඇත යන්නෙන් පැවසුවේය. පසුව ඔහු අබ්බාස්ට ඔහුව ඔහුගේ කූඩාරමේ රාත්‍රිය ගත කිරීමට ඉඩ දෙන ලෙසට උපදෙස් දිය. උදෑසන වත්ම අදාන් ශබ්දය රැව් දෙන්නට විය. මේ කුමක්දැයි අබූ සුෆියාන් ප්‍රශ්න කළේය. මෙය නැමදුමට ආරාධනා කිරීමයි යන්නෙන් අබ්බාස් පිළිතුරු දිය. දිනකට කී වරක් නුඹලා නැමදුම සිදු කරන්නේ දැයි ඔහු ප්‍රශ්න කළේය. පස් වතාවක් යන්නෙන් ඔහු පිළිතුරු දිය. දෙවියණි එය ඉතාමත් වැඩි යන්නෙන් ඔහු ප්‍රකාශ කළේය. පසුව ඔහු සියලු දෙනා වුදූ දෝවනය කිරීමට පොර කන අයුරුත් මුහම්මද් නබිතුමා වුදූ දෝවනය කළ ජලය රැගෙන ඔවුන්ගේ සිරුරු මත තවරා ගැනීමට පොර කෑ අයුරුත් දැක මවිතයට පත් විය. එම්බල අබ්බාස්! මා මෙවැනි පරමාධිපත්‍යයක් මින් පෙර කිසි දිනක දැක නැත යන්නෙන් පැවසුවේය. ඊට අබ්බාස් පිළිගනු යන්නෙන් පැවසුවේය. මාව ඔහු වෙතට රැගෙන යනු යන්නෙන් අබූ සුෆියාන් පැවසුවේය. නැමදුමෙන් පසුව අබ්බාස් ඔහුව මුහම්මද් නබිතුමා වෙතට රැගෙන ගිය අතර ඔහු එහිදී ඉස්ලාම් දහම වැළඳ ගත්තේය. පසුව අබ්බාස් විසින් මුහම්මද් නබිතුමාට අබූ සුෆියාන් ගෞරවය සඳහා කෙතරම් ප්‍රිය කරන්නේ දැයි නුඹ දන්නෙහිය. මේ නිසා ඔහුට යම් උපකාරයක් කර දෙනු යන්නෙන් පැවසුවේය. ඊට එකඟ වූ මුහම්මද් නබිතුමා කුරෙයිෂි නායක අබූ සුෆියාන් වෙත ගොස් නුඹ කුරෙයිෂින් වෙතට ගොස් පවසවු! කවුරුන් හෝ අබූ සුෆියාන්ගේ නිවස තුළට ඇතුළු වන්නේ ද ඔහු ආරක්ෂිතය. කවුරුන් හෝ තම නිවස අගුලු දමා වසා ගන්නේ ද ඔහු ද ආරක්ෂිතය. කවුරුන් හෝ පල්ලිය තුළට වී සිටින්නේ ද ඔහුද ආරක්ෂිත ය යන්නෙන් පැවසුවේය.